Miriam​—Onyaa Hokwan Wɔ Ne Mmofraase Ne Mpanyinyɛ Bere Mu

MIRIAM, Lewini Amram ne ne yere Lewini Yokebed babea no dii dwuma titiriw wɔ Israel abakɔsɛm mfiase mu. Ɔkwan a Yehowa Nyankopɔn faa so de Miriam dii dwuma no di sɛnea osusuw ɔman no ho no ho adanse. Ade Nyinaa So Tumfoɔ no nam odiyifo Mika so paee mu kae sɛ: “Na miyii wo fii Misriam asase so bae, na migyee wo fii nkoafi, na mesomaa Mose, Aaron ne Miriam dii w’anim.”​—Mika 6:4.

SƐ́ ABOFRA

Sɛ́ abofra no, Miriam nyaa hokwan dii dwuma wɔ Yehowa atirimpɔw ho wɔ ne nuabarima Mose ho. Misriam Farao ahyɛ mmara sɛ ɔbabarima biara a Hebrifo no bɛwo no no wɔntow no nkyene Nil Asubɔnten no mu. Yokebed ansuro ɔhene no mmara no, enti ɔde akokoaa no siee asram abiɛsa. Nanso bere a ontumi mfa no nsie bio no, ɔyɛɛ mmɛw adaka bi de ama ne mannɔ sraa ho. Ɛno na afei ɔde akokoaa no too adaka no mu na ɔde kosii wura mu wɔ asu no ano. Ɛno na afei Miriama kogyinaa akyirikyiri sɛ ɔrehwɛ nea ɛbɛba.​—Ex. 2:1-4; 6:20; Heb. 11:23.

Bere a Farao babea no a ne mmaawa ka ne ho no bae sɛ wɔrebeguare wɔ asu no mu no, ohuu adaka no, na ɔkae sɛ wɔmfa mmrɛ no. Akokoaa a ohuu no wɔ mu a ɔresu no kanyan ne nkate maa akokoaa no asɛm yɛɛ no mmɔbɔ. Miriam yɛɛ ade ntɛm. Ɔka kyerɛɛ Farao babea no sɛ: “So menkɔ menkɔfrɛ Hebrifo mmea no mu nufumafo bi mmrɛ wo, na ɔmmɛma akokoaa no nufu mma wo anaa?” Miriam nsɛm no bɔɔ ɔkwan na akokoaa no ankasa nã abɛyɛ ne nufumafo. Anigye ne aseda bɛn na ɛbɛsɔre wɔ Yokebed komam sɛɛ! Enti wogyee Mose nkwa fii owu mu, na wɔyɛn no na wabɛyɛ nea wɔbɛfa no so ayi Israelfo no afi Misriam akɔ bɔhyɛ asase no ahye so. Ɛda adi sɛ mmeawa kakraa bi na wɔte sɛ Miriam a wɔanya kwan adi dwuma titiriw wɔ ɔsoro akwankyerɛ ho dwumadi mu.​—Ex. 2:5-10.

WƆ MPANYINYƐ BERE MU

Mfirihyia aduɔwɔtwe akyi no, Israelfo no fii Misriam sɛ nnipa a wɔade wɔn ho wɔ Mose akwankyerɛ ase. Bere a Farao ne n’asraafo dɔm no de anibere tiw wɔn no, Yehowa Nyankopɔn yɛɛ anwonwade kɛse bi, ɔmaa Ɛpo Kɔkɔɔ no mu paee ma Ne nkurɔfo faa mu twae. Nanso Misriamfo a wotiw wɔn no nyinaa wuwui efisɛ ankyɛ na ɛpo a emu apae no ka boom. Ɛpo no agya nohɔ na Miriam dii Israelfo mmea no anim wɔ nnwom ne asaw mu, hyɛɛ Yehowa anuonyam sɛ wagye wɔn. Na wadi bɛyɛ mfirihyia 90, na ɔresom nso sɛ odiyifobea wɔ Israel.​—Ex. 15:20, 21

