Yebuu Yɛn Som Adwuma Sɛ Ehia Titiriw

SƐNEA HANS VAN VUURE KA KYERƐE

Anɔpa bi wɔ 1962 mu no, me ne Paul Kushnir, Ɔwɛn Aban Asafo no baa dwumadibea a ɛwɔ Netherlands no sohwɛfo hyiae wɔ Rotterdam ɔhyɛn gyinabea mantam hɔ. Bere a yɛte ɔpon ho wɔ beae bi a wɔtɔn nnɔkɔnnɔkɔwade a ɛhɔ kanea nhyerɛn pii no, ɔkae sɛ: “Hans, wunim sɛ sɛ wopene dwumadi yi so a, wo ne wo yere benya tekiti a mode bɛkɔ faako a wɔde mo rekɔ no, na morennya nea mode bɛsan aba?”

“YIW, na migye di yiye sɛ Susie nso bepene so.” “Ɛnde, wo ne Susie nsusuw ho. Sɛ moma mihu mo gyinaesi no ntɛm a, eye paa.”

Ade kyee anɔpa no, yɛmaa no mmuae: “Yɛbɛkɔ.” Enti wɔ December 26, 1962 no, yɛbemmam yɛn abusuafo ne yɛn nnamfo ne wɔn dii nkra wɔ Amsterdam Schiphol wimhyɛn gyinaebea a na sukyerɛmma atɔ wɔ hɔ no, na yɛtraa wimhyɛn mu kɔɔ asasesin a na asɛmpatrɛwfo biara nyɛɛ mu adwuma da​—Netherlands New Guinea (mprempren West Irian, Indonesia)​—Papuafo asase so.

So na yɛn adwene mu yɛ yɛn nãã sɛ yebegye asɛyɛde dennen yi atom? Ɛnte saa ankasa. Ná yefi koma nyinaa mu ahyira yɛn nkwa so sɛ yɛbɛyɛ Onyankopɔn apɛde, na na yegye di sɛ ɔbɛboa yɛn. Sɛ yebu kɔmpɔ hwɛ yɛn akyi a, yetumi hu sɛ Yehowa a yɛde yɛn ho too no so no nyɛɛ kwa da. Nanso ansa na mɛka nea esii wɔ Indonesia no, momma menka yɛn mmofraberem nsɛm nkyerɛ mo.

Ɔko Bere mu Ntetee

Bere a Ɔdansefo kokodurufo Arthur Winkler bɛsraa m’abusua no, na madi mfe du pɛ. M’awofo ho dwiriw wɔn bere a wohuu nea Bible no ka wɔ Kristoman atoro nkyerɛkyerɛ no ho no. Esiane sɛ na Nasi Germanfo abɛfa Netherlands adi so saa bere no na wɔretaa Yehowa Adansefo nti, na ɛsɛ sɛ m’awofo si gyinae sɛ ebia wɔne ahyehyɛde a wɔabara bɛbɔ anaa. Wosii gyinae sɛ wɔbɛyɛ saa.

Ɛno akyi no, akokoduru a na me maame wɔ ne sɛnea na wasiesie ne ho sɛ ɔde n’ahofadi ne ne nkwa mpo bɛto esiane mu no kaa me koma. Da bi ɔde ne sakre twaa kilomita 11 na ɔkɔtwɛn wɔ sum mu bere a na okura bɔtɔ bi a Bible nkratawa ayɛ mu mã. Bere soe sɛ wofi ɔsatu titiriw bi ase no, ɔde ne sakre no tuu mmirika sɛnea obetumi biara, na oyiyii nkratawa totow guu akwan no mu. Obi a ɔde sakre di n’akyi besianee ne ho de ahometew teeɛm sɛ: “Awuraa, awuraa, wo nneɛma refifi gu fam!” Bere a Maame kaa saa asɛm yi no, ɛyɛɛ yɛn serew yiye!”

Ná minnyin koraa, nanso na minim nea mepɛ sɛ mede me nkwa yɛ. Wɔ adesua bi a yɛkɔɔ wɔ 1942 mu ase no, bere a adesua sohwɛfo no bisae sɛ, “Hena na ɔpɛ sɛ wɔbɔ no asu wɔ bere a edi hɔ no mu?” no, memaa me nsa so. M’awofo a na ɛhaw wɔn no hwɛɛ wɔn ho wɔn ho anim, na na wonnye nni sɛ mete nea saa gyinaesi no kyerɛ ase. Nanso ɛwom sɛ na madi mfe 12 pɛ de, nanso na minim nea ahosohyira ma Onyankopɔn no kyerɛ.

