Agyanom Bɛyɛ Dɛn Aka Wɔn Mma Mmarima Abɛn Wɔn?

“EI DADA, wo deɛ wunim biribiara!” Wo ba abarimaa aka biribi saa akyerɛ wo bere a w’ani nna anaa? Ɔkaa saa no, ebia wo tirim yɛɛ wo dɛ sɛ woyɛ agya. Afei yɛmfa no sɛ womaa wo ba no afotu pa bi, ɛnna ɔde yɛɛ adwuma ma ɛboaa no. Ɛba saa a, w’ani begye paa.a—Mmebusɛm 23:15, 24.

Nanso yemmisa sɛ, sɛnea na kan no wo babarima no nte wo ho gyae no, saa ara na ɛda so te anaa? Anaa ayɛ sɛ ɔrenyin no, sɛnea ɔpɛ w’asɛm no so retew? Seesei a wo ba renyin yi, ɛdɛn na wubetumi ayɛ na mo ntam akɔ so ayɛ kama? Yenni kan nhwɛ ɔhaw ahorow bi a agyanom hyia.

Ɔhaw Mmiɛnsa a Agyanom Taa Hyia

1. WONNYA BERE: Wokɔ aman pii so a, agyanom na wɔtaa yɛ adwuma de sika ba fie. Adwuma tumi de wɔn kɔhyɛ mu kyɛ. Enti mmeae bi wɔ hɔ a, agyanom nnya bere mma wɔn mma koraa. France sei, nnansa yi ara wɔyɛɛ nhwehwɛmu bi wɔ hɔ, na wohui sɛ bere a agyanom nya ma wɔn mma da biara no nnu simma 12 mpo.

BIRIBI A ƐSƐ SƐ WUSUSUW HO: Ɛyɛ a wunya bere pii ma wo babarima? Ma wo ho nnawɔtwe anaa nnawɔtwe mmienu fa hwɛ bere dodow a wunya ma wo ba no, na kyerɛw to hɔ. Nea wubehu no, anhwɛ a ɛbɛyɛ wo nwonwa.

2. WƆANNYA OBI ANTWA SA PA AMMA WƆN: Mmarima bi wɔ hɔ a, wɔn papa anhyɛ da ne wɔn antena. Ɔbarima bi a ɔde Jean-Marie wɔ France, na n’asɛm ne sɛ: “Ná minnya me papa ne no mmɔ nkɔmmɔ.” Nsunsuanso bɛn na ɛde abrɛ Jean-Marie? Ɔkaa sɛ: “Ɔhaw a akɔfa abrɛ me no, ebi wɔ hɔ a, manna anso ho dae. Baako ne sɛ, me ara me mma mmarima mpo, ɛyɛ den ma me sɛ me ne wɔn bedi nkɔmmɔ.” Mmarima binom nso wɔ hɔ a, na wonim wɔn papa yiye, nanso wɔne wɔn ntam nyɛ papa. Philippe adi mfe 43, na ɔkaa sɛ: “Ná me papa ntumi nyɛ biribi mfa nkyerɛ me sɛ ɔdɔ me. Enti seesei, meyere me ho paa ansa na matumi ayɛ biribi anaa maka biribi de akyerɛ me babarima no sɛ medɔ no.”

BIRIBI A ƐSƐ SƐ WUSUSUW HO: Sɛnea na wo papa ne wo te no, wo nso saa ara na wo ne wo babarima te anaa? Suban pa anaa suban bɔne a na wo papa wɔ no, wuhu sɛ woasuasua anaa? Ɛdɛn na ɛma wuhu saa?

3. WƆANNYA AFOTU PA: Aman bi wɔ hɔ a, wɔka sɛ mmea na ɛsɛ sɛ wɔtete mmofra. Wɔtetee Luca wɔ Europa Atɔe fam. Asɛm a ɔkae ne sɛ, “Baabi a minyinii no, nkurɔfo adwene ne sɛ, mmea na ɛtete mmofra.” Aman bi nso, wɔkyerɛ agyanom sɛ wɔn adwuma ara ne sɛ wɔbɛteɛ mmofra; hwee nka ho bio. George sei, wɔtetee no wɔ Afrika man bi so. Ɔkaa sɛ: “Yɛn amammerɛ mu de, agyanom ne wɔn mma nni agorɔ, efisɛ wosusuw sɛ ɛremma wɔn mma no mmu wɔn. Enti ɛnnɛ ne nnɛ nyinaa, sɛ me babarima no wɔ me nkyɛn a, menhyɛ da mpɛ.”

