So Kristofo a wodi kan no de Onyankopɔn din dii dwuma?

ONYANKOPƆN din pue mpɛn mpempem pii wo Hebri Kyerɛwnsɛm no mu, na wɔde anom nnyigyei anan יהוה (YH’WH, Tetragrammaton no) na egyina hɔ ma no. Nneɛma a wɔatutu fam ahu kyerɛ sɛ na wɔde din no di dwuma yiye wɔ Israel ansa na wɔrekɔ nkoasom mu, ansa na 607 A.Y.B. redu, na epuee mpɛn pii wɔ Bible nhoma Esra, Nehemia, Daniel, ne Malaki a wɔkyerɛwee wɔ nkoasom no akyi no mu. Nanso bere a Mesia no ba rebɛn nkakrankakra no, Yudafo fi gyidihunu mu twentwɛn wɔn nan ase sɛ wɔde din no bedi dwuma.

So Yesu asuafo no de Onyankopɔn din (a wɔtaa kyerɛw no Twi mu sɛ “Yehowa,” anaa “Yahweh”) no dii dwuma? Adanse no kyerɛ saa. Yesu kyerɛɛ n’asuafo no sɛ wɔmmɔ mpae sɛ: “Wo din ho ntew.” (Mateo 6:9) Na wɔ n’asase so som adwuma no awiei no, n’ankasa bɔɔ ne soro Agya no mpae sɔ: “Mayi wo din adi makyerɛ nnipa a wode wɔn fi wiase ama me no.” (Yohane 17:6) Afei nso, na Onyankopɔn din a wɔakyerɛw no Hebri Tetragrammaton mu no wɔ Septuagint, Hebri Kyerɛwnsɛm a wɔakyerɛ ase kɔ Hela kasa mu a na Yesu asuafo no de di dwuma no mu nea akyɛ paa no mu.

Na Nsɛmpa no ne Kristofo Hela Kyerɛwnsɛm no (“Apam Foforo” no) a aka no nso ɛ? Woasusuw ho sɛ esiane sɛ Onyankopɔn din puee wɔ Septuagint no mu nti, ɛbɛyɛ sɛ epuee wɔ Kristofo Hela Kyerɛwnsɛm a edi kan yi mu nso ​—anyɛ yiye koraa no wɔ faako a wɔfaa Septuagint mu asɛm kae no. Enti, edin Yehowa no pue bɛboro mpɛn 200 wɔ New World Translation of the Christian Greek Scriptures no mu. Ebinom akasa atia eyi sɛ ɛmfata. Nanso, ɛte sɛ nea ade foforo a wɔnhwɛ kwan foa New World Translation so: Babilonfo Talmud no.

Saa Yudafo nyamesom nhoma yi fã a edi kan no asɛmti ne Shabbath (Homeda), na mmara pii a ɛkyerɛ nea ɛsɛ sɛ wɔyɛ Homeda wom. Nea wosusuw ho wɔ ɔfã biako mu ne sɛ́ ebia eye sɛ obi beyi Bible nkyerɛwee afi ogya mu Homeda anaa enye, na afei asɛm a edi so yi pue: “Wɔkaa wɔ kyerɛw no mu sɛ: Mmeae a nsɛm biara nni hɔ [gil·yoh·nimʹ] ne Minimfo Nhoma ahorow no de, ɛnsɛ sɛ yeyi fi ogya mu. R. Jose kae sɛ: Wɔ nna a ɛnyɛ home da no, ɛsɛ sɛ onii no twa Edin Kronkron no a ɛwom no, de sie, na ɔhyew nea aka no. R. Tarfon kae sɛ: Sɛ me nsa ka na sɛ manhyew ɛne Edin Kronkron a ɛwom no a, nnome a ɛbɛma m’ankasa masie me babarima mmra me so”​—Ɔbenfo H. Freedman na ɔkyerɛɛ ase.

