Bue A Wobue Ɔkwan A Wɔde San Kɔ Paradise
“[Yesu] see no sɛ: ‘Nokware mise wo nnɛ sɛ, Wobɛka me ho Paradise no.’”—LUKA 23:43, New World Translation.
1, 2. (a)“Paradise” kyerɛ dɛn, na ɛbɛyɛ sɛ na Eden turo no te sɛ dɛn? (b) Wɔkyerɛ Hebri asɛmfua ma “turo” no ase dɛn wɔ Kristofo Hela Kyerɛwnsɛm no mu?
ADESAMMA abusua no nyaa ne mfiase wɔ Paradise. Ɛdefa onipa bɔ ho no, yɛkenkan wɔ Kyerɛw Kronkron no nhoma a edi kan no mu sɛ: “[Yehowa] Nyankopɔn de fam dɔte nwenee onipa, na ohuw nkwa home guu ne hwene mu, na onipa yɛɛ ɔkra teasefo. Na [Yehowa] Nyankopɔn yɛɛ turo bi wɔ Eden a ɛwɔ apuei fam, na ɔde onipa a ɔnwenee no no traa hɔ.” (Genesis 2:7, 8) Edin “Eden” no kyerɛ “Anigye,” na enti na Eden turo no yɛ prama kɛse a emu yɛ anigye, na nneɛma ahorow a ɛyɛ fɛ na ɛsonsonoe wom.
2 Wɔfaa asɛmfua “paradise” no fii Hela kasa mu, na wɔ saa kasa no mu no, ɛkyerɛ turo bi a ɛte sɛ prama. Hela asɛmfua a wɔde kyerɛ Hebri edin gan a ɛkyerɛ “turo” no ase no ne pa·raʹdei·sos. Wɔkyerɛw Kyerɛwnsɛm a efi Mateo kosi Adiyisɛm no wɔ Hela kasa mu, na saa Hela asɛmfua yi na wɔde dii dwuma de kyerɛw Yesu nsɛm a ɔkae bere a na ɔrehu amane wɔ amanehunu dua so wɔ Bepɔw Calvary so Nisan 14 wɔ afe 33 Y.B. mu no.
Paradise ho Bɔhyɛ a Yesu de Maa Ɔdebɔneyɛfo Bi
3. (a) Dɛn na ɔdebɔneyɛfo bi a ɔwɔ mmɔborohunu bisaa Yesu? (b) Dɛn na ɔdebɔneyɛfo no abisade no daa no adi wɔ nea ogye di fa Yesu ho no mu?
3 Saa bere no, na wɔabɔ nnebɔneyɛfo baanu bi asɛndua mu aka Yesu ho. Ná wɔn mu biako agyae sɛ ɔkasa tia Yesu sɛnea odwowtwafo a ɔto so abien a ɔwɔ Yesu fã foforo no kɔɔ so yɛe no. Ɔdebɔneyɛfo a ɔwɔ mmɔborohunu no dan ne ho na ɔkae sɛ: “Yesu, sɛ woba w’ahenni mu a, kae me!” a na ɔnam saayɛ so reda gyidi a ɛne sɛ ɛwom sɛ wɔasɛn Yesu wɔ ne nkyɛn de, nanso na obenya ahenni bi daakye no adi. (Luka 23:42; Marko 15:32) Hwɛ sɛnea ɛbɛyɛ sɛ ɛno kaa Yesu koma! Ná nsɛmmɔnedifo a ɔwɔ adamfofa su no gye di sɛ asɛm biara nni Yesu ho ne sɛ na ɔnsɛ sɛ onya asotwe a emu yɛ den te sɛ asɛndua mu a wɔde no bɛbɔ na wɔagu n’anim ase baguam no. (Luka 23:41) Ɔnam n’abisade no so kyerɛe sɛ ogye di sɛ wobenyan Yesu afi awufo mu na waba ahenni bi mu. Ɔdebɔneyɛfo no kyerɛɛ gyidi a ɛne sɛ obetumi anya owusɔre ne sɛ Yesu ne Obi a ɔbɛfrɛ no afi awufo mu na ɔde nkwa foforo adom no wɔ asase so nso.
