Ka ˋSaga Tonu Mai a “Tino Loto ˋLei”

1. E ˋsaga atu pefea a tino ki te tala ˋlei? (Galuega 13:​47, 48; 16:​14, 15)

E TOKOUKE a tino i te senitenali muamua ne talia ne latou te munatonu i te taimi ne lagona ne latou a te fekau mai Kelisiano. (Faitau te Galuega 13:​47, 48; 16:​14, 15.) E penā foki i aso nei, e fiaˋfia a nisi tino i te taimi e lagona ei ne latou a te tala ‵lei mō te taimi muamua. Ke oko ki a latou kolā ne seki fiaˋfia muamua ki te fekau o te Malo, e mafai o ˋtala fakamuli olotou loto o talia te fekau tenā. Ne a ˋtou mea e ˋtau o fai māfai e maua ne tatou a “tino loto ˋlei” i te ˋtou galuega talai?

2. I te auala fea e fai ei te ˋtou galuega ko te faiga o soko e pelā me se tino fai fatoaga?

² Ke mafaufau ki se tala fakatusa. A te ˋtou galuega ko te faiga o soko, e mafai o fakatusa ki se tino fai fatoaga. Kafai ko ˋpala a fuaga o se lakau, kāti ka tau ne te tino fai fatoaga a fuaga konā, e tiga eiloa koi manakogina ke fakamalū ne ia te laukele io me ˋtoki a nisi lakau i te fatoaga. I se auala tai ˋpau, kafai e maua ne tatou se tino telā ko toka o talia ne ia te ˋtou fekau, e maˋnako tatou o fesoasoani fakavave atu ki a ia ke fai mo soko o Keliso. I te taimi foki tenā, e tumau tatou i te atiakaga o te fiaˋfia o nisi tino kolā e manakogina ne latou a taimi e uke ke lavea te tāua o mea e lagona ne latou. (Ioa. 4:​35, 36) Ka fesoasoani mai eiloa a te faiga o fakaˋtauga ˋlei ke filifili aka ne tatou a te ˋtoe auala ˋlei ke fesoasoani atu ki ˋtou tino fakalogoˋlogo. Ke na sauˋtala nei tatou ki mea e mafai ne tatou o fai i te taimi muamua e sauˋtala tatou mo tino kolā ko toka o talia a te ˋtou fekau. Ka onoono foki tatou ki auala e mafai o fesoasoani atu ki vaegā tino penā ke tumau i te gaˋsolo ki mua.

MĀFAI KO FIAˋFIA A TINO KI TE TALA ˋLEI

3. Se a te mea e ˋtau o fai ne tatou māfai ko maua ne tatou a tino fiaˋfia i te ˋtou galuega talai? (1 Kolinito 9:26)

³ Kafai e maua ne tatou a tino fiaˋfia i te ˋtou galuega talai, e maˋnako tatou o fesoasoani atu ki a latou ke kamata o saˋsale atu i te auala telā e tau atu ki te ola. I vaegā taimi penei, e se ˋtau o fakatalave tatou mai te ofo atu o se akoga faka-te-Tusi Tapu io me ˋkami latou ki ˋtou fakatasiga i te taimi muamua e sauˋtala tatou mo latou.—Faitau te 1 Kolinito 9:26.

4. Fakamatala mai se tala o se tino telā ne toka ke fai fakavave sena akoga faka-te-Tusi Tapu.

⁴ Ke ofo atu se akoga. A nisi tino kolā e faiˋpati tatou ki ei, e toka o talia fakavave ne latou se akoga faka-te-Tusi Tapu. E pelā me se fakaakoakoga, i se Aso Fa e tasi, ne fanatu se fafine mai Kanata ki te kā talai kae puke ne ia se ˋkopi o te polosiua ko te Ke Ola ki te Se-Gata-Mai! Ne fakamatala atu a te tuagane i te kā talai, me e mafai o fai se akoga faka-te-Tusi Tapu sē ˋtogi ki te polosiua tenā. Ne fiafia te tamafine tenei ki ei, kae tuku atu tena napa telefoni. Fakamuli ifo i te aso eiloa tenā, ne lafo atu ne te tamafine tenei se fekau ki te tuagane e uiga ki tena akoga. I te faiatuga te tuagane me ka fanatu a ia i te fakaotiga o te vaiaso, ne fesili atu te tamafine tenā: “Kae e a te aso ma taeao? Au e avanoa.” Ne fai te lā akoga i te Aso Lima tenā. Ne kau atu te tamafine tenā ki tena fakatasiga muamua eiloa i te fakaotiga o te vaiaso, kae ne gasolo vave tou fafine ki mua.

