Munsiesie Mo Ho Yiye Mma Nkaedi No

Hwɛ anigye ne hokwan a Kristo akyidifo anya sɛ wobesiesie wɔn ho yiye ama anadwo a wɔbɛkae Yesu Kristo wu no! (Luka 22:19) Nneɛma a ehia bɛn na ɛsɛ sɛ yɛyɛ de siesie yɛn ho ma Nkaedi no?

◼ Bere ne Beae: Ɛsɛ sɛ wɔma obiara hu bere ne beae pɔtẽẽ a wɔbɛyɛ Nkaedi no. Sɛ asafo bɛboro biako na wobehyiam wɔ Ahenni Asa koro so a, ɛho hia sɛ wofi ase wɔ bere ano na wɔatumi afi hɔ bɔkɔɔ a wɔn ho nkyere wɔn, efisɛ bere a ɛda dwumadi no ntam no sua. Ɛsɛ sɛ wɔbɔ mmɔden na wɔankɔkyere so wɔ abrannaa no so, apon no ano, anammɔn kwan a wɔfa so no so, ne beae a wɔde kar sisi no.

◼ Nsato Krataa: So adawurubɔfo nyinaa nsa aka nsato krataa no bi na wonim nsɛm a ɛwom? So moabobɔ sɛnea mode nsato krataa no bɛma no so? Nnipa bɛn na wobɛma wɔn nsato krataa no bi? Ɛsɛ sɛ wɔbɔ mmɔden sɛ wɔde nsato krataa biara a mowɔ no bɛma.

◼ Kar Ho Nhyehyɛe: Anigyefo ne anuanom mmarima ne mmea binom wɔ hɔ a wobehia nea wɔde bɛfa kar anaa mmoa afoforo na wɔatumi aba Nkaedi no. Nhyehyɛe bɛn na moayɛ a mode bɛboa wɔn?

◼ Paanoo ne Bobesa: Monhwɛ sɛ owia bɛtɔ ansa na mode paanoo ne bobesa no afa nnipa no anim. Ɛsɛ sɛ moyɛ nhyehyɛe de paanoo ne bobesa no bi kɔma wɔn a wɔasra wɔn no mu biara a esiane ahoɔden a onni nti, ontumi mma no. Ɛsɛ sɛ munya paanoo ne bobesa a ɛfata de sisi hɔ ansa na dwumadi no afi ase.—Monhwɛ February 15, 2003, Ɔwɛn-Aban, kratafa 14-15, nkyekyɛm 14, 17.

◼ Ahenni Asa: Ɛsɛ sɛ mudi kan siesie asa no so fɛfɛɛfɛ. Ɛsɛ sɛ mudi kan de mprɛte, glass, ɔpon ne ɔpon so tam a ɛfata kɔ asa no so kɔhyehyɛ. Sɛ mubegye baabi foforo de ayɛ Nkaedi no a, ɛsɛ sɛ mohwɛ sɛ mubenya akasam afiri a ɛfata wɔ hɔ na ama wɔn a wɔbɛba nyinaa atumi ate asɛm a ɔkasafo no bɛka no. Munni kan mpaw wɔn a wobegye ahɔho ne wɔn a wɔde paanoo ne bobesa no bɛfa nnipa no anim, na monkyerɛ wɔn nnwuma a wɔbɛyɛ, ɔkwampa a wɔbɛfa so ayɛ no, ne hia a ehia sɛ wosiesie wɔn ho ma ɛfata.

Sɛ́ ankorankoro anaa asafo no, ɛsɛ sɛ yesiesie yɛn ho yiye ma da titiriw a yɛde bɛkae Yesu Kristo wu no. Akyinnye biara nni ho sɛ, Yehowa behyira wɔn a wobefi wɔn komam akyerɛ nea Yehowa nam ne Dɔba, Yesu Kristo afɔrebɔ no so ayɛ ama adesamma nyinaa no pii.