4. Yesu maa ɔdebɔneyɛfo no abisade no ho mmuae dɛn, na na ɛkyerɛ dɛn?
4 Bere a Yesu ka kyerɛɛ no sɛ: “Nokware mise wo nnɛ sɛ, Wobɛka me ho Paradise hɔ” no, ɔdaa no adi sɛ saa ɔdebɔneyɛfo a ɔwɔ mmɔborohunu no benya owusɔre. Ɛbɛyɛ sɛ ɛno yɛɛ awerɛkyekye ankasa maa nsɛmmɔnedifo a ɔkyerɛɛ gyidi no. Sɛ wobenyan saa ɔbarima no a, na ɛsɛ sɛ wodi kan nyan Yesu. Afei, bere a Yesu de awufo nyan tumi a Onyankopɔn de ama no no redi dwuma no, ɔbɛfrɛ ɔdebɔneyɛfo yi afi awufo mu ɛda a wobenyan adesamma no.—Luka 23:43, New World Translation; Yohane 5:28, 29; 1 Korintofo 15:20, 23; Hebrifo 9:15.
5, 6. (a) Dɛn na Amrado Pontio Pilato ma wɔkyerɛw de fam Yesu a na wɔabɔ no asɛndua mu no atifi? (b) Ɛbɛyɛ sɛ kasa bɛn na Yesu ne ɔdebɔneyɛfo no kae?
5 Kasa bɛn na Yesu de hyɛɛ bɔ no? Na wɔka kasa pii saa bere no. Eyi da adi wɔ nsɛm a Amrado Pontio Pilato ma wɔkyerɛw de fam Yesu a na wɔabɔ no asɛndua mu no atifi a na ɛkyerɛ onii ko a ɔyɛ sɛnea ɛbɛyɛ a wɔn a wɔtwam nyinaa betumi akenkan no mu. Kyerɛwtohɔ a ɛwɔ Yohane 19:19, 20 no se: “Pilato kyerɛw ɛho asɛm nso, na ɔde fam asɛndua no atifi, na ɛka sɛ: Yesu, Nasareni, Yudafo hene. Saa kyerɛw yi na Yudafo pii kanee, efisɛ nea wɔbɔɔ Yesu asɛndua mu hɔ no bɛn kurow no; na wɔkyerɛ no Hebri ne Roma ne Hela kasa mu.”
6 Esiane sɛ Yesu na Maria a na ɔyɛ ɔbaabun no woo no Betlehem nti, wɔwoo no sɛ Yudani, anaasɛ Hebrini. Enti, ɛda adi sɛ wɔ ne mfe abiɛsa ne fã asɛnka wɔ asase a wɔwoo no so so no mu no, ɔkaa asɛm wɔ Yudafo kasa a na wɔka, anaa Hebri mu. Enti, bere a ɔmaa ɔdebɔneyɛfo a ɔwɔ mmɔborohunu no awerɛhyem no, ɛda adi yiye sɛ ɔkaa Hebri kasa. Enti, ɛbɛyɛ sɛ ɔde Hebri asɛmfua gan—a ɛno ne asɛmfua a ɛwɔ Genesis 2:8 no—na edii dwuma bere a ɔreka Paradise ho asɛm no. Ɛhɔ no, Kyerɛw Kronkron no Greek Septuagint nkyerɛase no de asɛmfua pa·raʹdei·sos na edii dwuma bere a wɔkyerɛɛ mfitiase asɛmfua gan no ase no.
7. Ɔkwan bɛn so na wɔhyɛɛ Yesu anuonyam bere a wonyan no no?