5. E mafai pefea o fakaasi atu ne tatou te faiga o fakaˋtauga ˋlei māfai e ofo atu se akoga faka-te-Tusi Tapu? (Onoono foki ki ata.)

⁵ E tonu, e se fakamoeˋmoe tatou ko tino katoa kolā e fakalogoˋlogo mai ki te ˋtou fekau ke fiaˋfia fakavave e pelā mo te tamafine tenā. Kāti e manakogina ke ati aka ne nisi tino a te fiaˋfia o latou. E mafai o kamata muamua ne tatou se sauˋtalaga e uiga ki se mataupu telā e fiafia ki ei te tino tenā. Kae kafai e fakatumau ne tatou se kilokiloga ˋlei kae tumau i te fakaasi atu te fiafia tonu ki te tino tenā, e mafai eiloa o kamata ne tatou se akoga mo ia i se taimi toetoe fua. Ne a ˋtou pati e mafai o fai atu māfai e ofo atu se koga? Tenā te fesili ne fai atu ki taina mo tuagane kolā ne apo malosi i te kamataga o akoga faka-te-Tusi Tapu.

6. Ne a au pati ka fai atu ke fesoasoani ki te tino ke lavea ne ia me ka aoga ki a ia a te sukesuke ki te Tusi Tapu?

⁶ Ne fakamatala mai ne tino talai mo paenia kolā ne kamata ne latou a akoga faka-te-Tusi Tapu me i nisi fenua, se mea ˋlei ke ˋkalo keaˋtea mai vaegā pati e pelā mo te “sukesuke,” “akoakoga faka-te-Tusi Tapu,” io me “akoako koe” māfai ko fakamatala atu ne latou te pogai e fai ei te akoga. Ne lavea ne latou me se mea ˋlei ke fakaaoga a tugapati e pelā mo “sauˋtalaga,” mo te “fai ke iloa a mea i te Tusi Tapu.” E mafai o fesoasoani atu koe ki te tino ke mafai o fakatumau te sauˋtalaga tenā mai te fai atu, “Se mea fakaofoofogia ke mafai o maua a tali ki toe fesili tāua i te olaga mai te Tusi Tapu” io me fai atu a “te Tusi Tapu e sē se tusi fua fakalotu; e fesoasoani mai ki a tatou i auala aoga e uke.” E mafai o fakaopoopo atu koe: “I ne nai minute, e mafai o tauloto koe ki se mea telā ka mafai o fesoasoani malosi atu ki tou olaga.” E se manakogina ke fakaaoga ne koe a pati pelā mo te “ke fai se fakatokaga ke foki atu i vaiaso katoa,” me e mafai o fai ei ko tino ke manavaˋse me e ˋtau eiloa o fetaui koutou i taimi katoa.

7. Ko te taimi fea ne kamata o iloa ne nisi tino a te munatonu i te Tusi Tapu? (1 Kolinito 14:​23-25)

⁷ ˋKami mai latou ki se fakatasiga. E foliga mai me i taimi o te apositolo ko Paulo, ne kamata o iloa ne nisi tino a te munatonu i te Tusi Tapu i te taimi ne ˋkau atu latou ki se fakatasiga Kelisiano. (Faitau te 1 Kolinito 14:​23-25.) E penā foki eiloa i aso nei. A te tokoukega o tino ˋfou ne gaˋsolo fakavave atu ki mua i te taimi ne kamata o ˋkau mai latou ki ˋtou fakatasiga. Ko te taimi fea e ˋtau o ˋkami ne koe latou? I te tusi ko te Ke Ola ki te Se-Gata-Mai! e aofia i ei se ˋkamiga i te mataupu 10, kae e se ˋtau o fakaˋtali koe ke oko koulua ki te mataupu tenā. I te sauˋtalaga muamua eiloa a koulua, e mafai o ˋkami mai ne koe a ia ki se fakatasiga i te fakaotiga o te vaiaso, kāti mai te fai atu ki a ia te matua o te lāuga mō tino katoa, io me se manatu mai te Sukesukega ki te Faleleoleo Maluga i te vaiaso tenā.