Ná asɛm a yɛka wɔ afie afie bere a na Nasifo rehwehwɛ yɛn akyere yɛn no gye anifere. Ná wɔ nna a Nasifo akyidifo de nkrataa bobɔ wɔn mfɛnsere ho no, mede sakre kyinkyin kyerɛw wɔn address ahorow to hɔ sɛnea ɛbɛyɛ a yɛrenkɔ wɔn a wobetumi ama wɔakyere yɛn afie. Bere bi, ɔbarima bi huu me na ɔteɛɛm sɛ: “Mo, me ba. Kyerɛw wɔn din​—wɔn nyinaa!” Ná me ho pere me sɛ mɛyɛ saa nanso ɛda adi sɛ na menyɛ anifere sɛnea ɛsɛ! Bere a ɔko no baa awiei wɔ 1945 mu no, yedii ahurusi wɔ ahofadi a na yebenya de aka asɛm no ho.

M’asetram Dwumadi Mfiase

Wɔ November 1, 1948, bere a na mawie sukuu no, me nsa kaa me bere nyinaa asɛnka dwumadi a edi kan sɛ ɔkwampaefo. Ɔsram biako akyi no, Onua Winkler bɛsraa abusua a na me ne wɔn te no. Ɛbɛyɛ sɛ ɔbɛhwɛɛ sɛnea mete, efisɛ ɛno akyi bere tiaa bi no wɔtoo nsa frɛɛ me sɛ memmɛyɛ adwuma wɔ Asafo ti no baa dwumadibea a ɛwɔ Amsterdam no. Akyiri yi, wɔkaa sɛ menkɔsrasra Yehowa Adansefo asafo ahorow sɛ ɔmansin sohwɛfo. Afei wɔ 1952 twabere mu no, wɔtoo nsa frɛɛ me sɛ menkɔ Ɔwɛn Aban Gilead Bible Sukuu no adesuakuw a ɛto so 21 no bi wɔ New York nkogye asɛmpatrɛw ho ntetee. Enti, wɔ 1952 awiei no, nnipa baawotwe a na yefi Netherlands faa po so hyɛn a wɔfrɛ no Nieuw Amsterdam kɔɔ Amerika.

Bere a adesua no reba n’awiei no, Maxwell Friend a ɔyɛ akyerɛkyerɛfo no biako kae sɛ: “Mo werɛ befi nneɛma a moasua wɔ ha no mu dodow no ara, nanso yegye di sɛ mobɛkae nneɛma abiesa: gyidi, anidaso, ne ɔdɔ.” Nea ɛtraa m’adwene ne me koma mu bio ne kae a na mekae ma ɛyɛ me anigye sɛ Yehowa ahyehyɛde no bu ɔsom adwuma no sɛ ehia titiriw.

Ɛno akyi no, mihyiaa huammɔdi kɛse bi. Wɔsan maa wɔn a wofi Netherland bae no fã​—a ne meka ho​—kɔyɛɛ adwuma wɔ Netherlands. Ɛwom sɛ na mete huammɔdi nka de, nanso manyɛ basaa. Nea na mempɛ sɛ ɛba ara ne sɛ mɛtwɛn mfe 40 te sɛ tete Mose, ansa na wɔama me dwumadi wɔ amannɔne asase so.​—Asomafo no Nnwuma 7:23-30.

Ɔyɔnko Boafo a Ɔsom Bo

Bere a Fritz Hartstang a ɔyɛ m’adamfo a ɔte sɛ agya no huu m’aware ho nhyehyɛe no, ɔkae sɛ: “Nea woanya no no yɛ paa.” Ná Susie papa, Casey Stoové, edi akoten wɔ Nasifo nniso ho ɔsɔretia no mu wɔ Wiase Ko II no mu. Nanso bere a Adansefo no baa ne nkyɛn wɔ 1946 mu no, ogyee Bible nokware ahorow toom ntɛm. Ankyɛ na wɔbɔɔ ɔne ne mma baasia no mu baasa​—Susie, Marian, ne Kenneth​—asu. Wɔ May 1, 1947 no, saa mmofra yi nyinaa fii bere nyinaa som adwuma no ase sɛ akwampaefo. Casey tɔn n’adwuma 1948, na ɔno nso fii akwampae adwuma ase. Akyiri yi ɔkae sɛ: “M’ani gyee saa bere no sen bere biara wɔ m’asetra mu!”