BIRIBI A ƐSƐ SƐ WUSUSUW HO: Baabi a wowɔ no, dɛn na nkurɔfo hwɛ kwan sɛ agyanom bɛyɛ? Wɔkyerɛ wɔn sɛ mmofra ntetee yɛ mmea adwuma anaa? Ɛyɛ a wɔka kyerɛ agyanom sɛ wɔmma wɔn mma nhu sɛ wɔdɔ wɔn anaa wɔnyɛ saa?

Sɛ woyɛ agya a wuhyia saa ɔhaw yi bi a, dɛn na ɛbɛma woadi so? Hwɛ nea edidi so yi.

Fi Ase Ntɛm

Mmarimaa de, wɔtaa suasua wɔn papa. Enti bere a wo ba no sua koraa no, kyerɛ no nneɛma pa. Wobɛyɛ no sɛn? Wobɛyɛ dɛn anya bere ama wo babarima?

Sɛ ɛbɛyɛ yiye a, nneɛma a daa woyɛ no, wo ne no nyɛ. Sɛ yɛbɛyɛ nhwɛso a, woreyɛ fie nnwuma a, ɛyɛ a ma ɔmmoa wo. Sɛ worepra a, ma wo babarima prae ketewa na ɔmpra bi. Sɛ woretu fam nso a, pɛ sofi ketewaa bi ma no na ɔnyɛ bi. Sɛ ɔne ne papa a ogye no di na ɔpɛ sɛ ɔyɛ te sɛ ɔno no bom yɛ adwuma a, ɛbɛyɛ no dɛ. Ebia ɛremma wunwie nea woreyɛ no ntɛm, nanso ɛbɛma no abɛn wo paa, na ɛbɛboa no nso ama wasua sɛnea wɔyɛ adwumaden. Efi tete nyinaa, Bible hyɛ agyanom nkuran sɛ wɔne wɔn mma mmom nyɛ fie nnwuma, na wɔreyɛ nso a wɔne wɔn mmɔ nkɔmmɔ, na wɔnkyerɛkyerɛ wɔn. (Deuteronomium 6:6-9) Saa afotu no da so ara yɛ adwuma nnɛ.

Ɛnyɛ adwuma nko ara na ɛsɛ sɛ wo ne wo babarima yɛ. Ɛyɛ a wo ne no nni agorɔ nso. Sɛ mudi agorɔ a, mo mmienu nyinaa ani begye, nanso ɛnyɛ ɛno nko ara ne mfaso a ɛwɔ so. Ebinom ayɛ nhwehwɛmu ahu sɛ, sɛ agyanom ne wɔn mma nketewa di agorɔ a, ɛboa mmofra no ma wosua nneɛma foforo, na ɛma wonya akokoduru nso.

Sɛ agya ne ne ba di agorɔ a, biribi foforo a ehia paa tumi fi mu ba. Michel Fize yɛ obi a ɔyɛ nsɛm mu nhwehwɛmu. Ɔkaa sɛ, “Sɛ abarimaa ne ne papa di agorɔ a, saa bere no paa na otumi ne ne papa di nkɔmmɔ.” Bere a wɔredi agorɔ no, papa no tumi ka biribi anaa ɔyɛ biribi ma ne ba no hu sɛ ɔpɛ n’asɛm. Ɛba saa a, na ɔrekyerɛ abofra no sɛnea ɔbɛma nkurɔfo ahu sɛ ɔdɔ wɔn. André yɛ agya bi a ɔte Germany. Ɔkaa sɛ, “Bere a me babarima no sua no, na yɛtaa ne no di agorɔ. Ná meyɛ no atuu, na ɛmaa ɔno nso suaa sɛnea ɔbɛma mahu sɛ ɔdɔ me.”

