Nhyiam Horow A Ɛbɛboa Ma Yɛayɛ Asuafo

DAPƐN A EFI ASE NOVEMBER 2

15 min: Dwom 34. Nkaebɔ horow, si Bible Mu Nsɛm nhoma a yɛde bedi dwuma kɛse November mu so dua na hyɛ ho nkuran. Asafo mu nkaebɔ biara. Da ɔfã a edi hɔ adi.

20 min: Asɛmpa a Wɔbɛka Akyerɛ​—“Ma Aka Koma No.” Ka ho asɛm. Kyerɛw Nkɔmmɔbɔ Asɛmti ne nsɛm atitiriw abiɛsa anaa anan gu kyerɛwpon so, sɛ ebi wɔ hɔ a. Ma ɔkwampaefo anaasɛ ɔdawurubɔfo a ɔbɔ mmɔden nyɛ ɔkwan a wɔbɛfa so de adi dwuma ho ɔyɛkyerɛ a woma wogyinagyina mmeae horow bi na wo ne atiefo abɔ nsɛntitiriw ho nkɔmmɔ. Si hia a ɛho hia sɛ obi sua asɛm no yiye ma ɛka ne tirim na ɔkasa ma ɛkã ofiewura koma so dua. Da ɔfa a edi so no adi.

20 min: Ɔkasa a egyina asɛm “Aberante​—Ma Adebɔne Mpare Wo!​—Ɔsɛnk. 11:10” so. Fa nea mmerante a wɔwɔ asafo no mu ka wɔ nsɛm a emu yɛ den a wohyia wɔ sukuu mu ne sɛnea wɔtwe wɔn ho fi ho ho ka ho. Afei, ka sɛnea wobetumi de bere adi dwuma nyansam bere a wɔanya akwamma a ɛware no ho asɛm.

5 min: Dwom 97 ne mpaebɔ.

DAPƐN A EFI ASE NOVEMBER 9

10 min Dwom 45. Asafo mu nkaebɔ ahorow. Ka October asɛnka adwuma akontaabu ho asɛm. Kamfo adwuma a wɔyɛe, na si nokwasɛm a ɛyɛ sɛ na ɛyɛ yɛn ayeyi afɔre no fa no so dua. Si nkontaabu no afã horow biara a ɛda nsow so dua.

15 min: “So Woresɔ W’ankasa w’adwuma Ahwɛ?” Nsemmisa ne Mmuae. Ma ɔpanyin mfa saa bere yi simma anum mma sɛnea wɔn a wɔsom akwan horow so wɔ asafo no mu bom di asafo no atirimpɔw titiriw a ɛne asɛnka ne asuafoyɛ no ho dwuma ho ɔkasa. Da ɔfã a edi so no adi.

15 min: Mmofra Betumi Ada Asɛmpa No Adi. Ka hokwan ahorow a abue ama mmofra ma wɔde aka asɛmpa no ho asɛm. Ebinom ne abusuafo, mfɛfo sukuufo ne akyerɛkyerɛfo sua ade. Ma ɔdawurubɔfo kumaa nyɛ sɛnea ɔyɛ adesua ho nhyehyɛe ho ɔyɛkyerɛ. Ma abofra a wadi mfe 8 kosi 12 nyɛ Bible Mu Nsɛm nhoma a ɔne mmofra afoforo sua ho ɔyɛkyerɛ. Fa adesua a ɛto so 94 di dwuma. Da ɔfã a edi hɔ adi.

15 min: “So Woasom sɛ Ɔkwampaefo Bere Bi a Atwam?” Ɔkasa ne afoforo a wɔne wɔn bobɔ nkɔmmɔ. Fa simma du ka nsɛntitiriw ho asɛm na afei bisabisa wɔn a wɔayɛ akwampae adwuma pɛn no nsɛm. (Sɛ obiara nyɛɛ daa kwampaefo anaa ɔkwampaefo titiriw da a, fa wɔn a wɔayɛ akwampaefo aboafo pɛn di dwuma.) Frɛ onua a ɔde nhyiam ba awiei.

5 min: Dwom 25 ne mpaebɔ.

DAPƐN A EFI ASE NOVEMBER 16

10 min Dwom 25 ne asafo mu nkaebɔ ahorow.

