Bible Nkyerɛase A Ɛsakraa Wiase No

Bere a Onyankopɔn diyifo Mose fii ase kyerɛw Bible no bɛboro mfe 3,500 ni no, na ɔman ketewa biako pɛ na etumi kenkan. (Deuteronomium 7:7) Nea enti a na ɛte saa ne sɛ na Kyerɛwnsɛm no wɔ saa ɔman no Hebri kasa ankasa nkutoo mu. Nanso, na ɛno bɛsesa wɔ bere bi akyi.

ADE titiriw a ama Bible mu asɛm atrɛw na anya nkurɔfo so nkɛntɛnso paa wɔ mfehaha pii mu no ne nkyerɛase a edi kan—Septuagint no. Dɛn nti na wɔyɛe? Na so yebetumi aka ma afata sɛ ɛyɛ Bible a ɛsakraa wiase no?

Nkyerɛase a Efi Honhom Mu Anaa?

Wɔ Yudafo no Babilon nkoasom no akyi wɔ afeha a ɛto so ason ne asia A.Y.B. mu no, wɔn mu pii kaa aman foforo mu a wɔankɔ tete Israel ne Yuda asase so bio. Yudafo a wɔwoo wɔn wɔ nkoasom mu no fam no, Hebri bɛyɛɛ kasa a wosua kaa wɔn kasa a wɔka paa no ho. Ebeduu afeha a ɛto so abiɛsa A.Y.B. no, na Yudafo bi tete Alexandria, Egypt—Hela Ahemman no amammerɛ asoɛe titiriw. Saa Yudafo no huu hia a ɛho hia sɛ wɔbɛkyerɛ Kyerɛw Kronkron no ase akɔ Hela kasa a saa bere no na ɛyɛ wɔn kasa titiriw no mu.

Ɛde besi saa bere no, na wɔakyerɛw Bible mu asɛm a efi honhom mu no wɔ Hebri kasa mu, na ne fã ketewaa bi nso wɔ Aram kasa a ɛne no di nsɛ no mu. So Onyankopɔn Asɛm a wɔde bɛkɔ kasa foforo mu no bɛma tumi a ɛwom sɛ ade a efi Nyankopɔn home mu no abrɛ ase, na ama wɔakyerɛ ase mpo asɛe no? So na Yudafo a wɔde Asɛm a efi honhom mu no ahyɛ wɔn nsa no bɛbɔ wɔn ho mmusu akyerɛ saa asɛm no ase akyea no?—Dwom 147:19, 20; Romafo 3:1, 2.

Saa nsɛm a ne ka yɛ kana yi maa nkurɔfo bɔɔ hu. Nanso, ewiee ase no, na osuro a wɔwɔ sɛ anhwɛ a, Yudafo no ntumi nte Onyankopɔn Asɛm no ase no abunkam nneɛma foforo nyinaa so. Wosii gyinae sɛ wɔbɛkyerɛ Tora—Bible nhoma anum a edi kan a Mose kyerɛwee no ase—akɔ Hela kasa mu. Ɔkwan pɔtee a wɔkyerɛ sɛ wɔfaa so kyerɛɛ ase no yɛ anansesɛm ara nko. Sɛnea Letter of Aristeas (Aristeas Krataa) no kyerɛ no, na Egypt sodifo Ptolemy II (285-246 A.Y.B.) pɛ sɛ wɔkyerɛ Mose Nhoma Anum (anaa, Torah) no ase kɔ Hela kasa mu na ɔde hyɛ n’ahemfie nhomakorabea. Ɔde hyɛɛ Yudafo abenfo 72 nsa, ma wofi Israel baa Egypt bɛkyerɛɛ ase wiei wɔ nnafua 72 mu. Ɛno akyi no wɔkenkan nkyerɛase yi kyerɛɛ Yudafo a wɔte hɔ no, na wɔkae sɛ ɛyɛ dɛ na ɛyɛ pɛpɛɛpɛ nso. Nsɛm a akyiri yi wɔka de kyew asɛm yi ho no kyerɛ sɛ, wɔde nsɛm asekyerɛfo no biara traa dan soronko mu, nanso na nsɛm a wɔkyerɛɛ ase no nyinaa yɛ ade koro, a nkyerɛwde biara mpo ansesa. Esiane nsɛm asekyerɛfo 72 ho atetesɛm no nti, wɔbɛfrɛɛ Hela Bible nkyerɛase yi Septuagint, a egyina Latin asɛmfua a ɛkyerɛ “Aduɔson” no so.