8. Ne a mea e mafai o fakaasi atu ne tatou ki se tino māfai e ˋkami ne tatou ki ˋtou fakatasiga? (Isaia 54:13)

⁸ Kafai e ˋkami ne tatou se tino fiafia, fakamatala atu te auala e ˋkese ei a ˋtou fakatasiga mai polokalame fakalotu e masani o kau a ia ki ei. I te taimi muamua ne kau atu se tino akoga ki te Tusi Tapu ki te Sukesukega ki te Faleleoleo Maluga, ne fesili atu a ia ki tena faiakoga, “E mata, e iloa ne te taina e fai ne ia te akoga a igoa o tino katoa?” Ne fakamatala atu te tuagane me e taumafai a tatou katoa ke iloa a igoa o tino i loto i te ˋtou fakapotopotoga, e pelā eiloa mo te iloa ne tatou a igoa o tino katoa i loto i ˋtou kāiga. Ne lavea ne te tino akoga tenei a te ˋkese o tatou mai mea e fai i tena lotu. I se auala tai ˋpau, e ˋfou foki ki nisi tino a mea e fai i ˋtou fakatasiga. (Faitau te Isaia 54:13.) E maopoopo tatou o tapuaki atu ki a Ieova, tauloto mai i a ia, kae fakatau fakamalosi atu te suā tino ki te suā tino. (Epe. 2:12; 10:​24, 25) Ona ko te mea tenā, a ˋtou fakatasiga e fai fakaˋlei kae e aoga foki, kae e se aofia i ei a tuu fakalotu. (1 Koli. 14:40) E se gata i ei, a koga e fai i ei a ˋtou fakatasiga ne faite i se auala faigofie, ko te mea ke faigofie te tauloto i ei. Kae e se ˋlago atu tatou ki se potukau fakapolitiki e tasi, me e se ˋkau atu tatou ki se feitu i mea fakapolitiki. E se gata i ei, e se ˋkau atu foki tatou ki kinauga i mea tau tafaoga mo nisi mea aka kolā e fakamāfua aka i ei a kinauga. E mafai o aoga ke fakaasi atu muamua ki te tino akoga a te vitio Ne a Mea e Fai i se Kingdom Hall? I te auala tenā, ka iloa i ei ne ia a mea e fai i konā.

9-10. Kafai e ˋkami ne tatou se tino ki se fakatasiga, ne a mea e mafai ne tatou o fai ko te mea ke se mā a ia o kau atu? (Onoono foki ki te ata.)

⁹ A nisi tino e fakatalave o ˋkau mai ki se fakatasiga ona ko te mea e maˋtaku ma fai e fai atu ke “ˋfuli mai ki te lotu.” Fakamautinoa atu ki te tino tenā me e fiaˋfia tatou o tali fiafia a tino ˋkami kae e se fakamalosi ne tatou a latou ke ˋkau mai io me aofia i mea e fai i ei. E tali fiafia eiloa a kāiga, e aofia i ei a latou kolā e isi ne olotou tamaliki. I ˋtou fakatasiga, e se fakaˋkese a akoakoga kolā e maua ne tamaˋliki. I lō te fai penā, e sagaˋsaga fakatasi a mātua mo tamaˋliki kae tauloto fakatasi. I te auala tenei, e mafai o iloa ne mātua a te koga e ˋnofo i ei olotou tamaˋliki mo mea e akoako atu ki a latou. (Teu. 31:12) E seai ne tupe e ˋtae i taimi penā. I lō te fai penā, e fakaˋlogo tatou ki te fakatonuga tenei a Iesu: “Ne maua ne koutou a mea konei e aunoa mo se ˋtogi, tuku atu foki e aunoa mo se ˋtogi.” (Mata. 10:8) E mafai foki o fakaasi atu ne koe ki te tino tenā me e se manakogina ne ia ne gatu ˋtogi ˋmafa ke mafai o kau mai. A te Atua e kilo ki te loto o te tino, kae e se ki ana foliga.—1 Samu. 16:7.

¹⁰ Kafai e kau mai te tino, fai a te mea e mafai ne koe o fai ke mo a e mā te tino tenā. Ke avatu ne koe a ia ke fetaui mo toeaina mo nisi tino talai. Kafai e lavea ne ia te aˋlofa mo te atafai o tino i te taimi tenā, ka manako eiloa a ia o toe foki mai. I te taimi o te fakatasiga, kafai e seai sena Tusi Tapu, fakaaoga fakatasi ne koulua a tau Tusi Tapu kae fesoasoani atu ke malamalama i se lāuga io me se sukesukega ki se mataupu.