20 min: Ka Asɛmpa No. Ɔkasa a egyina Marko 13:10 so. Ɔsom adwuma sohwɛfo de ho ɔkasa ma. Ɔkyerɛ hia a ehia sɛ wɔyɛ eyi wɔ nna a edi akyiri yi mu. Ɔbɔ asasesin a wɔmfa nhyɛɛ obiara nsa anaasɛ asasesin a yɛwɔ mu mu dwumadi ho amanneɛ, na ɔhyɛ obiara nkuran sɛ ɔmfa ne ho nhyɛ mu.

25 min: Mpanyimfo bɛyɛ eyi ho nhyehyɛe.

5 min: Dwom 17 ne mpaebɔ.

DAPƐN A EFI ASE NOVEMBER 23

10 min Dwom 58 ne asafo mu nkaebɔ ahorow.

20 min: Ɔdɔ a Yebeyi Adi Akyerɛ Wɔ Ɔkwan a Ɛfata So. kasa a egyina June 1, 1980 Ɔwɛn-Aban nkratafa 3, 4 mu asɛm so a ɔpanyin de ma. Ɔkasafo betumi de nea ehia wɔ mo asafo mu aka ho de akyerɛ sɛnea woyi ɔdɔ adi wɔ akwan a ɛfata so. Wobetumi ama atiefo akyerɛ wɔn adwene.

25 min: Nkɔmmɔbɔ ne Osuahu Ahorow. Ɔsom adwuma sohwɛfo bedi ɔfã yi ho dwuma. Fi ɛho dwumadi ase ntɛm na atu mpɔw. Wobetumi abisabisa anuanom mmarima, mmea, mmerante ne mmofra nsɛm anaasɛ wobetumi ama wɔaka dwuma a wɔde nea wosuae wɔ “Onyankopɔn Dɔ” Ɔmantam Nhyiam no ase adi ne nea efi mu aba ho asɛm. Ɛsɛ sɛ oguamtrani hyɛ atiefo nkuran sɛ wɔnkɔ so nnya nkɔanim wɔ nsɛm a wɔtee no mu bere a waka ɔsom afe a etwaam no dwumadi ho asɛm akyi no.

5 min: Dwom 66 ne mpaebɔ.

DAPƐN A EFI ASE NOVEMBER 30

7 min: Dwom 71. Sika nkontaabu amanneɛbɔ ne asafo mu nkaebɔ ahorow.

20 min: “Ma Wo Kanea Nhyerɛn.” (w80 6/1 nkrat. 8-10) Ɔpanyin yɛ eyi nsemmisa ne mmuae te sɛ nea wɔyɛ wɔ Ɔwɛn-Aban adesua mu. Sɛ ɛbɛyɛ yiye a, obetumi ne akwampaefo ne akwampaefo aboafo dodow bi (anaasɛ wɔn a wɔayɛ akwampaefo bere bi a atwam ayɛ wɔ asɛnka agua so. Si nkyekyem a ɛka 2 Korintofo 5:10, 11 ho asɛm ne nkyekyem a edi so no so dua fa kyerɛ hia a ehia sɛ yɛyɛ nea yebetumi nyinaa wɔ asɛnka adwuma mu. Sɛ ebinom anya osuahu atitiriw bi afi adesua asefi ne ade mu a, ma wɔnka nkyerɛ bere a moasusuw nkyekyem a ɛto so abien wɔ kratafa 10 ho. Awiei no, hyɛ wɔn a ɛrenkyɛ wobenya sukuu akwamma ne wɔn a wobetumi ayɛ saa December mu no nkuran sɛ wɔmfa wɔn ho nhyɛ akwampaefo boafo adwuma no mu.

13 min: “So Woasusuw Ho Pɛn Anaa . . . ?” Onua a ne ho akokwaw ka mfaso a ɛwɔ saa asɛm yi a ɛba wɔ Nyan! ahorow mu so ho asɛm. Edi nsemmisa​—a ɛkyere adwene ho dwuma. (Bobɔ nea aba nnansa yi binom din.) Ɛkanyan ofiewura no anigye ntɛm. Ɛde nsɛm a wɔadi kan asiesie a ɛfata ma nsɛmma nhoma dwumadi ma. Na nkyerɛwde akɛse a wɔde tintim no ma n’akenkan yɛ mmerɛw. Na ennye ahosiesie pii na obi atumi de adi dwuma ma atu mpɔw. Mmoa ankasa ma (a) wɔn a wɔyɛ foforo a wɔde wɔn ho hyɛ afie afie adwuma mu (b) wɔn a wɔyɛ mmofra (d) wɔn a wonnya kwan pii mfa nsiesie wɔn ho.