Mihuu Susie 1949, bere a wɔtoo nsa frɛɛ no sɛ ɔmmɛyɛ adwuma wɔ Amsterdam baa dwumadibea hɔ no. Nanso, afe a edi hɔ no, ɔne ne nuabea Marian fii hɔ kɔɔ Gilead adesua kuw a ɛto so 16 no bi, na wɔde po so hyɛn kɔɔ faako a wɔrekɔyɛ asɛmpatrɛw adwuma no​—Indonesia. Wɔ February 1957, bere a Susie de mfe anum ayɛ asɛmpatrɛw adwuma wɔ hɔ akyi no, ɔsan baa Netherlands bɛwaree me. Saa bere no na mesom sɛ ɔmansin sohwɛfo, na wada ɔpɛ a ɔwɔ sɛ n’ankasa de nneɛma bɛbɔ afɔre ama Ahenni som adwuma adi mpɛn pii wɔ yɛn aware mfe nyinaa mu.

Wɔ yɛn ayeforohyia no akyi no, yɛkɔɔ so kɔsrasraa asafo ahorow a ɛwɔ Netherlands mmeae ahorow no. Asɛmpatrɛw adwuma a Susie yɛe wɔ baabi a ɛhɔ adwumayɛ yɛ den no siesiee no yiye maa akwan a yɛde sakre twa kɔɔ asafo ahorow mu no. Ɛyɛ bere a yɛwɔ ɔmansin adwuma no mu wɔ 1962 mu na Onua Kushnir bɛsraa me wɔ Rotterdam, na ɔtoo nsa frɛɛ yɛn sɛ yentu mmra West Irian, Indonesia.

Asɛmpatrɛw Adwuma wɔ Indonesia

Yekoduu Manokwari kurow no mu​—wiase no fã a ɛyɛ soronko koraa no! Ná nnyigyei a ɛwɔ kwae mu anadwo a ɛyɛ hu, ɔhyew, ne mfutuma, wɔ hɔ. Afei nso na Papuafo a wofi kwae mu a wɔbobɔ danta, kurakura nkrante, na wɔpɛ sɛ wodi yɛn akyi pɛɛ bɔ mmɔden sɛ wobeso yɛn honam kɔkɔɔ no mu wɔ hɔ​—na na ɛyɛ den sɛ eyi nyinaa bɛkokwaw yɛn.

Yeduu hɔ akyi adapɛn kakraa bi no, asɔfo kenkan krataa bi wɔ wɔn asɔre asɛnka agua so de bɔɔ nkurɔfo kɔkɔ wɔ Yehowa Adansefo ho, na wɔkyekyɛɛ bi maa obiara a ɔwɔ hɔ. Radio dwumadi a ɛwɔ hɔ no mpo bɔɔ krataa no dawuru. Afei asɔfo baasa baa yɛn nkyɛn na wɔkae sɛ yɛnkɔ kwaem nkɔyɛ adwuma wɔ wɔn a wɔfrɛ wɔn “abosonsomfo” no mu. Papuafo polisini panyin bi nso hyɛɛ yɛn sɛ yemfi hɔ, na polisifo a wotie nsɛm ka kyerɛ aban no mu biako ka kyerɛɛ yɛn sɛ wɔresusuw ho sɛ wobekum yɛn.

Nanso, ɛnyɛ obiara na ɔsɔre tiaa yɛn. Papuafo ɔmanyɛfo bi a ofi Netherland a na ɔrebɛkɔ hɔ no de yɛn kyerɛɛ Papuafo adikuro pii. Ɔka kyerɛɛ wɔn sɛ: “Yehowa Adansefo de Kristosom a ɛyɛ sen nea munim no bɛba. Enti, monnye wɔn fɛw so.”

Akyiri yi, aban panyin bi kɔɔ Susie nkyɛn wɔ abɔnten na ɔkaa no bɔkɔɔ sɛ: “Wɔabɔ yɛn amanneɛ sɛ moafi adwuma foforo bi ase wɔ ha, na ɛno nti yentumi mma mo ntra ha. Nanso, ɛɛ, . . . sɛ anka mowɔ asɔre a.” Ɔkyerɛɛ yɛn biribi! Yɛyɛɛ ntɛm bubuu yɛn fie hɔ afasu no, hyehyɛɛ nkongua, de ɔpon a wogyina ho ma ɔkasa sii hɔ, na yɛkyerɛw bɔɔ anim sɛ “Ahenni Asa.” Afei yɛtoo nsa frɛɛ aban panyin no sɛ ɔmmɛsra yɛn. Ɔbɔɔ ne ti nko, serewee, na ɔde ne nsatea bobɔɔ ne ti ho, te sɛ nea ɔreka sɛ, ‘Munim nyansa, munim nyansa.’