Ade foforo a ebetumi ama ɔdɔ a ɛwɔ agya bi ne ne babarima ntam no mu ayɛ den ne sɛ wɔbɛbom ayɛ biribi bere a abofra no rekɔda. Ɛyɛ a taa kan biribi kyerɛ no, na sɛ ɔreka nea ɛmaa n’ani gyee ne nea ɛmaa ne werɛ howee saa da no a, tie no. Woyɛ saa a, ɔrenyin no, ɛbɛyɛ mmerɛw sɛ ɔbɛkɔ so ne wo abɔ nkɔmmɔ.

Kɔ So Hwehwɛ Nneɛma a Mo Baanu Ani Begye Ho

Mmarimaa bi wɔ hɔ a sɛ wɔn papa yɛ sɛ ɔne wɔn rebɔ nkɔmmɔ a, na ayɛ asɛm. Woyɛ sɛ wo ne wo ba abarimaa rebɔ nkɔmmɔ na ɔtwetwe ne ho a, ɛnkyerɛ sɛ wo ne no bɔ nkɔmmɔ a ɛrenyɛ yiye. Sɛ wosesa nneɛma mu kakra a, ebia ɔbɛma kwan ama wo ne no abɔ nkɔmmɔ.

Agya bi a ne din de Jacques te France, na ɔwɔ babarima a ɔde Jérôme. Ɛtɔ da na sɛ ɔyɛ sɛ ɔne ne ba no rebɔ nkɔmmɔ a, na agye agu. Nanso ɛba saa a, ɔnhyɛ ne ba no mma no nkasa, na mmom ɔsesa nneɛma mu. Otumi ne no bɔ bɔɔl. Jacques kaa sɛ: “Yɛbɔ bɔɔl no wie a, na yɛatena nsensan no so ahome kakra. Saa bere no de, me ba no tumi ka ne komam asɛm kyerɛ me. Sɛnea ɛyɛ a yɛn mmienu nko ara te hɔ a obiara nka yɛn ho no, ɛyɛ me sɛ ɛka ho bi na otumi bɛn me paa no.”

Na sɛ wo babarima no ani nnye agorɔ bi te sɛ bɔɔl ne nea ɛtete saa ho ɛ? Sɛ André kae bere a na ɔne ne babarima no tumi kɔpɛ baabi tena hwɛ nsoromma a egu wim no a, na n’ani agye. André kaa sɛ: “Edu anadwo a, na yɛde nkongua akosisi abɔnten agyegye ada mu. Awɔw no nti, na yɛde ntama kyekyere yɛn ho. Yɛrenom tii no, na yɛrehwɛ wim. Saa bere no, na yɛde bɔ Nea ɔbɔɔ nsoromma no ho nkɔmmɔ. Afei na yɛbɔ abrabɔ mu nkɔmmɔ nso. Ná yetumi ka biribiara ho asɛm.”—Yesaia 40:25, 26.

Na sɛ nneɛma a wo babarima ani gye ho no, w’ani nnye ho ɛ? Ɛba saa a, ɛnde nneɛma bi a anka w’ani nnye ho no, ɛsɛ sɛ wusua sɛ wobɛma w’ani agye ho. (Filipifo 2:4) Ian te South Africa, na ɔkaa sɛ, “M’ani gye agorɔ bi te sɛ bɔɔlbɔ ho kyɛn me babarima Vaughan. Ɔno de, wimhyɛn ne kɔmputa paa na na n’ani gye ho. Enti mebɔɔ mmɔden sɛ mɛma m’ani agye saa nneɛma no ho bi. Ɛyɛ a na mede no kɔ baabi a wotu wimhyɛn fa wim de gyigye nkurɔfo ani, na ɛyɛ a me ne no bɔ kɔmputa so agorɔ a ɛte sɛ nea woreka wimhyɛn. Migye di sɛ, sɛnea yɛyɛɛ nneɛma boom no na ɛmaa Vaughan tumi ne me bɔɔ nkɔmmɔ a wansuro.”

Boa No Ma Onhu sɛ Obetumi Ayɛ Nneɛma Pa

“Dada hwɛ, matumi ayɛ!” Wo ba abarimaa asua biribi yɛ ama ɔde anigye ateɛm aka biribi saa akyerɛ wo pɛn? Sɛ seesei ɔyɛ ɔbabun a, ɔda so ara ka biribi saa kyerɛ wo ma wokamfo no anaa? Ebia ɔnyɛ saa bio. Nanso, nea ɛte ne sɛ, sɛ obenyin abɛyɛ ɔpanyin pa a, ohia nkamfo.