Henanom ne mi·nimʹfo no? Asɛmfua no kyerɛ “fekusɛmfo” na ebetumi agyina hɔ ama Sadukifo anaa Samariafo. Nanso sɛnea Ɔbenfo Freedman kyerɛ no, ɛda adi kɛse sɛ saa asɛm yi fa Yudafo Kristofo ho. Enti sɛnea Ɔbenfo Freedman kyerɛ no, na dɛn ne gil·yoh·nimʹ, a ɔkyerɛɛ ase sɛ “mmeae a nsɛm biara nni hɔ” no? Ebetumi akyerɛ nneɛma abien. Ná ebetumi ayɛ mmobɔwee no nkyɛn a nsɛm biara nni anaase mmobɔwee a nsɛm biara nni so mpo. Anaa​—wɔ asɛmfua no nkyerɛase a ɛda animtiaabu adi mu no​—ebetumi agyina hɔ ama mi·nimʹfo no nkyerɛwee, te sɛ nea wɔrekyerɛ sɛ saa nkyerɛwee no yɛ hunu te sɛ mmobɔwee a nsɛm biara nni so ara pɛ no. Wɔ nsɛm asekyerɛ nhoma ahorow mu no, wɔkyerɛ akyiri yi ntease no ase sɛ “Nsɛmpa.” Sɛnea ɛne eyi hyia no, asɛm a epue wɔ Talmud no mu ansa na nea ɛwɔ atifi hɔ no aba no kenkan sɛ: “Minim Nhoma ahorow no te sɛ biribi a nsɛm biara nni so [gil·yoh·nim’].”

Saa ara na wɔ nhoma Who Was a Jew? a Lawrence H. Shiffman kyerɛwee mu no, wɔkyerɛ Talmud mu asɛm a wɔafa aka wɔ atifi hɔ no ase sɛɛ: “Ɛnsɛ sɛ yeyi Nsɛmpa no ne minimfo (‘awaefo’) no nhoma ahorow no fi ogya mu (Homeda). Mmom no, ɛsɛ sɛ yɛhyew ɛne ne Tetragrammata no. Rabi Yose Ha-Gelili se: Wɔ dapɛn no mu no, ɛsɛ sɛ wotwa wɔn Tetragrammata no de sie na wɔhyew nkae no. Rabi Tarfon kae sɛ: Nnome a ɛbɛma m’ankasa masie me mma mmra me so! Sɛ me nsa ka (saa nhoma yi) a, anka mɛhyew ɛne ne Tetragrammata no.” Ɔbenfo Schiffman kɔ so kyerɛw sɛ mi·nimʹ a wɔka wɔn ho asɛm wɔ ha no yɛ Yudafo Kristofo.

So saa ɔfã a ɛwɔ Talmud no mu no reka Yudafo Kristofo a wodi kan no ho asɛm ankasa? Sɛ ɛte saa a, ɛnde ɛyɛ adanse kɛse a ɛkyerɛ sɛ Kristofo no kyerɛw Onyankopɔn din, Tetragrammaton no wɔ wɔn Nsɛmpa no ne wɔn nkyerɛwee mu. Na ɛda adi kɛse sɛ Talmud no reka Yudafo Kristofo ho asɛm wɔ ha. Nhomanim mu adanse a ɛfoa adwene a ɛte saa so wɔ hɔ, na wɔ Talmud no mu no, nsɛm a ɛka ho no nso foa so. Ɔfã a ɛtoa atifi hɔ asɛm a wɔfa fii Shabbath mu so no ka asɛm bi a ɛfa Gamaliel ne Kristoni ɔtemmufo bi ho, na ɔtwe adwene si Yesu Bepɔw so Ɔkasa no so.

Ɛyɛ akyiri yi ara, bere a Kristosom mu awaefo man fii Yesu mfitiase nkyerɛkyerɛ ho no, na wɔn a wɔkyerɛ sɛ wɔyɛ Kristofo amfa Onyankopɔn din no anni dwuma bio, na woyi fii Septuagint no bi mpo ne Nsɛmpa no ne Bible nhoma afoforo mu.

[Mfonini wɔ kratafa 31]

Wɔ Yesu bere so no Onyankopɔn din puei wɔ “Septuagint” no mu

[Mfonini Fibea]

Israel Antiquities Authority