Yɛkɔɔ hɔ akyi afe ne fã, wɔ June 26, 1964 no, wɔbɔɔ yɛn Bible asuafo a wɔyɛ Papuafo 12 a wodi kan asu. Ankyɛ na wɔbɔɔ afoforo 10 nso asu, na na nnipa bɛyɛ 40 na wɔba yɛn nhyiam horow. Wɔde Indonesia akwampaefo baanu baa hɔ bɛboaa yɛn. Bere a Manokwari asafo no ase timii no, Asafo ti no baa dwumadibea a ɛwɔ Indonesia no maa yɛn asɛnka dwumadi foforo wɔ December 1964.

Ansa na yɛrekɔ no, ɔpanyin a ɔhwɛ aban dwumadibea a ɛhwɛ ma wɔde nsɛm to gua so no ne yɛn kasaa wɔ kokoam sɛ: “Ɛyɛ me yaw sɛ morekɔ. Dapɛn biara asɔfo no pa me kyɛw sɛ memma mo nkɔ efisɛ moresesaw wɔn aba. Nanso meka kyerɛɛ wɔn sɛ: ‘Dabi, mmom no, wɔrema mo nnua asow aba pii.’” Ɔde kaa ho sɛ: “Baabiara a mobɛkɔ no, monyere mo ho. Mubedi nkonim!”

Wɔ Ɔman Anidan Bi Mu

September 1965 anadwo bi, bere a yɛresom wɔ ahenkurow a ɛne Djakarta no, Komunisfo anidanfo kunkum asraafo mpanyimfo pii, de ogya totoo Djakarta mmeae ahorow, na wofii ase dii aperepere wɔ ɔman no nyinaa mu, na awiei koraa no, wotuu ɔman no sodifo, Sukarno. Nnipa bɛyɛ 400,000 hweree wɔn nkwa!

Da bi na yɛreka asɛm bere a na wɔretoto atuo na wɔrehyew nneɛma wɔ ɔkwan a ɛwɔ yɛn akyi no so. Da a edi hɔ no, yɛtee sɛ asraafo no rebɛsɛe Komunisfo dan bi. Ofiwuranom bɔɔ hu bere a yɛkɔɔ wɔn nkyɛn no, nanso bere a wɔtee yɛn Bible nkrasɛm no, wɔn koma tɔɔ wɔn yam na wɔmaa yɛbaa wɔn afie. Ná wɔn nkyɛn a yɛwɔ no ma wɔte ahobammɔ nka. Saa bere no maa yɛn nyinaa suae sɛ yɛde yɛn ho bɛto Yehowa so na yɛakari pɛ wɔ tebea bɔne mu.

Yedi Ɔsɔretia Foforo So

Bere a 1966 rekɔ n’awiei no, yetu kɔɔ Ambon kurow a ɛwɔ Molucca kesee fam nsupɔw fɛfɛ no so mu. Yenyaa ɛhɔfo a wɔwɔ adamfofa su na wɔpɛ nnipa no pii ma wɔkyerɛɛ honhom fam nneɛma ho anigye. Yɛn asafo ketewa no nyaa nkɔanim ntɛm, na na nnipa bɛyɛ ɔha na wɔba nhyiam horow no. Enti Kristoman asɔre mpanyimfo kɔɔ Nyamesom ho Nsɛm Dwumadibea hɔ kɔhyɛɛ ɛhɔ panyin no sɛ wɔmpam yɛn mfi Ambon. Nanso wohuu Ɔwɛn Aban Asafo no nhoma ahorow sɛ ɛdeda ɔpanyin no pon so a ɔmfa nsiei! Bere a wɔantumi annan ɔpanyin no ti no, wokohuu mpanyimfo a wɔwɔ Asoɛe a Ɛhwɛ Nyamesom ho nsɛm so wɔ Djakarta, a ɛnyɛ sɛ na wɔhwehwɛ sɛ wɔpam yɛn fi Ambon nko na mmom Indonesia man no mu.

Saa bere no de ɛte sɛ nea wodii nkonim, efisɛ wɔhyɛe sɛ wɔbɛpam yɛn February 1968. Nanso, yɛn nuanom Kristofo a wɔwɔ Djakarta no kohuu Nkramofo panyin bi a ɔwɔ Asoeɛ a Ɛhwɛ Nyamesom ho nsɛm so hɔ, na ɔboa maa wɔsakraa gyinaesi no. Afei nso, wɔsakraa nhyehyɛe bi a na ɛwɔ hɔ, na wɔmaa kwan maa asɛmpatrɛwfo afoforo baa hɔ.