Nnɛyi abenfo dodow no ara gye tom sɛ Letter of Aristeas no yɛ nnaadaasɛm krataa. Wogye di nso sɛ ɛnyɛ Ptolemy II na ɔkae sɛ wɔnkyerɛ ase, na mmom Yudafo a na wɔwɔ Alexandria no mpanyimfo. Nanso Yudani nyansapɛfo Philo a na ɔte Alexandria, ne Yudani abakɔsɛm kyerɛwfo Josephus ne Talmud no nyinaa da no adi sɛ na afeha a edi kan mu Yudafo no mu fã kɛse no ara wɔ gyidi sɛ Septuagint no fi honhom mu te sɛ mfitiase Kyerɛwnsɛm no ara pɛ. Akyinnye biara nni ho sɛ adwenkyerɛ a ɛte saa no fi mmɔden a wɔbɔe sɛ wɔbɛma Yudafo a wɔwɔ wiase nyinaa agye Septuagint no atom no.

Ɛwom sɛ mfiase no Mose nhoma anum no nkutoo na wɔkyerɛɛ ase de, nanso wɔde din Septuagint no bɛfrɛɛ Hebri Kyerɛwnsɛm mũ no nyinaa a wɔakyerɛ ase kɔ Hela kasa mu no. Wɔkyerɛɛ nhoma a aka no ase wɔ mfe ɔha anaa nea ɛte saa a edi hɔ no mu. Wɔanyɛ Septuagint mũ no nyinaa ho adwuma ammom, na mmom wɔyɛɛ no nkakrankakra. Na ɛsono nsɛm asekyerɛfo no mu biara ne ne mmɔdenbɔ ne Hebri kasa mu nimdeɛ a ɔwɔ. Wɔkyerɛɛ nhoma no fã kɛse no ara ase tẽẽ sɛnea wɔkyerɛw no no, na ɛtɔ mmere bi mpo a na ɛyɛ pɛpɛɛpɛ dodo, nanso na afoforo nyɛ tẽẽ saa. Emu kakraa bi yɛ nea wɔayɛ ne nkyerɛase tenten ne nkyerɛase tiatia. Bere a afeha a ɛto so abien A.Y.B. no rekɔ n’awiei no, na wɔanya Hebri Kyerɛwnsɛm mu nhoma no nyinaa wɔ Hela kasa mu. Ɛmfa ho sɛ Hebri Kyerɛwnsɛm a wɔkyerɛɛ ase kɔɔ Hela mu no nyinaa ankɔ so pɛpɛɛpɛ no, nea efi mu bae no boroo nea na nsɛm asekyerɛfo no betumi de wɔn adwene abu.

Yafet Traa Sem Ntamadan Mu?

Bere a Talmud no reka Septuagint no ho asɛm no, ɛfaa Genesis 9:27 kaa asɛm sɛ: ‘Yafet bɛtra Sem ntamadan mu.’ (Megillah 9b, Babilon Talmud no) Talmud no kyerɛ wɔ sɛnkyerɛnne kwan so sɛ ɛdenam Hela kasa a wɔde kyerɛw Septuagint no dɛ so no, Yafet (Yawan, a Helafo no fi no mu no agya) traa Sem (Israel man no nana) ntamadan mu wɔ sɛnkyerɛnne kwan so. Nanso na wobetumi aka nso sɛ ɛdenam Septuagint no so no, Sem traa Yafet ntamadan mu. Ɔkwan bɛn so?