7 Wonyan Yesu fii awufo mu wɔ n’asɛndua mu bɔ no akyi nnansa, anaa Nisan 16 wɔ Hebrifo kalenda so. Adaduanan akyi no, ɔsan kɔɔ soro a ɛyɛ ne kan fi no a na afei de wɔama no so kɛse. (Asomafo no Nnwuma 5:30, 31; Filipifo 2:9) Afei de na wɔama no nkwa a owu nnim a ɛyɛ ade a ɔne ne soro Agya no nkutoo na wɔwɔ. Yehowa Nyankopɔn nkutoo na na Ɔwɔ nkwa a owu nnim kosii sɛ wonyan Yesu fii awufo mu Kwasida, Nisan 16 no.—Romafo 6:9; 1 Timoteo 6:15, 16.
Agyede no Bue Ɔkwan
8. Ná dɛn ne Yehowa mfitiase atirimpɔw wɔ asase no ho, na dɛn na ɛkyerɛ sɛ ɔda so kura saa atirimpɔw no mu?
8 Ná eyinom nyinaa yɛ Onyankopɔn atirimpɔw mu nneɛma a ɛbɛma paradise mu afɛfɛde aba asase so nyinaa, yiw, sɛ ɛbɛyɛ wiase nyinaa paradise. (Genesis 1:28; Yesaia 55:10, 11) Wɔ 1 Korintofo 15:45 no, ɔsomafo Paulo ka Yesu ho asɛm sɛ “Adam a odi akyiri.” Eyi da no adi sɛ Onyankopɔn akɔ so akura ne mfitiase atirimpɔw a ɛfa asase ho no mu ne sɛ obi bɛma atirimpɔw a Adam a odi kan no antumi anni ho dwuma no abam.
9. Dɛn na Yesu de mae de buee ɔkwan a wɔde san kɔ Paradise no?
9 Sɛnea Paulo kyerɛ no, Yesu “de ne ho mae sɛ nnwensa maa nnipa nyinaa.” (1 Timoteo 2:6) Ná Yesu Kristo ankasa aka sɛ: “Sɛnea onipa ba no amma sɛ wɔnsom no, na ɔbɛsomee, na ɔde ne kra ayɛ agyede ama nnipa pii nen.” Eyi ma etumi yɛɛ yiye sɛ wɔn a wɔkyerɛ Yesu Kristo mu gyidi no benya daa nkwa.—Mateo 20:28; Yohane 3:16.
10. (a) Dɛn na Onyankopɔn bɔɔ ne tirim wɔ ho wɔ adesamma kakraa bi a wɔadom wɔn no ho? (b) Bere bɛn na wofii ase paw “kuw ketewa” no, na hena na ɔpaw wɔn?
10 Yesu foro kɔɔ soro wɔ ne wusɔre no akyi no, na obetumi de ne ogye afɔre no bo a ɛsom no akɔma Onyankopɔn ama adesamma abusua no. Nanso, na ne soro Agya Yehowa Nyankopɔn atirimpɔw ne sɛ obeyi ɔman bi afi amanaman no mu ‘ama ne din.’ (Asomafo no Nnwuma 15:14) Sɛnea Adiyisɛm 7:4 ne 14:1-4 kyerɛ no, na eyinom dodow bɛyɛ 144,000, “kuw ketewa” a wɔafrɛ wɔn kɔ Onyankopɔn ɔsoro Ahenni no mu. (Luka 12:32) Wɔde Yesu Kristo asomafo 12 no paw na efii eyinom a Yehowa Nyankopɔn adom wɔn titiriw yi paw ase. (Mateo 10:2-4; Asomafo no Nnwuma 1:23-26) Yesu ka kyerɛɛ wɔn a ɔde wɔn fii n’asafo no ase no sɛ: “Ɛnyɛ mo na mopaw me, na me na mapaw mo.” (Yohane 15:16) Eyinom na na wobedi wiase nyinaa Paradise a ɛreba wɔ Ahenni aniso ase no ho dawurubɔ adwuma no anim.