MĀFAI KO KAMATA SE AKOGA FAKA-TE-TUSI TAPU

11. E fakaasi atu pefea ne koe te āva ki te taimi mo polokalame a te tino i te fale?

¹¹ Ne a manatu e ˋtau o masaua ne tatou māfai ko fai se akoga faka-te-Tusi Tapu a se tino? Fakaasi atu te āva ki te taimi mo te polokalame a te tino i te fale. E pelā me se fakaakoakoga, kafai e isi se taimi tonu ko oti ne fakatoka ke fai ei te akoga, ke fakamaoni koe ki ei, faitalia me e se fakamaoni a tino i te koga tenā ki te taimi. E se gata i ei, kati se mea ˋlei ke fakatoetoe a te akoga i te taimi muamua. E fai mai a nisi tino talai apo me se mea ˋlei ke fakatoetoe a te akoga faitalia me koi manako te tino tenā o fakalogologo. Kae sa fakaukeuke au pati. Fakaavanoa a taimi e uke ke fakaasi mai ne te tino akoga ana mafaufauga mo lagonaga.—Faata. 10:19.

12. Se a te ˋtou fakamoemoega i te taimi e kamata ei ne tatou se akoga faka-te-Tusi Tapu mo se tino?

¹² I te taimi ko kamata o sukeˋsuke koe mo se tino ki te Tusi Tapu, e fakamoemoe koe ke fesoasoani atu ki a ia ke iloa a Ieova mo Iesu, kae ati aka ne ia te alofa ki a lāua. E fai ne koe te mea tenei mai te fakasino atu faeloa ki te Muna a te Atua i lō tou iloa totino e uiga ki te Tusi Tapu. (Galu. 10:​25, 26) Ne fakavae faeloa ne te apositolo ko Paulo ana akoakoga ki a Iesu Keliso, te tino telā ne uga mai ne Ieova ke fesoasoani mai ki a tatou ke iloa kae ke aˋlofa foki ki a Ia. (1 Koli. 2:​1, 2) Ne fakaasi manino mai foki ne Paulo a te tāua ke fesoasoani atu ki soko ‵fou ke ati aka a uiga ˋlei kolā e mafai o fakatusa ki aulo, siliva mo nisi fatu tāua. (1 Koli. 3:​11-15) E aofia i uiga tāua konā ko te fakatuanaki, te poto, te faiga o fakaˋtauga ˋlei mo te mataku ki a Ieova. (Sala. 19:​9, 10; Faata. 3:​13-15; 1 Pe. 1:7) Fakaakoako ki te auala ne akoako ei a Paulo mai te fesoasoani atu ki au tino aˋkoga ke ati aka te fakatuanaki malosi mo se fesokotakiga ˋpili mo te lotou tamana alofa i te lagi.—2 Koli. 1:24.

13. E mafai pefea o fakaasi atu ne tatou te kufaki mo te loto malamalama māfai e fesoasoani atu tatou ki tino fiaˋfia? (2 Kolinito 10:​4, 5) (Onoono foki ki te ata.)

¹³ Fakaakoako ki te auala ne akoako atu ei a Iesu, mai te fakaasi atu te kufaki mo te loto malamalama. Kalo keaˋtea mai te faiga o fesili kolā e fai ei ke mā a te tino. Kafai e isi se mea e faigata ki a ia ke malamalama i ei, e se manakogina ke tumau i te sauˋtala ki te manatu tenā. I lō te fai penā, fakaˋsoko ki nisi manatu, ko toe foki ei ki te manatu tenā. I lō te taumafai o faimalō a ia ke talia se akoakoga a koi tuai o toka a ia ke fai penā, fakaavanoa se taimi ke ˋgoto tonu te munatonu tenā ki tena loto. (Ioa. 16:12; Ko. 2:​6, 7) E fakatusa ne te Tusi Tapu a akoakoga ˋse kolā e taumafai tatou o fakaˋtonu aka ki se taoa. (Faitau te 2 Kolinito 10:​4, 5; onoono ki te manatu mō sukesukega ko te “overturning strongly entrenched things.”) I lō te faimalō tau tino akoga ke tiaki a talitonuga ko leva ne talitonu a ia ki ei, e ˋtau o fesoasoani atu koe ki a ia ke talitonu ki a Ieova.—Sala. 91:9.

