Gibeonfo​—Wɔhwehwɛɛ Asomdwoe

WƆAHU sɛ atifi hɔ kurow no wɔ faako a na tete Gibeon wɔ, ɛwɔ bɛyɛ kilomita du kwan wɔ Yerusalem kusuu fam.

Ebia wunim sɛ Gibeon begyee din bere a Yosua dii Israel anim kɔɔ Bɔhyɛ Asase no so na wodii Yeriko so nkonim no akyi pɛɛ. Gibeon Kanaanfo no hui sɛ wontumi Israelfo a na ɛda adi pefee sɛ wofi soro boa wɔn no. Na dɛn na ɛsɛ sɛ wɔyɛ? Gibeonfo no faa nnaadaa kwan so somaa ananmusifo a wɔyɛɛ wɔn ho sɛ akwantufo a wofi akyirikyiri asase bi so. Asomdwoe ho mmɔden a wɔbɔe yi yɛɛ yiye, efisɛ Israel ne wɔn yɛɛ apam. Bere a wɔn nnaadaa no daa adi no, Gibeonfo no bɛyɛɛ nnuatwafo ne nsusawfo.

Ɛbɛyɛ sɛ Onyankopɔn ani gyee saa nnipa yi a wɔhwehwɛɛ asomdwoe no ho. Ogyinaa Yosua akyi bere a ɔbɔɔ Gibeonfo no ho ban wɔ bere a ahene baanum bɛtow hyɛɛ wɔn so no mu. Yehowa yɛɛ anwonwade a ɛne sɛ ɔmaa ɛda no yɛɛ tenten ma wɔkoo saa ɔko no.​—Yosua 9:3-27; 10:1-14.

Fam tutufo huu amoa donkudonku anaasɛ asubura a wɔatu wɔ abotan ankasa mu wɔ bepɔw yi so. Na Gibeonfo no betumi asian akɔ mu akɔsaw nsu wɔ asase no mu. So eyi betumi ayɛ “Gibeon ɔtare” a wɔka ho asɛm wɔ 2 Samuel 2:13 no? Wɔn a wotutu fam de hwehwɛ tete nneɛma hui adekora adan nso a wɔayɛ wɔ abotan mu ne nnwinnade a wɔde yɛ bobesa pii. Yiw, ɛte sɛ nea na wɔyɛ bobesa wɔ Gibeon.

Wɔ Dawid bere so no, na nokware Nyankopɔn no ntamadan anaasɛ trabea no wɔ ha. Ɔhene Salomo bɛbɔɔ afɔre ahorow wɔ ha. Yehowa yii ne ho adi kyerɛɛ Salomo wɔ dae mu na ɔde “nyansa ne nhumu koma” ne ahonyade nso hyɛɛ ne bɔ. (1 Ahene 3:4-14; 2 Beresosɛm 1:3) Asɛm a ɛwɔ nsɛmma nhoma yi nkratafa 12-17 no kyerɛ sɛ nnipa a wɔtraa Gibeon ha asefo nyaa hokwan titiriw wɔ Onyankopɔn man mu akyiri yi. So wunim nea ɛyɛe a ɛbaa saa?

[Mfonini Fibea wɔ kratafa 32]

Pictorial Archive (Near Eastern History) Est.