Ahenni no Bere a Adu
11. Bere bɛn na na wɔde Mesia Ahenni no besi hɔ?
11 Wɔ Awurade Yesu Kristo din mu no, yɛkɔ so bɔ Yehowa mpae sɛ n’Ahenni no mmra nnɛ. (Mateo 6:9, 10; Yohane 14: 13, 14) Ná wɔde Mesia Ahenni no besi hɔ wɔ “amanaman no bere” no awiei. (Luka 21:24) Saa Amanaman Mmere no baa awiei afe 1914 mu.a
12. Dɛn na esii 1914 mu a na ɛne Yesu nkɔmhyɛ a ɛfa nneɛma a ɛyɛ nwonwa a ɛbɛyɛ ne mmae a aniwa nhu ho sɛnkyerɛnne ho no hyia?
12 Wiase nyinaa ko a edi kan wɔ adesamma abakɔsɛm mu hyɛɛ saa afe no agyirae. Ná eyi ne Yesu nkɔmhyɛ a ɛfa nneɛma a ɛyɛ nwonwa a na ɛbɛyɛ ne mmae wɔ Ahenni tumi mu wɔ asase so ho sɛnkyerɛnne no hyia. N’asuafo bisaa no sɛ: “Ka kyerɛ yɛn, Bere bɛn na eyinom bɛba, na dɛn na ɛbɛyɛ wo mmae ne nneɛma nhyehyɛe no awiei ho sɛnkyerɛnne?” Mmuaema mu no, Yesu kae sɛ: “Ɔman bɛsɔre ɔman so, ne ahenni ahenni so; na ɔkɔm ne asasewosow bɛba mmeaemmeae. Eyinom nyinaa yɛ awoko yaw mfiase. Na wɔbɛka ahenni ho asɛmpa yi wiase nyinaa de adi amanaman nyinaa adanse; ɛno ansa na awiei no bɛba.”—Mateo 24:3, 7, 8, 14, New World Translation; Marko 13:10.
13. (a) Ɔkwan bɛn so na Onyankopɔn Ahenni ho asɛnka no yɛ asɛmpa? (b) Bere tenten bɛn na wɔde abɔ mpae sɛ Onyankopɔn Ahenni mmra, na so n’adansefo a wɔwɔ asase so no abrɛ wɔ mpae yi bɔ mu da?
13 Mprempren wɔreka Yehowa Ahenni ho asɛmpa yi nsase bɛboro 200 so, na wɔrebɔ mmɔden sɛ wɔbɛtrɛw mu akɔ nsasesin afoforo mu. Ɛnyɛ wiase nniso bi a ennya mmae ho asɛm, na mmom ahenni bi a edi tumi mprempren, nea ɛredi tumi dedaw bi de. Wɔde saa Ahenni no sii hɔ wɔ 1914 mu. Esiesiee ɔkwan maa mpae a Yesu kyerɛe bɛboro mfe 1,900 ni no ho mmuae. Wɔabɔ Ahenni no Farebae no saa mpae no fi bere a onii a ɔbɛyɛ saa nniso no Hene no kyerɛɛ n’asuafo sɛ wɔmmɔ ho mpae no. Enti Ahenni no Hyehyɛfo no ate saa abisade no bere tenteenten. Ayɛ no anigye sɛ obetie n’adansefo a wɔwɔ asase so no mpae a wɔabɔ no saa bere no nyinaa mu no, efisɛ ɛdaa no adi sɛ na wokura wɔn gyidi wɔ saa Ahenni no mmae mu no mu. Wɔammrɛ sɛ wɔbɛbɔ ‘Agya a ɔwɔ soro’ no saa mpae no, te sɛ nea abɛyɛ biribi a wɔn ani nnye ho bio.—Mateo 6:9, 10.
