Yɛn Atirimpɔw Wɔ Asetra Mu

Nea edi kan no, Yehowa Adansefo ne yɛn atirimpɔw wɔ asetra mu no ho nkyerɛkyerɛmu tiawa bi bɛboa. Yɛyɛ amanaman ntam Kristofo kuw a wobetumi ahu yɛn wɔ nsase ahorow bɛboro 200 so wɔ wiase nyinaa. Ɔkwan a yɛfa so som Onyankopɔn no fa sɛnea yɛhwɛ ade ne yɛn asetra kwan nyinaa ho.

Esiane sɛ yegye di sɛ Onyankopɔn yɛ obi ankasa nti, yebu no sɛ ɛho hia sɛ yɛne no nya abusuabɔ a emu yɛ den kɛse sɛ yɛn Agya. (Mateo 6:9) Nea ɛka nneɛma afoforo ho no, ne din a yɛde behu no no nso wɔ eyi mu. Wɔ Dwom 83:18 no Bible se: “Na wonhu sɛ wo a wo din de Yahwe [Yehowa] no, wo nko ara ne ɔsorosoroni, asase nyinaa so.”

Sɛ Kristofo no, yɛbɔ mmɔden nso sɛ yɛbɛma yɛn asetra ne Onyankopɔn Ba Yesu Kristo nhwɛso no ahyia. Sɛ na ɔyɛ obi a wɔakyerɛkyerɛ no yiye ma enti ɔda nsow no yɛ nea ɛda adi wɔ nyansa a na ɛwɔ ne nkyerɛkyerɛ ahorow mu no mu. Nanso Yesu de ne nimdeɛ no dii dwuma ma ɛho aba afoforo mfaso na ɛnyɛ sɛ ɔde benya sika fam gyinabea kɛse bi anaasɛ ɔde begye din kɛse. Na nea ɛyɛ kɛse wɔ n’asetra mu sen biribiara ne ne som a ɔde ma Onyankopɔn. Yesu kae sɛ: “M’aduan ne sɛ meyɛ nea ɔsomaa me no apɛde, na miwie n’adwuma.”—Yohane 4:34.

Saa ara na yɛte nka. Eyi nti, Adansefo a wɔwɔ wiase nyinaa bu nhomasua a eye sɛ ade a ɛsom bo. Yɛhyɛ yɛn mmofra nkuran sɛ wɔntrɛw wɔn nimdeɛ mu nkɔ akyiri—sɛ wobenya nneɛma a atwa wɔn ho ahyia ne nea asetra kyerɛ nyinaa ho nimdeɛ ne ntease. Sɛnea ɛbɛyɛ na wɔayɛ eyi no, wɔtaa kenkan yɛn nsɛmma nhoma Nyan! a ɛkame ayɛ sɛ ɛka ɔdesani asetra mu nneɛma nyinaa ho nimdeɛ ho asɛm no na wɔde di dwuma wɔ wɔn sukuu adwuma mu. Akyerɛkyerɛfo binom nso de nsɛmma nhoma yi siesie wɔn sukuu adekyerɛ ahorow.

Nhomasua mu ntetee a yɛn mmofra nya no boa wɔn mu pii ma wɔn ankasa tumi de wɔn adwene yɛ adwuma sɛnea wobetumi. Nsɛmma nhoma bi a wɔfrɛ no Journal of Personality kaa eyi ho asɛm wɔ amanneɛbɔ bi a ɛfa nhwehwɛmu bi a wɔyɛe wɔ Australia a ɛfa sɛnea mmofra a wɔadi mfe 12 “tumi de wɔn ankasa adwene yɛ ade” ho no ho mu. Nhwehwɛmufo no kae sɛ: “Ne titiriw no, na mmofra a wɔn ankasa tumi de wɔn adwene yɛ ade kɛse no mu dodow a ɛyɛ nwonwa yɛ Yehowa Adansefo.” Wobetumi aka sɛ eyi fi nokwasɛm a ɛyɛ sɛ Adansefo no som no hyɛ wɔn nkuran ma wɔde wɔn adwene di dwuma no nti.

Ɛwom sɛ Adansefo mmofra ani gye nhomasua a eye ho de, nanso ɛnyɛ adwene a wɔde kɔ sukuu ne sɛ wɔbɛba abɛyɛ nnipa akɛse anaasɛ wobegye din. Wɔn asetra mu botae titiriw ara ne sɛ wɔbɛsom sɛ Onyankopɔn asomfo a wɔyɛ nnam, na wɔfa sukuukɔ sɛ mmoa a wɔde bɛyɛ eyi. Enti wɔtaa paw adesua ahorow a ɛho wɔ mfaso a ɛbɛboa wɔn ma wɔahwɛ wɔn ho wɔ nnɛyi wiase no mu. Enti ebia wɔn mu pii bɛpaw adwuma ho adesua bi anaasɛ wɔbɛkɔ nsaanodwuma sukuu. Sɛ wofi sukuu a, wɔpɛ sɛ wonya adwuma a ɛbɛma wɔanya kwan de wɔn adwene akɔ wɔn adwuma titiriw a ɛne Kristofo som adwuma no so.

Sɛnea Wobu Bible No

Sɛnea wubetumi ahu afi nea yɛasusuw ho no mu no, Yehowa Adansefo bu Bible no a wɔde bedi dwuma sɛ da biara da akwankyerɛ no aniberesɛm sen sɛnea nnipa pii yɛ. Wogye di ampa sɛ “Kyerɛw nyinaa fi Onyankopɔn home mu.”—2 Timoteo 3:16.

Nea ɛne saa nsɛm yi hyia no, yegye di sɛ biribiara a wɔakyerɛw wɔ Bible no mu no yɛ nokware na ɛsɛ sɛ ɛkyerɛ Kristoni asetra kwan. Esiane eyi nti, adwene a Ɔdansefo abofra wɔ wɔ sukuu dwumadi ahorow bi ho no bɛyɛ soronko koraa wɔ osuani a ommu Bible nkyerɛkyerɛ aniberesɛm saa no de ho. Nhomawa yi besusuw sukuu dwumadi ahorow a ɛfa ho no ho na abɔ mmɔden sɛ ɛbɛboa wo ma woate nea enti a Yehowa Adansefo paw gyinabea a wɔwɔ wɔ dwumadi ahorow a ɛtete saa ho no ase.

Sɛnea ebia wunim no, esiane sɛ Bible no yɛ nkɔmhyɛ nhoma titiriw nti, yɛbɛpɛ sɛ wususuw tumi a ne nkɔmhyɛ ahorow no mu gyidi nya wɔ Adansefo no su a wokura wɔ sukuu ho no so ho.

[Kratafa 4 mfonini]

Adansefo a wɔwɔ wiase nyinaa bu nhomasua a eye sɛ ɛsom bo

[Kratafa 5 mfonini]

Wɔde di dwuma sɛ da biara da akwankyerɛ