Enti, wɔ mfe du a edi hɔ mu no, yɛne asɛmpatrɛwfo a wofi Australia, Austria, Germany, Philippines, Sweden, ne United States yɛɛ adwuma wɔ Sumatra kusuu fam, faako a mmepɔw, kwae, ne atare a ɛyɛ fɛ wɔ no. Asɛnka adwuma no nyaa nkɔso, titiriw wɔ nnipa a wɔdɔɔso wɔ hɔ, a wɔne Batakfo no mu.

Nanso, awiei koraa no, nyamesom mu asotufo tumi ma wɔbaraa yɛn asɛnka adwuma no December 1976, na afe a edi hɔ no, asɛmpatrɛwfo no dodow no ara kɔyɛɛ adwuma wɔ aman afoforo so. Awiei koraa no, wɔ 1979 mu no, na ɛsɛ sɛ yɛn nso yɛkɔ.

Yɛkɔ Amerika Kesee Fam

Saa bere no na yɛadi bɛyɛ mfe 50, na na yentumi nhu sɛ ebia yebetumi ayɛ nsakrae akɔ ɔman foforo so a. Susie bisaa me sɛ: “Yennye dwumadi foforo anaasɛ yɛntra faako?”

Mibuae se: “Susie, baabiara a Yehowa too nsa frɛɛ yɛn sɛ yɛnkɔ no, ɔhwɛɛ yɛn so. Hena na onim nhyira afoforo a ɛbɛba daakye?” Enti, yɛkɔɔ Amerika Kesee Fam ɔman Suriname mu kofii yɛn dwumadi foforo no ase. Anni asram abien na yefii akwantu adwuma no ase bio na ankyɛ na ɛkokwaw yɛn.

Sɛ me ne Susie bu kɔmpɔ hwɛ bɛboro mfe 45 a yɛde ayɛ bere nyinaa ɔsom adwuma no a, yehu sɛnea yɛn awofo mmoa ama yɛatumi akɔ so wɔ asɛmpatrɛw adwuma no mu. Bere a mfe asia akyi no mesan huu m’awofo wɔ 1969 mu no, me papa frɛɛ me gyinaa nkyɛn na ɔkae sɛ: “Sɛ ɛba sɛ wo maame di kan wu a, ɛho nhia sɛ woba fie. Kɔ so yɛ w’adwuma no. Mɛbɔ me ho mmɔden. Nanso sɛ midi kan wu a, ɛnde ɛsɛ sɛ wubisa wo maame nea ɔbɛka wɔ ho.” Maame kaa saa ara.

Ná Susie awofo wɔ ayamyɛ su a ɛte saa ara. Mmere bi, edii mfe 17 na Susie nhuu wɔn, nanso wɔankyerɛw abasamtu asɛm biara ammerɛ no. Nokwarem no, sɛ na obiara nni hɔ a ɔbɛboa yɛn awofo a, anka yebɛsan akɔ fie. Asɛm no ne sɛ, na asɛmpatrɛw adwuma no som bo saa ara ma yɛn awofo, na na wobu wɔn som adwuma sɛ nea ehia titiriw te sɛ nea na wɔde adua yɛn koma mu no ara.​—Fe toto 1 Samuel 1:26-28 ho.

Yɛanya nkuranhyɛ afi nkurɔfo a wɔkyerɛw yɛn nkrataa daa nso ho. Wɔn mu dodow bi wɔ hɔ a ɔsram biako mpo antwam a wɔankyerɛw yɛn wɔ bɛboro mfe 30 a yɛde som sɛ asɛmpatrɛwfo no mu! Nanso, nea ɛsen biara no, yɛkae yɛn Agya dɔfo, Yehowa, a onim ɔkwan a ɔfa so wowaw ne nkoa wɔ asase so no. Enti, bere a yɛrebɛn nneɛma a yɛrehwɛ kwan mmamu no, me ne Susie pɛ sɛ yɛma ‘Yehowa da no ba no tra yɛn adwene mu yiye’ denam Yehowa som a yɛbɛkɔ so abu no sɛ nea ehia titiriw no so.​—2 Petro 3:12.

[Mfonini wɔ kratafa 26]

Yɛwaree 1957

[Mfonini wɔ kratafa 29]

Anigye bɛn ara ni​—mmofra baasia yɛ akwampaefo!