Hwɛ sɛnea Yehowa Nyankopɔn yɛɛ wei ho nhwɛso maa ne ba baako. Bere a Yesu wɔ asaase so a ɔrebɛhyɛ adwuma titiriw bi ase no, Onyankopɔn ka maa obiara tee sɛ ɔdɔ no. Ɔkaa sɛ: “Oyi ne me Ba, nea medɔ no na magye no atom.” (Mateo 3:17; 5:48) Ɛyɛ nokware sɛ ɛsɛ sɛ wotete wo babarima na woteɛ no so. (Efesofo 6:4) Nanso sɛ wuhu sɛ wayɛ adepa anaa waka asɛmpa a, ɛyɛ a wokamfo no anaa?

Mmarima bi wɔ hɔ a, ɛyɛ den ma wɔn sɛ wɔbɛkamfo obi anaa wɔbɛma wahu sɛ wɔdɔ no. Ebia bere a wɔrenyin no, na wɔn awofo ntaa nkamfo wɔn, na mmom wɔn mfomso na na wɔka ho asɛm kɛse. Sɛ saa na wɔtetee wo a, ɛnde ebehia sɛ woyere wo ho paa na woatumi ama wo ba no anya ɔno ara ne mu gyidi. Wobɛyɛ no sɛn? Luca a yɛaka n’asɛm no taa ne ne ba Manuel a wadi mfe 15 no bom yɛ fie nnwuma. Luca ka sɛ: “Ɛtɔ da a mitumi ka kyerɛ Manuel sɛ ɔnhyɛ adwuma bi ase na sɛ ohia me mmoa a, mɛba abeso ne mu. Mpɛn pii no, ɔno nko ara tumi yɛ adwuma no. Sɛ otumi yɛ biribi saa a, ɛma n’ani gye na onya ɔno ara ne mu gyidi. Sɛ ɛkɔ yiye a, mekamfo no. Sɛ ankɔ sɛnea ɔpɛ mpo a, mema ohu sɛ wabɔ ne ho mmɔden, na m’ani sɔ.”

Ade foforo a wubetumi ayɛ ama wo ba anya ne mu gyidi ne sɛ wobɛboa no ama ɔde nneɛma a ɛho hia asisi n’ani so na wayɛ ho adwuma. Na wuhu sɛ wo ba no brɛ ansa na watumi ayɛ nneɛma a esisi n’ani so no ho adwuma nso ɛ? Anaa yɛmfa no sɛ botae a wopɛ sɛ ɔde si n’ani so no, wamfa ɛno na mmom wafa botae foforo a mfomso nni ho. Ɛba saa a, wobɛyɛ no dɛn? Sɛ nneɛma ankɔ sɛnea anka wopɛ a, ebehia sɛ wote no ase. Jacques a yɛaka n’asɛm dedaw no ka sɛ: “Mebɔ mmɔden sɛ mɛboa me babarima no ama ɔde botae a obetumi ayɛ ho adwuma asisi n’ani so. Nanso mehwɛ sɛ botae a ɔreyɛ ho adwuma no, ɛnyɛ sɛ ɔreyɛ ama me na mmom ɔno ara na ɔpɛ no saa. Afei mekae me ho sɛ, ɛsɛ sɛ mema ɔno ara tɔ ne bo ase yɛ ne botae no ho adwuma.” Sɛ wutie wo ba no adwenkyerɛ, wokamfo no wɔ nea otumi yɛ ho, na wohyɛ no nkuran bere a nneɛma ankɔ yiye amma no no a, ɛbɛboa no ama watumi ayɛ ne botae a ɔde asisi n’ani so no ho adwuma.

Nea yɛreka yi nkyerɛ sɛ anigye bɛwɔ mo ntam bere nyinaa. Ɛtɔ da a, nneɛma renkɔ yiye papa. Nanso, woyɛ wo fam de a, wo babarima no bɛbɛn wo na mo ntam rentetew, efisɛ obiara pɛ sɛ ɔbɛn obi a obetumi aboa no ama asi no yiye.

[Ase hɔ asɛm]