14. Dɛn nti na Yehowa Adansefo kɔ so ka Onyankopɔn Ahenni no ho asɛmpa no?
14 Bere a Yehowa Adansefo gye di sɛ wɔde Ahenni no sii hɔ wɔ 1914 mu na wɔbɔ no dawuru no, wɔkɔ so ka Ahenni no ho asɛmpa yi. Wɔyɛ saa efisɛ Ahenni a wɔde asi hɔ no nnya nnii asase so koraa na mmom ama kwan ama wiase nniso horow kɔ so di wɔn tumi wɔ adesamma mmusua nyinaa so. (Romafo 13:1) Enti ɛsɛ sɛ ɛba wɔ ntease nyinaa mu, kyerɛ sɛ kosi sɛ ɛno nkutoo na ɛbɛyɛ nniso a edi asase nyinaa so koraa.—Daniel 2:44.
15. Dɛn na akɔ so fi Pentekoste 33 Y.B. mu a ɛyɛ kɛse sen bere a na wɔsra Israel ahene ngo no?
15 Ɛwom sɛ wɔapaw Yesu sɛ Ahenni no Hene de, nanso ɛnyɛ ne nkutoo na odi tumi. Yehowa Nyankopɔn apaw ne Ba a ɔyɛ ɔdehye no akyidifo 144,000 sɛ wɔnyɛ mfɛfo adedifo wɔ Onyankopɔn Mesia Ahenni no mu. (Daniel 7:27) Sɛnea ɔsɔfo panyin de ngo kronkron sraa Israel ahene no, saa ara na efi Pentekoste 33 Y.B. mu no, Yehowa ama wɔde Ne honhom kronkron asra Yesu Kristo mfɛfo adedifo 144,000 no, na wɔawo wɔn akɔ honhom asetra mu wɔ soro akɔka “ahene mu hene ne awuranom mu awurade” no ho.—Adiyisɛm 19:16; fa toto 1 Ahene 1:39 ho.
“Adam a Odi Akyiri” no Bɛsan de Paradise Asi Hɔ
16. Na Ahenni no tebea te dɛn bere a wɔbɔɔ Yesu asɛndua mu no, nanso dɛn nti na na ɛnyɛ nea ɔyɛ asɛm bi a mfomso wom ho ɔdawurubɔfo?
16 Bere a wɔbɔɔ Yesu asɛndua mu wɔ 33 Y.B. mu no, na ɛte sɛ nea ɛyɛ den sɛ obetumi anya ahenni bi mpo. Nanso wɔ Onyankopɔn Ahenni ho asɛm a na ɔka no mu no, na ɔnyɛ asɛm bi a mfomso wom ho ɔdawurubɔfo. Wɔ n’asɛndua mu bɔ no akyi nnansa no, Ahenni no Farebae no hwɛ hui sɛ Yesu asuafo no remmɔ nniso bi a ɛrentumi mma ho mpae. Yehowa nyan Onii a na obegyina N’ananmu wɔ Ahenni a wɔbɔ ho mpae no mu no na ɔmaa no nkwa a owu nnim.
17, 18. (a) Frɛ a wɔfrɛ Yesu “Adam a odi akyiri” no ho hia dɛn? b) Dɛn na wiase nsɛm a esisi fi 1914 no da no adi?
17 Ná Yesu nim sɛ Paradise a edi kan no Bɔfo no de asɛyɛde bɛto no so ma wayɛ Paradise no foforo na wahwɛ ma nnipa atra wiase nyinaa turo no mu. Yɛkenkan wɔ 1 Korintofo 15:45, 47 sɛ: “Saa ara na wɔakyerɛw sɛ: Adam, onipa a odi kan no, yɛɛ ɔkra teasefo. Adam a odi akyiri no yɛɛ honhom a ɔma nkwa. Onipa a odi kan no fi fam yɛ famni; onipa a otia abien no fi soro.” Adam a ɔto so abien no fi soro na ɔbae na ɔno na Yehowa de no di dwuma ma ɔsan de Paradise si hɔ asase so ha no. Ɛno so na Awurade Yesu gyina ka kyerɛɛ ɔdebɔneyɛfo a ɔwɔ mmɔborohunu no sɛ: “Wobɛka me ho Paradise hɔ” no. (Luka 23:43) Ɛda adi bio wɔ saa nkɔmmɔbɔ yi mu sɛ wɔbɛsan de Paradise asi hɔ wɔ ɔsoro Ahenni a ɛwɔ Yesu Kristo a wɔahyɛ no anuonyam, “Adam a odi akyiri” no nsam no ase.