Nanso afe a edii akyi bae no mu na hokwan a Miriam anya no too no hintidua. Ofii ase sɛ ɔbɛkasa atia ne nuabarima Mose, na onyaa Aaron ma ɔbɛkaa ne ho. Nea ɛde saa mfomso hwehwɛ yi bae ne Mose yere a ɔyɛ Kusni anaa Etiopiani no, na wɔde eyi dii dwuma sɛ nea wobegyina so de akasa atia ɔkwan a ne nkutoo kura no. Bible mu abakɔsɛm no ka kyerɛ yɛn sɛ: “Na wɔkae sɛ: So Mose nko so na Awurade [Yehowa] nam kasa, na ɔmfa yɛn so nso nkasa?” Saa nsemmisa yi kyerɛ sɛ Mose bu n’ani gu ne nuabarima ne ne nuabea a wɔyɛ mpanyimfo no so, na ɔma n’ankasa ho so sɛ ne nkutoo ne Onyankopɔn kyeame ​—Num. 12:1-3.

Wɔn anwiinwii no nni nnyinaso biara, efisɛ Ɔsorosoroni no ka kyerɛɛ Aaron ne Miriam sɛ: “Muntie me nsɛm ɛ: sɛ Awurade [Yehowa] diyifo bi wɔ mo mu a, adehu mu na mema ohu me, ɔdae mu na mekasa mekyerɛ no: Ɛnyɛ sɛ m’akoa Mose te ne no, wɔde me fi nyinaa ahyɛ ne nsa; ano ne ano na me ne no de kasa ohu mu, na ɛnyɛ mmebu mu, na ohu Awurade [Yehowa] suban: na ɛdɛn nti na moansuro sɛ mobɛkasa atia m’akoa Mose?” (Num. 12:6-8) Yiw, Mose nnyee Aaron anaasɛ Israel man no muni biara dibea mfii ne nsam ɛ. Yehowa paw no tee. Ɛno nti na Aaron ne Miriam nyinaa dii fɔ sɛ wɔkasa tiaa Ɔsorosoroni no.

Wɔ Miriam fam de, ebia na n’anwiinwii no fi ninkunu a ɔtwe sɛ odiyifobea no. Ebia na osusuw sɛ ne nuabarima no yere begye din wɔ ɔman no mu akyɛn no. Ɛda adi pefee sɛ Miriam ahomaso no amma wanhu ɔsɛmpɔw a ɛda hɔ ankasa no​—sɛnea ɛho hia sɛ obi brɛ ne ho ase hyɛ Yehowa nhyehyɛe ase.

Esiane sɛ obuu apam a Onyankopɔn ne no ayɛ no so na ɔkasa tiaa ne nuabarima no wɔ ɔkwan a ɛmfata so nti, wɔde kwata bɔɔ Miriam. Ɔsoro abufuw ho adanse a ɛyɛ hu bɛn ni! Aaron srɛe sɛ wonhu no mmɔbɔ, na Mose srɛɛ Yehowa maa ne nuabea no sɛ: “O Onyankopɔn ee, sa no yare ɛ!” Wɔsaa Miriam yare, nanso wɔbrɛɛ no ase denam Israel nsra no akyi a wɔma ɔkɔtrae nnanson no nti. (Num. 12:9-15) Nanso, Miriam wui wɔ Yehowa dom mu wɔ afe a Israelfo no hyɛn Kanaan asase no so no mu.​—Num. 20:1.

Onyankopɔn nkoa nyinaa betumi asua ade kɛse afi Miriam osuahu no mu. Ɛwom sɛ obi betumi anya nhyira horow pii mu anigye de, nanso eyi ankasa nkyerɛ sɛ na wade ne ho afi asehwe ho. Ɛho hia sɛ yɛn nyinaa bɔ mmɔden brɛ yɛn ho ase Onyankopɔn anim, a ɛnsɛ sɛ yɛma kwan na ahomaso adi yɛn so. Ɛmmra sɛ yɛbɛma nsɛm a efi honhom mu yi atra yɛn mu bere nyinaa: “Onyankopɔn siw ahantanfo kwan, na ɔdom ahobrɛasefo.”​—Yak. 4:6.

[Ase hɔ asɛm]

May Da Biara Da Asɛm

(Wopɛ nsɛm a wɔahyehyɛ no nyinaa a, hwɛ nhoma no mu)