1914 Awo Ntoatoaso No—Dɛn Nti Na Ɛyɛ Titiriw?
“Yɛn akenkanfo nim sɛ mfe dodow bi ni a yɛahwɛ kwan sɛ Bere yi bɛba awiei wɔ ɔhaw bere bɔne bi mu, na yɛhwɛ kwan sɛ ɛde tumi befi ase mpofirim wɔ October, 1914 akyi bere tiaa bi.”—Efi The Watch Tower and Herald of Christ’s Presence, May 15, 1911 de no mu.
EFI 1879 no, na nsɛmma nhoma a wɔfrɛ no The Watch Tower and Herald of Christ’s Presence (wonim no mprempren sɛ Ɔwɛn-Aban Ɛka Yehowa Ahenni Kyerɛ) taa twe adwene si 1914 so sɛ afe a wɔahyɛ no agyirae wɔ Bible nkɔmhyɛ mu. Bere a afe no rebɛn no, wɔkaee akenkanfo sɛ wobetumi ahwɛ “ɔhaw bere bɔne bi” kwan.
Kristofo a wɔde wɔn kɔkɔbɔ yi gyinaa ntease a wɔwɔ wɔ “mmere nson” ne “Amanaman mmere” a wɔaka ho asɛm wɔ Bible mu ho no so no bɔɔ asɛm yi ho dawuru wɔ mmaa nyinaa.a Wɔtee ase sɛ bere yi tenten yɛ mfe 2,520—efii ase wɔ bere a wotuu tete Dawid ahenni a ɛwɔ Yerusalem no gui, na ɛbaa awiei wɔ October 1914 mu.b —Daniel 4:16, 17; Luka 21:24, King James Version.
Wɔ October 2, 1914 mu no, Charles Taze Russell, a saa bere no na ɔne Watch Tower Bible and Tract Society no titrani no de akokoduru bɔɔ amanneɛ sɛ: “Amanaman Mmere no aba awiei; wɔn ahemfo adi wɔn mmere awie.” Hwɛ sɛnea ɛdaa adi sɛ ne nsɛm no yɛ nokware! Wɔ October 1914 mu no, asɛm bi a ɛbɛwosow wiase no kɛse sii wɔ ɔsoro a nnipa ani anhu. Yesu Kristo a ɔne “Dawid ahengua no” daa Ɔdedifo no fii ase dii tumi sɛ Ɔhene wɔ adesamma nyinaa so.—Luka 1:32, 33; Adiyisɛm 11:15.
‘Nanso,’ ebia wubebisa sɛ, ‘sɛ Kristo fii ase dii tumi wɔ 1914 mu a, dɛn nti na asase so nsɛm tebea sɛee koraa no?’ Efisɛ na adesamma tamfo a aniwa ntumi nhu no no da so ara te nkwa mu. Ansa na 1914 reba no, na Satan tumi kɔ soro. Nanso bere a wɔde Onyankopɔn Ahenni sii hɔ wɔ 1914 mu no, saa tebea no sakrae. “Ɔko baa soro.” (Adiyisɛm 12:7) Satan ne n’adaemone dii nkogu na wɔtow wɔn kyenee asase so, ma ɛde ɔhaw kɛse baa adesamma so. Bible no ka siei sɛ: “Asase ne ɛpo nnue, efisɛ Ɔbonsam asian aba mo nkyɛn, na wafa abufuw kɛse, efisɛ onim sɛ ne bere a ɔwɔ yɛ tiaa.”—Adiyisɛm 12:12.
Wɔ afeha a edi kan Y.B. mu no, Yesu kae sɛ sɛnkyerɛnne a wotumi hu bi na ɛbɛhyɛ ne ba a waba sɛ asase so Ɔhene foforo a aniwa ntumi nhu no no agyirae. Wobisaa no sɛ: “Dɛn na ɛbɛyɛ wo ba a waba ne nneɛma nhyehyɛe no awiei ho sɛnkyerɛnne?” Obuae dɛn? “Ɔman bɛsɔre ɔman so ne ahenni ahenni so, na ɔkɔm ne asasewosow bɛba mmeaemmeae. Eyinom nyinaa yɛ awoko yaw mfiase.”—Mateo 24:3, 7, 8, New World Translation.
Enti, aduankɔm a ɛyɛ hu bae wɔ ɔko a esii wɔ 1914 mu no mu, afisɛ wogyaee afuwyɛ bɛyɛ mfe anan ne akyi. Na ‘asasewosow a ɛbɛba mmeaemmeae’ no nso ɛ? Wɔ mfe du a edii 1914 akyi bae no mu no, asasewosow a ɛsɛe ade pii bɛyɛ du kunkum nnipa 350,000. (Hwɛ adaka no mu.) Nokwarem no, 1914 awo ntoatoaso no huu “awoko yaw mfiase.” Na efi saa bere no, awoko yaw akɔ so aba atoatoa so sɛ atoyerɛnkyɛm ahorow a emfi onipa, ɔkɔm, ne ɔko ahorow pii.
