Asɛmpa a Wɔbɛka Akyerɛ—Denam Yɛn Nsɛmma Nhoma Ahorow No Mu Nsɛm a Ɛkanyan Anigye Titiriw No So
1 Bere a Yesu ka siei sɛ “wɔbɛka ahenni ho asɛmpa yi wiase nyinaa de adi amanaman nyinaa adanse” no, na n’asuafo no mu biara nni hɔ a na obetumi ahu sɛnea adwuma no mu bɛtrɛw sɛnea wɔatumi ayɛ nnɛ no asie. (Mat. 24:14) Ná tintim mfiri biara nni hɔ saa bere no, na saa ara na na obiara nni hɔ a na obetumi asusuw MEPS (Multilanguage Electronic Phototypesetting System) a mprempren etumi tintim nhoma wɔ kasa horow 186 mu no ho.
2 Ɔwɛn Aban Asafo no nhoma ahorow rema anigyefo nsa aka asɛmpa no wɔ baabiara. Wotintim Ɔwɛn-Aban no wɔ kasa horow 103 mu a sɛ wɔkyekyem a wotintim foforo biara a ɛba no 12,315,000, na mprempren wotintim Nyan! wɔ kasa horow 54 mu na sɛ wɔkyekyem a, wotintim foforo biara a ɛba 10,610,000. Ɛyɛ hokwan a yɛwɔ sɛ yɛde saa nsɛmma nhoma ahorow no bedi dwuma de aka asɛmpa yi akyerɛ “nnipa nyinaa.”—1 Tim. 2:4.
FA NSƐM A ƐKANYAN ANIGYE TITIRIW DI DWUMA
3 Sɛ wo nsa ka nsɛmma nhoma no foforo a, so w’ani gye sɛ wobɛkenkan ne nyinaa na woahu sɛnea Yehowa nam nsɛm a woasiesie no so rema yɛanya nea eye ma yɛn? (Yes. 48:17) Ɛno akyi no, dɛn nti na wunsi asɛm a wobɛpɛ sɛ woka ho asɛm wɔ asɛnka mu no ho gyinae na wonam saayɛ so asiesie wo ho ama ɔsom adwuma no? Ebia wobɛhyɛ biribi a nnipa pɔtee bi a wɔwɔ w’asasesin no mu ani begye ho nsow. Ɔtemmufo bi a ɔwɔ Ohio kyerɛw krataa a ɔde rekyerɛ n’anisɔ kɔmaa Adansefo awarefo bi a wɔde Nyan! bi a na ɛka asanom ne afirika ho nsɛnnennen ho asɛm no bi kɔmaa no no.
4 Nea ɛka nsɛmma nhoma a wode bɛma wɔ afie afie ho no, so wode nsɛm ahorow a nkurɔfo ani begye ho titiriw no kyerɛ wɔ w’adwumam? So wosrasra nnwuma ahorow mu de nsɛmma nhoma kɔma bere a nnipa ngu adwumawuranom no so anaa? So woka nokware no ho asɛm kyerɛ afoforo wɔ mmɔnten so bere a wunya ho no? Anuanom pii a wɔn a ɛyɛ den ma wɔn sɛ wɔbɛforo atrapoe wɔ nkurow akɛse mu nsasesin mu ka ho ayɛ eyi wɔ ɔkwan a etu mpɔn so, na wɔkɔ nnipa a anka worennya wɔn wɔ akwan afoforo so no nkyɛn. Wɔ saa kwan yi so no, wɔde Mmebusɛm 1:20 redi dwuma nnɛ.
NHWƐSO PA A ƐSƐ SƐ YEDI AKYI
5 Bere a Yesu kasa kyerɛɛ Samariani ɔbea a na waba abura no ho rebɛtow nsu no, ɔkae sɛ: “Sɛ wunim nea ose wo sɛ: Ma me bi mennom yi a, anka wubebisa no, na wama wo nkwa nsu.” (Yoh. 4:7-10) Sɛnea na saa ɔbea no nnim Yesu ne nokware a ɛma nkwa a na ɔwɔ no, saa ara na ebia nkurɔfo a wɔwɔ hɔ nnɛ nnim yɛn anaasɛ hia a nkrasɛm a yɛde brɛ wɔn no hia no. Yesu ne nkurɔfo kasae wɔ bere biara a ɛfata mu ne wɔ baabiara—nhwɛso pa a ɛsɛ sɛ yedi akyi!
6 Bere a yedi honhom mu aduan pa a ɛwɔ nsɛmma nhoma ahorow a mfonini ahorow a ɛyɛ fɛ wom a yɛn nsa ka mprempren no mu no, ɛmmra sɛ yɛbɛyɛ nea yebetumi nyinaa na yɛne afoforo akyɛ! Ebia wɔn nso wɔbɛyɛ wɔn ade te sɛnea Samariani ɔbea a ɔkaa eyi kyerɛɛ Yesu no yɛe no: “Owura, ma me saa nsu yi bi ɛ.” Ampa, ebia akyiri yi wɔbɛkyerɛ wɔn a wɔde anisɔ regye saa honhom mu aduan pa yi kwan akɔ “nkwa nsuti” no ho.—Yoh. 4:11-15; Adi. 7:17.