Ɔko A Ɛsɛee Afeha A Ɛto So 19 No

1914

BERE a ɔreka mfirihyia apem foforo no ho asɛm no, Charley Reese, atesɛm krataa The Orlando Sentinel, no sɛnkyerɛwfo kyerɛwee sɛ: “Afe 1914-18 ko a ɛsɛee afeha a ɛto so 19 no nnya mmaa awiei.” Dɛn na na ɔkyerɛ? Ɔkyerɛkyerɛɛ mu sɛ: “Abakɔsɛm nnyina mmerebu so. Afeha a ɛto so 19—a wɔaka ho asɛm sɛ gyidi, adwenkyerɛ, nneyɛe ne abrabɔ ahorow mfe no—amma awiei wɔ Jan. 1, 1901. Ɛbaa awiei wɔ 1914. Saa bere no nso na afeha a ɛto so 20, a wɔaka ho asɛm saa ara no fii ase. . . .

“Ɛkame ayɛ sɛ saa ko no na ɛde akodi ahorow a ɛho asɛm ahia yɛn wɔ yɛn asetra mu nyinaa no bae. Nhomanim ne amammerɛ mu twe-ma-mentwe a akɔ so wɔ yɛn asetra mu no dodow no ara fi saa ko no. . . .

“Misusuw sɛ nea enti a ɛsɛee ade saa ne sɛ ɛyɛɛ adwene a nkurɔfo kura sɛ nnipa betumi adi wɔn nkrabea so no pasaa. . . . Ɔko no yii adwene a ɛte saa a nkurɔfo kura no fii hɔ. Nnipa a na wɔwɔ afanu no mu biara ansusuw sɛ ebewie sɛnea ewiei no. Ɛsɛee Britania ne France ahemman no. Ekunkum Britania, France, ne Germany awo ntoatoaso mũ mu nnɔmmarima nyinaa. . . . Wɔ bere tiaa mu no, ekunkum nnipa ɔpepem 11.”

Bɛboro mfe 120 a atwam ni no, Yehowa Adansefo atwe adwene asi 1914 so sɛ bere a Yesu kaa ho asɛm sɛ “amanaman no bere” no awiei no. (Luka 21:24) Wɔ saa afe no mu no, wɔde Yesu Kristo a na wɔanyan no na wɔahyɛ no anuonyam no sii agua so sɛ ɔsoro Ahenni no so Hene. Ɛdenam saa Ahenni no so no, Yehowa Nyankopɔn beyi ɔhaw ahorow a akɔ so wɔ afeha yi mu no nyinaa afi hɔ koraa.—Dwom 37:10, 11; Ɔsɛnkafo 8:9; Adiyisɛm 21:3, 4.

[Mfonini Fibea wɔ kratafa 32]

U.S. National Archives photo