Yehowa Som Ama Manya Anigye a Na Menhwɛ Kwan, Na Ama Masua Nneɛma Pii

Bere a Wiase Ko a Ɛtɔ So Mmienu no gyina mu no, m’awofo tu fii Estonia kɔɔ Germany, na wɔwoo me wɔ hɔ. Wɔwoo me akyi no, wɔyɛe sɛ wɔbetu akɔ Canada. Ofie a edi kan a yɛkɔtenaa mu wɔ Canada no, na ɛbɛn Ottawa. Ná ɛyɛ ɔdan ketewa bi a ɛhyɛ baabi a nkokɔbuw nso wɔ. Ná ahia yɛn paa, nanso anyɛ hwee koraa no, na yenya nkosua di anɔpa.

Da koro bi, Yehowa Adansefo bi kenkan Adiyisɛm 21:3, 4 kyerɛɛ me maame. Asɛm no kaa ne koma paa, na ofii ase sui. Me maame ne me papa nyinaa suaa Bible no, na ankyɛ koraa na wɔnyaa nkɔso bɔɔ asu.

Ná m’awofo nte Borɔfo papa, nanso wɔamfa nea na wɔresua no anni agorɔ. Ná me papa yɛ adwuma wɔ faktri bi a wɔnan dade wɔ Sudbury, Ontario. Ɛkame ayɛ sɛ, Memeneda biara sɛ ɔkɔyɛ adwuma anadwo mu no nyinaa ba mpo a, na ɔfa me ne me nuabea kumaa Sylvia ka ne ho kɔ asɛnka. Nnawɔtwe biara nso, na yɛn abusua no bom sua Ɔwɛn-Aban no. Me maame ne me papa de Onyankopɔn ho dɔ duaa yɛn mu. Ɛno boaa me ma mihyiraa me ho so maa Yehowa wɔ afe 1956 mu. Saa bere no, na madi mfe 10. Ɔdɔ a emu yɛ den a na m’awofo wɔ ma Yehowa no hyɛ me den bere nyinaa ma mekɔ so som Yehowa.

Miwiee ntoaso sukuu no, nneɛma bi fii ase twetwee m’adwene. Nea na esi m’ani so ne sɛ mɛtena wimhyɛn mu atutu akwan akyinkyin wiase. Enti na ɛyɛ me sɛ mebɛyɛ ɔkwampaefo a, merentumi nnya sika a mede bɛyɛ saa da. Mekɔyɛɛ DJ wɔ radio steehyin bi, na na m’ani gye adwuma no ho paa. Nanso esiane sɛ na meyɛ adwuma anwummere nti, na metaa toto adesua mu. Afei nso, na me ne nnipa a wɔnnɔ Onyankopɔn na ɛbɔ. Ewiee ase no, m’ahonim fii ase haw me, na ɛkaa me ma meyɛɛ nsakrae.

Mitu kɔɔ Oshawa a ɛwɔ Ontario. Mekɔɔ hɔ no, mikohyiaa Ray Norman ne ne nuabea Lesli ne akwampaefo afoforo. Wɔn nyinaa kyerɛɛ me ho anigye. Bere a mihuu sɛnea na wɔn ani gye no, ɛkaa me ma misusuw nea na esi m’ani so no ho. Wɔhyɛɛ me nkuran sɛ menyɛ akwampae adwuma no bi, na mifii ase September afe 1966. M’ani gyei, na na nneɛma nso rekɔ yiye. Nanso na nsɛm bi rebesisi ama m’asetena asesa koraa.

SƐ YEHOWA KA SƐ YƐ BIRIBI A, BƆ MMƆDEN YƐ

Bere a meda so ara wɔ ntoaso sukuu no, mehyehyɛɛ akwammisa krataa sɛ mɛkɔ akɔsom wɔ Canada Betel a ɛwɔ Toronto no. Akyiri yi, bere a na mereyɛ akwampae adwuma no, wɔtoo nsa frɛɛ me sɛ memmɛsom wɔ Betel mfe nnan. Nanso na m’ani gye Lesli ho paa, na na misuro sɛ, sɛ mekɔ Betel a, merenhu no bio. Enti meyeree me ho bɔɔ asɛm no ho mpae paa, na ewiee ase no, mepenee so sɛ mɛkɔ Betel, na mede awerɛhow yɛɛ Lesli baabae.