Yɛ ɔkwan a wɔfa so de eyi di dwuma wɔ ɔkwan a ɛyɛ tiaa na ɛyɛ tẽe so ho ɔyɛkyerɛ. Ɔdawurubɔfo da ne ho adi na afei obisa sɛ: So woasusuw ho pɛn anaa (afei ofi ase ka Nyan! a ɔde redi dwuma no mu asɛm) . Twɛn na tie nea ofiewura bɛka na afei yi Nyan! no adi; bue asɛm a edi kan no na ka sɛ: “Eyi ne asemmisa a wɔde aba wɔ Nyan! yi mu. Hyɛ nea nkyekyem a edi kan ka no nsow.” (Kenkan) “Migye di sɛ nsɛntitiriw a wɔada no adi wɔ saa asɛm yi mu no bɛyɛ wo nwonwa na w’ani begye ho. Yɛde eyi ne nsɛmma nhoma foforo a ɛka ho bɛma wo de agye mpɛsewa 80 pɛ.” Ofiewura gye.

Bisa atiefo ma wɔnka ɔkwan a wɔafa so de saa asɛm a ɛwɔ Nyan! mu yi adi dwuma ne sɛnea aboa wɔn wɔ nsɛmma nhoma dwumadi mu. Da ɔfã a edi hɔ no adi.

15 min: “Sɛ Muhu Sɛ Eyinom Ba a . . . ”​—Luka 21:31. Yesu ne Bible akyerɛwfo de nsɛnkyerɛnne ne nea yebedi kan ahu wɔ wiase tebea horow mu wɔ “nna a edi akyiri” no mu ho nsɛm maa yɛn. Wɔkaa su horow a nnipa beyi adi akyerɛ mpo ho asɛm siei. (2 Tim. 3:1-5) Ɛdefa nneɛma yi a wɔkaa ho asɛm siei ho no, dɛn na yehu sɛ ɛresisi mpremprem a ebia yebetumi ne nnipa a wɔwɔ yɛn asasesin mu abɔ ho nkɔmmɔ? Wɔ Luka ti 21 no Yesu kaa amanaman ntam akodi (nky. 10) : asasewosow, ɔyaredɔm, aduankɔm, nneɛma a ɛyɛ hu (nky. 11) ; Kristofo a wɔbɛtaa wɔn (nky. 12, 16) : nsɛnkyerɛnne ankasa a ɛbɛba wɔ ahum bere yi mu (nky. 25) ; ehu kɛse a ɛbɛba (nky. 26) ho asɛm. Frɛ atiefo ma wɔnka nea asisi wɔn mpɔtam, wɔn man mu ne amanaman ntam a ɛne nneɛma a wɔka siei no hyia pɛpɛɛpɛ ho asɛm. Nkɔmmɔbɔ no akyi no, ɔpanyin betumi akan atesɛm bi a watwitwa afi atesɛm nkrataa anaasɛ nhoma foforo bi mu a esi asɛm no so dua. Ma atiefo nkyerɛ sɛnea yebetumi de nsɛm a ɛte saa adi dwuma wɔ nkɔmmɔ a yɛne ofiewuranom bɔ mu. Ɛsɛ sɛ yɛyɛ dɛn wɔ nsɛm a esisi wɔ wiase ho? (Luka 21:28, 31, 34-36) Yɛ asɛmti a yɛde bedi dwuma December mu ho ɔyɛkyerɛ tiaa, a nsɛm a asisi nnansa yi ne nea ɛkyerɛ ho asɛntitiriw biako anaa abien ka ho. Ɛnsɛ sɛ wosi nsɛmmɔne a esisi so dua mmoroso, na mmom ɛsɛ sɛ wɔdan adwene kɔ so de si asɛm bi so dua ara kwa. Da ɔfã a etwa to adi.

5 min: Dwom 93 ne mpaebɔ.