18 Wiase nsɛm a esisi fi 1914 no ne nkɔm a Yesu hyɛe no hyia na enti ɛkyerɛ sɛ Yesu di tumi fi saa bere no. Nea ɛboro mfe aduɔson mu no, afeha 20 yi awo ntoatoaso no mu nnipa a wɔatra ase fi 1914 no ahu nneɛma a ɛwɔ Yesu nkɔmhyɛ a ɛwɔ Mateo ti 24 no mmamu. Enti, saa bere yi rebɛn n’awiei, na Paradise a wɔbɛsan de asi hɔ asase so nyinaa abɛn.—Mateo 24:32-35; fa toto Dwom 90:10 ho.
Wiase Foforo Bere bi a Ɛyɛ Anigye Da Yɛn Anim Pɛɛ
19, 20. (a) Wɔ Harmagedon akyi no, dɛn mu na Yehowa de n’adɔfo bɛkɔ? (b) Dɛn na ɛho behia sɛ wɔyɛ wɔ Harmagedon akyi bere tiaa bi?
19 Yehowa remmfa n’adɔfo nhyɛn nneɛma nhyehyɛe bi a emu yɛ mfonoe, emu nyɛ anika mu bere a ɔtew n’amansan tumidi ho wɔ ɔkwan a akyinnyegye biara nni ho so wɔ Harmagedon akono akyi no. Adesamma abusua no bere a ɛreba wɔ Mesia Ɔhene Yesu, Onyankopɔn Ba no adedi a edi mũ ase no bɛyɛ anigye kɛse ampa ara. Oo, hwɛ sɛnea nneɛma pii a mfaso wɔ so bɛyɛ nea ɛho hia sɛ wɔyɛ! Wobeyi Yehowa ɔsoro dɔm ne abɔnefo dɔm a wɔaboaboa wɔn ano no ntam ntawntawdi a ɛka wiase nyinaa no mu twã biara nyinaa afi asase no ani. Wɔrennyaw ɛho biribiara.
20 Na akode ahorow a amanaman no begyaw no nso ɛ? Esiane bere tenten a ebegye na wɔde ayi emu nea wotumi hyew no afi hɔ a ɛda adi wɔ sɛnkyerɛnne kwan so no nti, ɛbɛyɛ nea ɛdɔɔso pii. (Hesekiel 39:8-10) Wɔn a wobenya nkwa wɔ Harmagedon no betumi de amanaman no ɔko nneɛma a aka no ayeyɛ nneɛma a mfaso wɔ so.—Yesaia 2:2-4.
21. Nea ɛne wɔn a wonyaa nkwa wɔ Nsuyiri no mu no osuahu di nsɛ no, tebea bɛn na wɔn a wobenya nkwa wɔ Harmagedon no behyia, nanso nsonsonoe titiriw bɛn na ɛwom?
21 Nnɛyi Noa ne n’abusua a wonyaa nkwa anwonwa kwan so wɔ wiase nyinaa Nsuyiri no mu nsɛso a wɔahyira wɔn no bɛba abɛto asase so tebea a ɛte sɛ nea Noa ne n’abusua bɛtoe no. Nanso, Satan Ɔbonsam ne n’adaemone dɔm no renhaw ɔsoro a aniwa nhu hɔ a ɛkata asase so no bio na mmom ɛbɛyɛ nea wɔabɔ wɔn dwumadi ano mfeha ahorow du. (Adiyisɛm 20:1-3) Wɔn a wobenya nkwa wɔ Harmagedon no bɛyɛ adwuma a ɛnna fam a ɛne sɛ wobedi asase a afa “Onyankopɔn, ade nyinaa so tumfoɔ da kɛse” no mu no so, na wɔadi biribiara a efii mu bae a aka wɔ okyinsoromma yi so ho dwuma.—Adiyisɛm 16:14.