Bere a Alexander Ɔkɛseɛ dii aman pii so nkonim wɔ ɛrekɔ afeha a ɛto so anan A.Y.B. awiei no, wɔbɔɔ mmɔden kɛse sɛ wɔbɛma Helafo kasa ne wɔn amammerɛ atrɛw wɔ nsase a wadi so nkonim no nyinaa so. Wɔkaa saa dwumadi yi ho asɛm sɛ afoforo a wɔdan wɔn Helafo. Bere nyinaa na Yudafo no te nka sɛ wɔde amammerɛ foforo repuapua wɔn. Sɛ Yudafo no ma Helafo amammerɛ ne nyansapɛ fa wɔn so a, ebegu wɔn som no ankasa. Ná dɛn na wobetumi de asiw ɔhaw yi ano?

Bere a Yudani Bible asekyerɛfo Max Margolis rekyerɛ adwene biako a enti ebia Yudafo no kyerɛɛ Septuagint no ase no, ɔka sɛ: “Sɛ yɛka sɛ Yudafo na ɛde ho adwene bae a, ɛnde ɛma yehu botae foforo a ɛwɔ akyi, a ɛne sɛ wɔbɛma Amanaman mufo no ahu Yudafo Mmara, na wɔama nnipa a wɔwɔ wiase ahu sɛ Yudafo no wɔ amammerɛ a ɛne Hellas [Greece] nyansa na ɛbɔ so.” Enti na Hebri Kyerɛwnsɛm no a wɔbɛma nnipa a wɔka Hela kasa nsa aka bi no betumi ayɛ ɔkwan a na wɔrefa so atetew wɔn ho na afei wɔako atia nso.

Adwene a Alexander fae sɛ ɔbɛdan afoforo Helafo no maa Hela bɛyɛɛ amansan kasa wɔ wiase. Bere a Romafo dii n’ahemman no so nkonim mpo no, nkurɔfo kɔɔ so de Hela a na obiara ka (anaa Koine) no dii dwuma wɔ aguadi ne amanaman ntam nkitahodi mu. Sɛ́ wɔhyɛɛ da yɛɛ ho adwuma anaa nsɛm tebea na ɛma ɛbaa saa no, Hebri Kyerɛwnsɛm no Septuagint nkyerɛase no kopuee nnipa pii a wɔnyɛ Yudafo a bere bi na wonnim Nyankopɔn ne Yudafo Mmara no afie mu ma wogye toom ntɛm ara. Nea efi mu bae no yɛ nwonwa.

Wɔn a Wɔadan Gyidifo ne Nyamesurofo

Eduu afeha a edi kan Y.B. mu no, Philo tumi kyerɛwee sɛ “ɛnyɛ Yudafo nko na wobu Mose mmara no sɛ edi mũ na nidi wom, na mmom aman afoforo nyinaa nso.” Ɛdefa Yudafo a na wɔnte Palestine wɔ afeha a edi kan mu ho no, Yudani abakɔsɛm kyerɛwfo Joseph Klausner ka sɛ: “Ɛyɛ den sɛ yebegye adi sɛ Yudafo ɔpepem pii yi nyinaa fi Palestine ketewaa no mu na ɛboaboaa wɔn ho ano. Akyinnye biara nni ho sɛ ade foforo a ɛmaa saa nkɔanim kɛse yi bae ne mmarima ne mmea bebree a wɔdanee gyidifo no.”