Mekɔyɛɛ adwuma wɔ baabi a wɔhoro nneɛma wɔ Betel, na akyiri yi mebɛyɛɛ ɔkyerɛwfo. Merekasa yi, na Lesli nso abɛyɛ ɔkwampaefo titiriw wɔ Gatineau a ɛwɔ Quebec. Ná metaa dwen ne ho bisa me ho sɛ, ‘Saa bere yi koraa dɛn na ɔreyɛ?’ Afei nso, na mintumi nhu sɛ gyinae a misii no ye anaa. Da koro bi, anigyesɛm bi a menhwɛ kwan koraa sii. Nneɛma a ama m’ani agye wɔ asetenam paa no, wei ka ho. Ɛne sɛ, wɔtoo nsa frɛɛ Lesli nuabarima Ray sɛ ɔmmra Betel, na wunim, ɔdan a na mete mu no, wɔde no bɛkaa me ho! Ɛno boaa me ma mesan tee Lesli nka. Yɛwaree wɔ February 27, 1971. Ná saa da no yɛ mfe nnan a mikodii wɔ Betel no da a etwa to.

Wɔmaa me ne Lesli kɔsomee wɔ French asafo bi mu wɔ Quebec. Mfe kakra akyi no, wɔtoo nsa frɛɛ me sɛ menkɔyɛ ɔmansin sohwɛfo. Ɛyɛɛ me nwanwa, efisɛ na madi mfe 28. Metee nka sɛ misua, na me ho nkokwawee, nanso asɛm a ɛwɔ Yeremia 1:7, 8 no hyɛɛ me nkuran. Ná Lesli anya kar akwanhyia pɛn. Afei nso na ontumi nna. Enti ɛyɛɛ yɛn sɛ ɛbɛyɛ den sɛ yɛbɛyɛ ɔmansin adwuma no. Nanso ɔkaa sɛ, “Sɛ Yehowa ka sɛ yɛnyɛ biribi a, ɛnsɛ sɛ yɛbɔ mmɔden yɛ anaa?” Enti yɛpenee so, na yɛyɛɛ ɔmansin adwuma no mfe 17 maa yɛn ani gyei paa.

Bere a na meyɛ ɔmansin adwuma no, na adaagye nni po so koraa, enti ɛtɔ da a, na minnya bere mma Lesli. Misuaa biribi. Dwoda anɔpa bi, yɛtee sɛ obi amia yɛn bɛɛl no so. Yepuei no, yɛanhu obiara. Nneɛma a yehui ne baskɛt, ntama a wɔde sɛw pon so, nnuaba, kyiis, paanoo, bobesa, glaas, ne krataa ketewa bi a obiara din nni so a wɔakyerɛw so sɛ, “Fa wo yere pue na munkogye mo ani.” Saa da no, na awia ayi ne ti fɛfɛɛfɛ. Nanso mekyerɛɛ mu kyerɛɛ Lesli sɛ mewɔ ɔkasa ahorow a ɛsɛ sɛ misiesie, enti merentumi nkɔ. Ɔtee ase, nanso ne werɛ howee kakra. Bere a mekɔtenaa pon ho no, m’ahonim fii ase haw me. Asɛm a ɛwɔ Efesofo 5:25, 28 no besii me tirim. Mihui sɛ Yehowa nam saa asɛm no so rekae me sɛ ɛsɛ sɛ mema me yere ani gye. Mebɔɔ mpae, na ɛno akyi no, meka kyerɛɛ Lesli sɛ, “Yɛnkɔ.” Ɛno maa n’ani gyei paa. Yetuu kar kɔɔ asubɔnten bi ho; baabi a yekogyinae no, na ɛhɔ yɛ fɛ paa. Yɛde ntama no sɛw hɔ, na yegyee yɛn ani paa. Yɛbae no, minyaa kwan siesiee me kasa ahorow no nso.