22. Wɔn a wobenya nkwa wɔ Harmagedon no bɛyɛ wɔn ade dɛn wɔ Paradise a wɔbɛtrɛw mu wɔ asase so nyinaa adwuma a ɛnna fam no ho?
22 Esiane sɛ saafo yi a wobenya nkwa wɔ Harmagedon ko no mu no nnɔɔso pii nti, awosu nti ebia yɛbɛhwɛ kwan sɛ wɔbɛbɔ hu kɛse bere a wɔde adwuma kɛse a ɛne Paradise a wɔbɛtrɛw mu asase so nyinaa no hyɛ wɔn nsa no. Nanso nea ɛne no bɔ abira no, bere a wɔn ani agye kɛse no, wɔde ahoɔden ne osetie befi ase. Wogye tom koraa sɛ asase yi yɛ Onyankopɔn nan ntiaso sɛnkyerɛnne kwan so, na wofi nokwaredi mu pɛ sɛ asase kurukuruwa yi ankasa yɛ fɛfɛɛfɛ a ɛfata sɛ ɔde ne nan sisi so.
23. Akyigyina bɛn na wɔn a wobenya nkwa wɔ Harmagedon no benya a ɛyɛ awerɛhyem sɛ wɔn adwuma a ɛne sɛ wɔbɛsan de Paradise asi hɔ no bɛyɛ yiye?
23 Ɛyɛ anigye na ɛhyɛ nkuran sɛ wubehu sɛ wɔrennyaw wɔn a wonnya mmoa biara bere a wɔyɛ adwuma a ɛyɛ anigye yi de ma nea wofi ɔsoro ahyɛ a ɛfa asase no ho no nya mmamu no. (Fa toto Yesaia 65:17, 21-24 ho.) Wobenya Onii a ɔhyɛɛ Paradise a wɔasan de asi hɔ ho bɔ na ɔkaa eyi ɛda a ɔforo kɔɔ soro no mmoa kɛse a ɛmma awiei da: “Wɔde soro ne asase so tumi nyinaa ama me.” (Mateo 28:18) Ɔda so ara wɔ saa tumi no, na obetumi ama ne bɔhyɛ a ɛyɛ nwonwa a ɔde maa ɔdebɔneyɛfo a na ɔwɔ mmɔborohunu no abam, sɛnea yebehu wɔ asɛm a edi hɔ no mu no.
[Ase hɔ asɛm]
a Sɛ wopɛ ho nsɛm pii a, hwɛ nhoma “Let Your Kingdom Come” a Watchtower Bible and Tract Society of New York, Inc., tintimii no nkratafa 135-9. Hwɛ Hesekiel 21:27 nso.
Ntĩmu Nsemmisa
◻ Dɛn na Yesu bɔ a ɔhyɛe wɔ Calvary no ma adesamma ne nsɛmmɔnedifo bi nya mu awerɛhyem?
◻ Dɛn ne ade titiriw wɔ ɔkwan a wɔde san kɔ Paradise no a wobue no mu?
◻ Dɛn na Adam a odi kan no antumi anyɛ, nanso dɛn na “Adam a odi akyiri” no bɛyɛ?
◻ Harmagedon akyi no, nneɛma nhyehyɛe bɛn na Yehowa de n’adɔfo bɛhyɛn mu?
[Mfonini wɔ kratafa 13]
Asɛm “Ahenni Horow Nyinaa Bɛba Awiei 1914 Mu” no puei wɔ The World Magazine a ɛbaa August 30, 1914 mu no mu