MĀFAI E ˋKAU MAI A TINO ˋFOU KI FAKATASIGA

14. E ˋtau o pefea ˋtou faifaiga ki tino ˋfou kolā e ˋkau mai ki ˋtou fakatasiga?

¹⁴ E fakamoemoe a Ieova ke sē fakailoga tino tatou i ˋtou faifaiga ki tino ˋfou, faitalia olotou tuu mo aganuu, tulaga i te olaga, io me ko koga ne ˋmai ei latou. (Iako. 2:​1-4, 9) Tela la, e fakaasi atu pefea ne tatou te alofa ki tino kolā e ˋkau mai ki ˋtou fakatasiga?

15-16. E mafai pefea o fesoasoani atu tatou ki tino ˋfou kolā e ˋkau mai ki fakatasiga ke sē ˋmā?

¹⁵ A nisi tino kāti e ˋkau mai fua ki ˋtou fakatasiga, ona ko te mea e fia iloa ne latou a mea e ˋtupu i ei, io me fakamalosi latou ne se suā tino e nofo i te suā koga ke ˋkau mai. Tela la, e se ˋtau o fakatalave tatou o faiˋpati atu ki tino penā kolā e ˋmai ki ˋtou fakatasiga. Ke tali fiafia latou e aunoa mo te fai ne tatou ke ˋmā latou. ˋKami ke sagaˋsaga fakatasi mo koe. Tuku atu tau Tusi Tapu mo nisi tusi ke fakaaoga ne latou, io me tuku atu ne olotou ˋkopi totino o te Tusi Tapu mo nisi tusi. E se gata i ei, mafaufau foki ki olotou lagonaga. Ne fai atu se tagata e tokotasi telā ne fanatu ki se Fale Tapuaki, ki se taina telā ne talimalo ne ia tou tagata, me ne mā a ia ona ko ana gatu. Ne fai ne te taina tenā ke se mā tou tagata mai te fakamatala atu me e tiga eiloa e fai fakaˋlei ˋtou gatu, kae e ˋpau eiloa tatou mo nisi tino. Ne seki puli i te tagata tenā, telā ne papatiso fakamuli ifo, a te auala ne saga atu te taina ki a ia. Kae e isi se mea e ˋtau o fakaeteete tatou i ei: Kafai e sauˋtala koe mo tino ˋfou mai mua io me mai tua o se fakatasiga, ke fakaasi atu te fiafia tonu e aunoa mo te fia logo ki mea totino e uiga ki a latou.—1 Pe. 4:15.

¹⁶ E mafai ne tatou o fai ke se fai fakaˋtea a tino ˋfou konā, mai te fakaasi atu te āva i ˋtou sauˋtalaga, ˋtou tali mo ˋtou tofiga māfai e faiˋpati e uiga ki tino kolā e se ne Molimau a Ieova io me ko olotou talitonuga. ˋKalo keaˋtea mai tugapati kolā e mafai o fakavāivāi atu ki a latou io me fai ei ke se toe ˋfoki mai latou. (Tito 2:8; 3:2) E pelā me se mea e tasi, e se ˋtau eiloa o taku fakamasei ne tatou a talitonuga a latou kolā e se ne Molimau. (2 Koli. 6:3) I te feitu tenei, e ˋtau foki mo taina kolā e fai ne latou a lāuga mō tino katoa o fakaeteete malosi. E ˋtau o masaua ne latou a tino fakalogoˋlogo kolā e se ne Molimau, mai te fakamatala atu a pati mo uiga o tugapati kolā e se malamalama i ei a latou.

17. Se a te ˋtou fakamoemoega māfai e maua ne tatou a “tino loto ˋlei” i te ˋtou galuega talai?

¹⁷ A te ˋtou galuega ko te faiga o soko ko sili atu nei i te manakogina ke fai fakavave i aso takitasi. Kae e maua faeloa ne tatou a “tino loto ˋlei kolā e ˋtau o maua ne latou a te ola se-gata-mai.” (Galu 13:48) Kafai e maua ne tatou a latou, sa fakatalave o ofo atu se akoga faka-te-Tusi Tapu io me ˋkami latou ki ˋtou fakatasiga. Mai te fai penā, ko fesoasoani atu tatou ke ˋlaka latou ki te “auala telā e tau atu ki te ola.”—Mata. 7:14.