Ná ɔmansin a yɛyɛ mu adwuma no sõ, nanso na yɛn ani gye. Ná ɛhyɛ ase wɔ British Columbia, na na ɛkɔ ara kosi Newfoundland. Meyɛ abofra no, na m’anisoadehu ne sɛ metutu akwan; afei de, na mahu sɛ afi ase reba mu. Ná minya Gilead Sukuu no bi a mɛkɔ, nanso na mempɛ sɛ mɛkɔ akɔyɛ ɔsɛmpatrɛwni wɔ ɔman foforo so. Ná ɛyɛ me sɛ asɛmpatrɛwfo yɛ nnipa soronko, enti na mete nka sɛ memfata. Ɛno da nkyɛn a, na misuro sɛ anhwɛ a wɔde yɛn bɛkɔ Afrika man bi a ɔko ne nyarewa wɔ hɔ so. Ná baabi a mewɔ no ara ye ma me.

PRƐKO PƐ NA WƆTOO NSA FRƐƐ YƐN SƐ YƐNKƆ ESTONIA, LATVIA NE LITHUANIA

Afe 1992 no, aman a kan no na ɛka Soviet Union no ho no, afei de, na Yehowa Adansefo betumi aka asɛmpa no wɔ hɔ. Wɔde too yɛn anim sɛ, yɛn ani begye ho sɛ yɛbɛkɔ Estonia akɔyɛ asɛmpatrɛwfo anaa. Ɛyɛɛ yɛn nwanwa paa, nanso yɛbɔɔ ho mpae. Yɛsan bisaa yɛn ho bio sɛ, ‘Sɛ Yehowa ka sɛ yɛnyɛ biribi a, ɛnsɛ sɛ yɛbɔ mmɔden yɛ anaa?’ Yɛpenee so, na mekaa no me tirim sɛ, ‘Aa, sɛ́ ɛnyɛ Afrika na yɛrekɔ.’

Ɛhɔ ara na yefii ase suaa Estonia kasa. Yedii abosome kakra wɔ ɔman no mu no, wɔka kyerɛɛ yɛn sɛ yɛnkɔyɛ ɔmansin adwuma. Ná ɛsɛ sɛ yɛsom nsafo 46 ne akuw ahorow wɔ Estonia, Latvia ne Lithuania. Afei, na ɛsɛ sɛ yɛkɔ Kaliningrad a ɛwɔ Russia nso. Wei kyerɛ sɛ, na ɛsɛ sɛ yɛbɔ mmɔden sua Latvia, Lithuania ne Russia kasa kakra. Ná ɛnna fam. Ne nyinaa mu no, anuanom ani sɔɔ yɛn mmɔdenbɔ no, na wɔboaa yɛn. Afe 1999 no, wɔnyaa Betel wɔ Estonia, na minyaa hokwan ne Toomas Edur, Lembit Reile, ne Tommi Kauko somee sɛ Baa Boayikuw no mufo.

Anuanom a bere bi wɔtwaa wɔn asu kɔɔ Siberia no, yehyiaa wɔn mu bebree. Ɛmfa ho ateetee a wɔfaa mu wɔ afiase na wɔne wɔn mmusua ntam tetewee no, wɔanyɛ wɔn ho moamoa antew antena da. Anigye a na wɔwɔ no so anhuan, na wɔde nsi ne ahokeka yɛɛ asɛnka adwuma no. Wei boaa yɛn ma yehui sɛ, ɔhaw biara a yebehyia no, sɛ ɛte sɛn oo, sɛ ɛte sɛn oo, yebetumi de anigye amia yɛn ani agyina mu.