Nanso, Onyankopɔn Ahenni a wɔde sii hɔ wɔ 1914 mu ho asɛm no yɛ asɛmpa efisɛ saa Ahenni no begye asase yi afi ɔsɛe mu. Ɔkwan bɛn so? Ebeyi atoro, nyaatwom ɔsom ahorow, nniso horow a aporɔw, ne Satan nkɛntɛnso bɔne nyinaa afi ho. (Daniel 2:44; Romafo 16:20; Adiyisɛm 11:18; 18:4-8, 24) Bio nso, ɛde wiase foforo a “trenee te mu” bɛba.—2 Petro 3:13.
Wiase Ko I akyi pɛɛ no, Bible Asuafo anokwafo, sɛnea na wɔfrɛ Yehowa Adansefo saa bere no, fii ase huu hokwan a wɔwɔ wɔ Yesu ba sɛ Ɔhene no ho sɛnkyerɛnne no fã foforo bi ho. Yesu Kristo ka siei sɛ: “Wɔbɛka ahenni no ho asɛmpa yi wiase nyinaa de adi amanaman nyinaa adanse; ɛno ansa na awiei no bɛba.”—Mateo 24:14.
Yehowa Adansefo a na wɔyɛ kuw ketewaa bi wɔ 1919 mu no akɔ so atrɛw “asɛmpa yi” mu a wonnyae. Nea afi mu aba ne sɛ wɔreboaboa nnipa ɔpepem pii a wofi nsase 200 ne akyi mu no ano mprempren sɛ Onyankopɔn Ahenni no nkoa. Na nhyira horow bɛn ara na ɛretwɛn saa nkoa yi! Ahenni no beyi ɔko, ɔkɔm, nsɛmmɔnedi, ne nhyɛso afi hɔ. Ebedi ɔyare ne owu so nkonim mpo!—Dwom 46:9; 72:7, 12-14, 16; Mmebusɛm 2:21, 22; Adiyisɛm 21:3, 4.
Ansa na 1914 awo ntoatoaso no betwam no, na Ahenni asɛmpaka adwuma no atumi adi n’atirimpɔw ho dwuma. Yesu hyɛɛ nkɔm sɛ: “Ɛno na ahohiahia kɛse a efi wiase asefi de besi nnɛ ebi mmae da nanso ɛremma da bɛba. Na sɛ wɔantwa nna no so a, anka wɔrennye ɔhonam biara; nanso wɔn a wɔapaw wɔn no nti wobetwa nna no so.”—Mateo 24:21, 22.
Nni mfomso a awo ntoatoaso a ɛbae ansa na 1914 reba no dii no bi. Nneɛma renkɔ so nyɛ sɛnea ɛte mprempren no. Nsakrae a eye nwonwa da yɛn anim. Nanso wɔn a wɔyɛ wɔn ade nyansam no betumi ahwɛ nneɛma a ɛyɛ anigye kwan.
Ɛnde, tie odiyifo a ɔtraa ase tete no nsɛm a edi so yi: “Monhwehwɛ [Yehowa], asase sofo . . . nyinaa! Monhwehwɛ trenee, monhwehwɛ ahobrɛase; ebia wɔbɛkora mo so, [Yehowa] abufuw da no.” (Sefania 2:3) Ɔkwan bɛn so na yɛde afotu yi bedi dwuma? Nsɛm a edidi so no bɛboa yɛn ma yɛabua saa asemmisa no.
[Ase hɔ asɛm]
a Kratafa a asɛmti no pue wom wɔ Scenario of the Photo-Drama of Creation, a wɔyɛɛ no 1914 mu no.
b Sɛ wopɛ ho nsɛm pii a, hwɛ nhoma Wubetumi Atra Ase Daa wɔ Paradise wɔ Asase So a Watchtower Bible and Tract Society of New York, Inc yɛe no ti 16.
[Nsɛm a wɔahyehyɛ wɔ kratafa 7]
Asasewosow Ahorow Wɔ Mfe Du A Edii 1914 Akyi Bae No Mu
Bere: Faako a Esii: Ekum Nnipa:
January 13, 1915 Avezzano, Italy 32,600
January 21, 1917 Bali, Indonesia 15,000
February 13, 1918 Kwangtung Province, China 10,000
October 11, 1918 Puerto Rico (western) 116
January 3, 1920 Veracruz, Mexico 648
September 7, 1920 Reggio di Calabria, Italy 1,400
December 16, 1920 Ningsia Province, China 200,000
March 24, 1923 Szechwan Province, China 5,000
May 26, 1923 Iran (northeastern) 2,200
September 1, 1923 Tokyo-Yokohama, Japan 99,300
Efi akontaabu pon “Wiase Asasewosow Akɛse” a ɛwɔ nhoma Terra Non Firma, a James M. Gere ne Haresh C. Shah yɛe no mu.