Yehowa​—Aban Dennen

NKWAGYE fi Yehowa mu ahotoso a wonya mu ba, sɛnea honam fam anuanom mmaa baanu a wofi Franse kesee fam apuei hui no. Wɔn mu biako bɔ amanneɛ sɛ:

“Ná ɛyɛ anadwo 12:30 a na yɛn baanu ada hatee. Mpofirim ara, nnyigyei bi a na efi mukaase reba no ma yenyanee, afei ɔbarima bi puei wɔ ɔpon no ano. Me nua no de ehu teɛɛm sɛ: ‘Yehowa, Yehowa, mesrɛ wo boa yɛn!’ Ɔkaa asɛm yi no ɔbarima no kae sɛ yɛnyɛ komm bere a na ɔde sekan ne twitae rehunahuna yɛn. Yɛda Yehowa ase sɛ yɛyɛɛ komm, na yɛfaa ntade hyehyɛe.

“Ná ɔbarima yi aforo aba yɛn abansoro a ɛto so asia no abrannaa no so, na na ne nsa atwa bere a ɔrebu mfɛnsere no aba mu no. Enti mehwɛɛ ne nsa a atwa no maa no na meyɛɛ aduan ne kɔfe maa no sɛnea ɛbɛboa no ma nsã no afi n’ani so. Afei nso mekaa Yehowa ho asɛm kyerɛɛ no, kyerɛɛ no sɛnea ɛsɛ sɛ yɛde yɛn ho to No so. Obuae sɛ onnim Yehowa, kasa tiaa ne din no mpo. Bere a ɔrehwɛ no, me nua no kenkan Bible no na mebɔɔ mpae wɔ me tirim. Te sɛ nea ebia saa komm a yɛyɛe no hyɛɛ no abufuw no, ɔfaa mfɛnsere no ahwehwɛ a abobɔ no bi ‘na ɔde too me nua no menem, na ɔde sekan no nso too ne kɔn akyi, kae sɛ: ‘Mimia so kakraa bi a mogya bɛba!’ Mihuruw gyinae de nne a emu da hɔ kae sɛ: ‘Worentumi nhunahuna yɛn, efisɛ yɛwɔ Yehowa wɔ hɔ a obeso yɛn mu na wagye yɛn. Sɛ wukum yɛn mpo a, yɛwɔ owusɔre mu anidaso.’ Nsɛm yi ma ɔyɛɛ basaa na ogyaee.

“Ná abɔ bɛyɛ anadwo 2:45 bere a ɔkae sɛ ɔbɛkɔ, na midii n’akyi koduu ɔpon no ano. Bere a ɔrepue no, ɔkae sɛ: ‘Eye, mate ase. Yehowa ho yɛ den sen me.’ Bere a yɛatoto mukaase apon no mu akyi no, yɛbɔɔ mpae daa Yehowa yɛn Nyankopɔn a onnyaw yɛn no ase.”​—Mmebusɛm 18:10.