Nanso, asɛm no nnyina saa nsɛntitiriw yi nkutoo so. Nhoma kyerɛwfo Shaye J. D. Cohen, Yudafo abakɔsɛm ho ɔbenfo, ka sɛ: “Amanaman mufo pii, mmarima ne mmea nyinaa, sakra baa Yudasom mu wɔ mfehaha a etwa to A.Y.B. ne afeha a edi kan ne nea ɛto so abien Y.B. no mu. Nanso, amanaman mufo a wogyee Yudasom mu nneɛma bi toom, nanso wɔansakra amma mu no mpo na na wɔdɔɔso.” Klausner ne Cohen nyinaa frɛ saafo a wɔantumi ansakra wɔn yi Nyamesurofo, asɛm a wɔde adi dwuma pii wɔ Hela nhoma a wɔkyerɛw no saa bere no mu.

Nsonsonoe bɛn na ɛda obi a wadan gyidini ne Nyamesuroni ntam? Na wɔn a wɔadan Gyidifo no asakra abɛyɛ kuw no mufo ankasa, a wobu wɔn sɛ Yudafo wɔ biribiara mu efisɛ wogyee Israel Nyankopɔn no toom (poo anyame foforo nyinaa), wotwaa wɔn twetia, na wɔde wɔn ho bɔɔ Israel man no. Nanso ɛdefa Nyamesurofo no ho no, Cohen ka sɛ: “Ɛwom sɛ saa amanaman mufo yi yɛɛ Yudafo amanne ahorow bi na wɔfaa akwan bi so dii Yudafo no Nyankopɔn ni de, nanso wɔammu wɔn ho sɛ Yudafo, na afoforo nso ammu wɔn sɛ Yudafo.” Klausner ka wɔn ho asɛm sɛ na “wɔyɛ adantam,” efisɛ wogyee Yudasom toom, na “wodii ɛho amanne ahorow no bi so, nanso . . . wɔammɛyɛ Yudafo ankosi ase.”

Ebia nkɔmmɔ a ebinom ne Yudafo asɛmpatrɛwfo bɔe anaa hu a wohui sɛ wɔn abrabɔ, wɔn amanne, ne wɔn suban da nsow nti na ɛmaa wɔn ani begyee Nyankopɔn ho. Nanso, Septuagint no ne adwinnade titiriw a ɛboaa Nyamesurofo yi ma wosuaa Yehowa Nyankopɔn ho ade. Ɛwom sɛ yentumi nkyerɛ afeha a edi kan mu Nyamesurofo no dodow pɔtee de, nanso akyinnye biara nni ho sɛ Septuagint no maa Onyankopɔn ho nimdeɛ trɛwee wɔ Roma Ahemman no nyinaa mu. Ná wɔnam Septuagint no so reto fapem a ɛho hia bi nso.

Wɔnam Septuagint no so Bɔɔ Kwan

Septuagint no boae kɛse maa Kristofo nkrasɛm no trɛwee. Bere a wɔde Kristofo asafo no sii hɔ wɔ Pentekoste 33 Y.B. no, na Yudafo pii a wɔka Hela kasa ka wɔn a na wɔahyiam no ho. Ná nnipa a wɔadan Yudafo nso ka wɔn a wɔbɛyɛɛ Kristo asuafo a wodi kan no ho. (Asomafo no Nnwuma 2:5-11; 6:1-6; 8:26-38) Esiane sɛ na wɔpɛ sɛ nnipa dodow a wobetumi anya biara kenkan nsɛm a efi honhom mu a Yesu asuafo a wodi kan no kyerɛwee no nti, wɔkyerɛw no Hela kasa mu.a Enti, na Hebri Kyerɛwnsɛm no mu nsɛm a wɔfa kae wɔ Kristofo Hela Kyerɛwnsɛm no mu no pii gyina Septuagint no so.

