Onyankopɔn Asɛm—Ahobammɔ A Eye Sɛn Biara!
SƐ obi bɔ mmɔden sɛ ɔbɛbɔ wo korɔn a, dɛn na wobɛyɛ? So wode wo nneɛma bɛma no ntɛm ara anaasɛ wo ne no bɛko sɛnea ɛbɛyɛ a wobɛbɔ wo nneɛma ho ban? Wɔ nnɛ wiase a basabasayɛ wom yi mu no, nnipa pii gye di sɛ obi ahoɔden a ɔde bedi dwuma de abɔ ne nneɛma ho ban yɛ nea mfomso nni ho. Wobu otuo ne akuturukubɔ ho ntetee bi a wobenya no sɛ ɛyɛ nea ɛbɛbɔ wɔn ho ban wɔ tow a wɔbɛtow ahyɛ wɔn so no mu. Nanso so nea efi mu ba no yɛ nea eye sen biara ankasa? Mpɛn pii nnipa a wɔde akode ahorow di dwuma no nu wɔn ho akyiri yi. Nanso nea ɛne eyi bɔ abira no, Ɔhene Salomo kae sɛ: “Nka sɛ: Mɛhyɛ bɔne ananmu. Twɛn [Yehowa], na ɔbɛboa wo.”—Mmebusɛm 20:22.
Ɛnkyɛe biara na adwumayɛfo a wɔwɔ Yehowa Adansefo wiase nyinaa adwumayɛbea ti a ɛwɔ Brooklyn, New York, no mu biako kɔɔ ne nnamfo bi fi wɔ Brooklyn. “Bere a miduu ɔdan no anim no, ɔbarima bi a ɔhyɛ asraafo atade tuu mmirika baa m’anim a okura sekan na ɔkae sɛ: ‘Fa wo sika bra! Nea ɛwɔ wo ho nyinaa!’
“Esiane sɛ ohui sɛ nea ɔyɛe no amma mansuro nti, ɔkae sɛ: ‘Kɔ ɔdan no mu! Mempɛ sɛ obiara bɛte! Kɔ mu!’ Bere a yɛhyɛn ɔdan no mu no, ogyee me sika kotoku. Onyaa $2.00 pɛ. Bere a ɔrehwehwɛ mu no, mekyerɛkyerɛɛ mu kyerɛɛ no sɛ meyɛ Yehowa Adansefo no mu biako.
“Esiane sɛ ɔyɛɛ ne ho sɛ wante nti, ɔkae sɛ ɔpɛ sika foforo bio. Afei bere a ɔde ne nsa biako a hwee nnim no hyɛɛ me trɔɔs kotoku mu bere a biako no kura sekan no, ohuu $20 a ɛbom a mede asie. Esiane sɛ onyaa anidaso sɛ obenya pii nti, ɔkɔɔ so hwehwɛɛ mu na ɔtow biribiara a ohui wɔ me kotoku mu no guu fam. Mibisae sɛ, ‘Wo de sika no bɛyɛ dɛn? So wode rekɔtɔ nnubɔne?’ Obuae sɛ, ‘Yiw.’ Afei mekyerɛkyerɛɛ mu sɛ: ‘So wunim sɛ, sɛ ɛnyɛ sɛ meyɛ Yehowa Adansefo no mu biako a, anka woawu? Masua karate. Woanhwɛ wo sekan no yiye mpɛn pii.’
“Bere a medan kɔɔ Bible no so de kyerɛkyerɛɛ me gyinabea sɛ Yehowa Adansefo mu biako no mu no, ɔde ne nsa hyɛɛ ne kotoku mu na oyii Bible ketewaa bi na ɔkae sɛ, ‘Hwɛ, mewɔ Bible!’ Ná ɛyɛ Bible ketewaa bi.
“Mekae sɛ, ‘Hwɛ sɛnea ɛbɛboa wo. Womfa nea ɛka wɔ ha no mpo nni dwuma.’ Migyee ne Bible no na mekenkan Mateo 6:33 ne Yohane 17:3 kyerɛɛ no na misii so dua sɛ ɛnyɛ sɛ ɛho hia sɛ obenya Bible mu nimdeɛ nko na mmom ɛsɛ sɛ ɔde di dwuma wɔ n’asetra mu nso.
“Ɔkae sɛ asram abien a atwam no mu na woyii no fii afiase Esiane sɛ ɔnyɛ adwuma na ohia sika nti, ofii ase wiawiaa ade. Bere a makenkan 1 Korintofo 6:9, 10 no, medaa no adi kyerɛɛ no sɛ akorɔnfo rennya Onyankopɔn Ahenni no. Mede kaa ho sɛ: ‘Da koro ebia wubehyia obi a esiane nyansa kɛse a onni nti ɔne wo bɛko wɔ ne sika ho na ebia obekum wo, anaasɛ wubekum no anaasɛ awiei koraa no, wɔbɛkyere wo na woasan akɔ afiase bio!’ Ɔde hu teɛɛm sɛ, ‘Nka saa!’ Mekaee no sɛ ‘wɔn a wɔtwe nkrante nyinaa, nkrante ano na wobewu.’—Mateo 26:52.
“Bere a ɛdaa adi sɛ Kyerɛwnsɛm no akanyan no no, ɔpaa me kyɛw. Bere a osii ne ti ase no, ohuu nea watow agu fam hɔ no bere a oyiyii nneɛma fii me kotoku mu no. Ɔsesaw ne nyinaa na ɔde maa me nanso wamfa sika no amma me. Bere a ɔrekɔ ɔpon no ano no, ɔkae sɛ mɛpɛ sɛ mebɔ mpae ma no anaa. Mekyerɛkyerɛɛ mu sɛ, ‘Nea woyɛɛ me no nye na nea enye kɛse koraa ne sɛ woayɛ bɔne atia Yehowa. Ɛyɛ wo ne no ntam asɛm.’
“Bere a ɔrekɔ no, obisae sɛ ebia metumi ayɛ biribi ama no anaa? Bere a ɔteɛɛ ne nsa a ekura sekan no, obisae sɛ, ‘So wubetumi atow eyi akyene ama me? Meremmɔ nkurɔfo korɔn bio.’ Migyee sekan no, na memaa no Nyan! nsɛmma nhoma sii ananmu.”—Sɛnea Ricky Hanagami bɔɔ amanneɛ.