Asɛmmisa Afã

◼ Ɔkwan bɛn so na ɛsɛ sɛ yɛyɛ asafo nnwuma horow?

Nneɛma a ɛkɔ so pɛpɛɛpɛ wɔ Yehowa nkurɔfo asafo mu no nyinaa fi nkabom a wɔn nyinaa de yɛ ade no. (1 Kor. 14:33, 40) Wode, susuw nea egye ansa na wɔayɛ asafo nhyiam biako pɛ no ho hwɛ. Sɛ nhyiam dwumadi no da nkyɛn a, anuanom mmarima ne mmea di kan yɛ nnwuma pii ansa na nhyiam no afi ase na sɛ wɔpɔn nso a wɔyɛ nnwuma horow saa ara. Nnwuma no bi wɔ hɔ a ɛnna adi mma afoforo nhu nanso ɛho hia. Ɔkwan bɛn so na yɛn mu biara betumi aboa ma nhyehyɛe yi akɔ so?

Tu wo ho ma. Wɔn a woyi wɔn yam yɛ ade no benya nnwuma pii ayɛ. (Dw. 110:3) Ma ayarefo ne wɔn a wɔn mfe akɔ anim no asɛm nhia wo. Boa ma wonsiesie Ahenni Asa so. Yebetumi afi yɛn pɛ mu ayɛ nnwuma a mfaso wɔ so pii bere a wɔnhyɛɛ da nka nkyerɛɛ yɛn. Nea ehia ara ne sɛ yebenya ɔpɛ sɛ yɛbɛboa.

Fa ahobrɛase som. Ahobrɛasefo ani gye sɛ wɔsom afoforo. (Luka 9:48) Ahobrɛase remma yɛnnye nnwuma a ɛboro yɛn so mmɔ so. Bio nso, ahobrɛase remma yɛnyɛ ade mmoro nea yɛwɔ hokwan sɛ yɛyɛ so.—Mmeb. 11:2.

Yɛ ɔnokwafo. Wɔhyɛɛ Mose nkuran sɛ ɔmpaw ‘mmarima anokwafo’ mfa asɛyɛde nhyehyɛ wɔn nsa wɔ tete Israel. (Ex. 18:21) Su a ɛte saa ho hia nnɛ nso. Fa ahonim pa yɛ adwuma biara a wɔde bɛma wo no yiye. (Luka 16:10) Sɛ worentumi nyɛ adwuma bi a, hwɛ sɛ wobɛyɛ nhyehyɛe ama obi asi w’ananmu.

Yɛ nea wubetumi nyinaa. Wɔhyɛ Kristofo nkuran sɛ womfi wɔn koma nyinaa mu nyɛ ade wɔ honam fam nnwuma mu mpo. (Kol. 3:22-24) Enti ntease wom sɛ wobɛyɛ saa bere a woreyɛ adwuma de ama nokware som anya nkɔso no. Sɛ ɛreyɛ ayɛ sɛ adwuma a wɔde ama wo no ba fam anaa esua mpo a, yɛ a wobɛyɛ no yiye no bɛboa asafo no.

Adwuma biara a wɔde bɛhyɛ yɛn nsa no ma yenya hokwan da ɔdɔ a yɛwɔ ma Yehowa ne yɛn nuanom adi. (Mat. 22:37-39) Adwuma biara a wɔde bɛhyɛ yɛn nsa no, momma yɛmfa nokwaredi nyɛ.