Ná afoforo a na wɔnyɛ Yudafo ankasa anaa wɔnyɛɛ wɔn ho Yudafo ayɛ krado sɛ wobegye Ahenni nkrasɛm no atom. Ná Amanaman muni Kornelio yɛ “ɔdefɛrefo, na osuro Onyankopɔn, ɔne ne fifo nyinaa, na ɔyɛ mmɔborohunu ade bebree ma nkurɔfo no, na ɔbɔ Onyankopɔn mpae daa.” Wɔ afe 36 Y.B. mu no, Kornelio ne n’abusuafo ne afoforo a na wɔahyiam wɔ ne fie no bɛyɛɛ Amanaman mufo a wodi kan a wɔbɔɔ wɔn asu sɛ Kristo akyidifo. (Asomafo no Nnwuma 10:1, 2, 24, 44-48; fa toto Luka 7:2-10 ho.) Bere a ɔsomafo Paulo tuu kwan faa Asia Kumaa ne Greece nyinaa no, ɔkaa asɛm no kyerɛɛ Amanaman mufo pii a na wosuro Nyankopɔn dedaw, ne afei “Helafo adefɛrefo.” (Asomafo no Nnwuma 13:16, 26; 17:4) Dɛn nti na na Kornelio ne Amanaman mufo foforo no ayɛ krado sɛ wobegye asɛmpa no atom? Ná Septuagint no abɔ kwan no ato hɔ. Ɔbenfo bi kyerɛ n’adwene sɛ Septuagint no “yɛ nhoma a ɛho hia paa ma sɛ enni hɔ a, anka Kristosom ne atɔe fam asetra kwan nyinaa annyina.”

Wommu Septuagint no sɛ “Efi Honhom Mu” Bio

Awiei koraa, sɛnea wɔde Septuagint no dii dwuma kɔɔ akyiri no hyɛɛ Yudafo no abufuw. Sɛ nhwɛso no, Yudafo no kae wɔ wɔne Kristofo nkɔmmɔbɔ ahorow mu sɛ Septuagint no nyɛ nkyerɛase pa. Eduu afeha a ɛto so abien Y.B. mu no, na Yudafo no apo nkyerɛase a bere bi wɔkamfoe sɛ efi honhom mu no korakora. Rabbifo no bɔɔ nsɛm asekyerɛfo 72 ho anansesɛm no gui, kae sɛ: “Bere bi, ɛbae sɛ mpanyimfo baanum bi kyerɛw Torah no maa Ɔhene Ptolemy wɔ Hela kasa mu, na na saa da no yɛ da bɔne ma Israel te sɛ da a wɔyɛɛ nantwi ba honi no, efisɛ wɔantumi ankyerɛ Torah no ase pɛpɛɛpɛ.” Sɛnea ɛbɛyɛ na wɔanya nkyerɛase a ɛne rabbifo adwene hyia paa no, rabbifo no hyɛe sɛ wɔnyɛ Hela nkyerɛase foforo. Obi a na wadan Yudani a wɔfrɛ no Aquila a na ɔyɛ rabbi Akiba suani, na odii ho dwuma wɔ afeha a ɛto so abien Y.B.

Yudafo no amfa Septuagint no anni dwuma bio, nanso ɛbɛyɛɛ “Apam Dedaw” titiriw a Katolek Asɔre a na ɛreba so no de dii dwuma kosii sɛ Jerome Latin Vulgate no besii ananmu. Ɛwom sɛ nhoma bi nkyerɛase ntumi nyɛ sɛ nea wɔkyerɛɛ ase fii mu ankasa no de, nanso Septuagint no dii dwuma titiriw maa Yehowa Nyankopɔn ne N’ahenni a ɛhyɛ Yesu Kristo nsa no ho nimdeɛ trɛwee. Nokwarem no, Septuagint no yɛ Bible nkyerɛase a ɛsakraa wiase no.

[Ase hɔ nsɛm]

[Kratafa 31 mfonini]

Nnipa a Paulo kaa asɛm no kyerɛɛ wɔn no mu pii tee “Septuagint” no ase

[Mfonini Fibea wɔ kratafa 29]

Courtesy of Israel Antiquities Authority