Nea Enti a Wɔyɛɛ Nhomawa Yi

Wɔyɛɛ nhomawa yi na ama ntease ne biakoyɛ aba Yehowa Adansefo ne sukuu mpanyimfo ntam. Yɛn pɛ ne sɛ yɛne wɔn a wɔyɛ adwuma na ama nhomasua mu nhyehyɛe ahorow a wɔde ma wɔ sukuu no atumi ayɛ yiye no bɛbom ayɛ adwuma.

Yehowa Adansefo awofo pɛ sɛ wɔbɛboa ma tebea a eye ma adesua atra hɔ. Wɔpɛ sɛ wɔn mmofra nya mfaso kɛse a ɛsen biara a ebetumi ayɛ yiye fi sukuu a wɔkɔ no mu. Na wɔpɛ sɛ akyerɛkyerɛfo ne sukuu mpanyimfo afoforo hu sɛ wɔbɛyɛ nea ntease wom a wobetumi nyinaa de aboa ma wɔatumi ayɛ eyi.

Yehowa Adansefo wɔ din pa a ɛne sɛ wobu bra pa a ɛsen biara wɔ baabiara a wɔte. Wonim wɔn sɛ wɔyɛ osetie ma aban mpanyimfo. Nanso, ebia akyerɛkyerɛfo bi bɛte nka sɛ Adansefo mmofra mmoa wɔn esiane sɛ ɛnyɛ sukuu nhyehyɛe anaa adeyɛ biara na wɔde wɔn ho hyɛ mu nti. Nanso, pow a mmofra yi pow sɛ wɔde wɔn ho bɛhyɛ nneɛma bi mu yi mfi atuatew anaa fekubɔ a wɔmpɛ nti. Wɔn nneyɛe no gyina ɔsom ne abrabɔ mu gyidi ahorow so.

Wɔ nhomawa yi mu no, yɛbɛpɛ sɛ yɛma sukuu mpanyimfo hu Yehowa Adansefo gyidi ahorow a ɛka sukuu dwumadi ahorow a wɔde wɔn ho bɛhyɛ mu no. Nea ɛka ho bio no, yɛpɛ sɛ yɛkyerɛkyerɛ nea enti a esiane gyidi ahorow yi nti, Adansefo mmofra mfa wɔn ho nhyɛ dwumadi ne nhyehyɛe ahorow binom a abu so wɔ mmeae ahorow pii wɔ wiase nyinaa no mu no mu. Bere koro no ara mu no, yɛpɛ sɛ yɛma ɛda adi pefee sɛ ɛnyɛ yɛn adwene ne sɛ yɛde yɛn nsusuwii ahorow no bɛhyɛ afoforo so.