Yɛyeree yɛn ho yɛɛ adwuma mfe pii, na na yennye bere mfa nhome papa, enti eduu baabi no, Lesli tee nka sɛ wabrɛ paa. Yɛanhu no amonom hɔ ara sɛ, sɛɛ na ɛyɛ yare bi na na ɛma ɔte nka saa no. Afei yɛyɛɛ yɛn adwene sɛ yɛbɛsan akɔ Canada. Bere a wɔtoo nsa frɛɛ yɛn sɛ yɛmmra sukuu a wɔyɛ ma Baa Boayikuw mufo ne wɔn yerenom wɔ Patterson a ɛwɔ New York, U.S.A. no, ɛyɛɛ me sɛ yɛrentumi nkɔ. Nanso bere a yɛbɔɔ asɛm no ho mpae denneennen no, yɛpenee so kɔe. Yehowa hyiraa gyinae a yesii no so. Ɛyɛ bere a yɛwɔ sukuu hɔ no na adɔktafo hwɛɛ no maa ne ho tɔɔ no. Ɛno nti, yetumi san kɔtoaa yɛn adwuma no so.

PRƐKO PƐ NA WƆSAN TOO NSA FRƐƐ YƐN SƐ YƐNKƆ ƆMAN FOFORO SO

Da koro anwummere bi, wɔ afe 2008 a na yɛasan aba Estonia no, wɔfrɛɛ me fii wiase nyinaa adwumayɛbea ti bisaa me sɛ, yɛn ani begye ho sɛ yɛbɛkɔ akɔtoa yɛn adwuma no so wɔ Congo anaa. Me ho dwiriw me papa; nea ɛmaa me ho dwiriw me kɛse koraa ne sɛ, na ɛsɛ sɛ mema wɔn mmuae da a edi hɔ no ara. Mfiase no, mammɔ so ankyerɛ Lesli, efisɛ na minim sɛ ɔte a, saa anadwo no, ɔrentumi nna. Enti me mmom na mantumi anna, efisɛ nea na ɛhaw me wɔ Afrika a mɛkɔ ho no, anadwo no nyinaa na merebɔ ho mpae.

Ade kyee a mekaa ho asɛm kyerɛɛ Lesli no, yɛkaa sɛ: “Yehowa pɛ sɛ yɛkɔtoa yɛn adwuma no so wɔ Afrika. Enti sɛ yɛankɔ a, yɛbɛyɛ dɛn ahu sɛ yɛkɔ a yɛn ani begye?” Enti bere a yedii mfe 16 wɔ Estonia no, yɛfaa wimhyɛn kɔɔ Kinshasa a ɛwɔ Congo. Betel a ɛwɔ hɔ no, na nnua ne nsensan wɔ hɔ paa, na na ɛhɔ yɛ ahomeka. Yɛrefi Canada no, na Lesli wɔ kaad bi a baabi a yɛbɛkɔ biara ɛka ne ho. Enti yɛbaa ha no, ade a edi kan a ɔde bɔɔ yɛn dan no mu ne saa kaad no. Nsɛm a na ɛwɔ so ne sɛ, “Baabi a wɔbedua wo biara, fifi.” Bere a yɛne anuanom bɔe, yɛyɛɛ Bible adesua ahorow, na yehuu sɛnea asɛmpatrɛw adwuma no yɛ dɛ fa no, yɛn anigye no bi bɛkaa ho. Eduu baabi no, minyaa hokwan somee sɛ asafo ti no nanmusini kɔsrasraa Betel ahorow wɔ aman 13 so wɔ Afrika. Wei ma yehui sɛ anuanom gu ahorow, nanso obiara wɔ suban a ɛyɛ fɛ. Nneɛma a na mfiase no ɛhaw me wɔ Afrika ho no, ne nyinaa tu yerae, na yɛdaa Yehowa ase sɛ ɔde yɛn baa Afrika.

Yɛwɔ Congo no, nnuan a wɔde maa yɛn no, na ebi yɛ mmoawammoawa, na ɛyɛɛ yɛn sɛ yɛrentumi nni. Nanso bere a yehui sɛ anuanom no de anigye redi no, yɛsɔ hwɛe, na yɛn ani gyee ho.

Nkuraase a na ɛwɔ ɔman no atɔe fam no, na atuatewfo akuw bi kɔtow hyɛ mmea ne mmofra a ɛwɔ hɔ no so di wɔn nya. Yenyaa hokwan de honhom fam aduan ne nneɛma a na wɔhia kɔmaa anuanom a na ɛwɔ hɔ no. Ná anuanom no mu pii yɛ ahiafo. Nanso, na wɔwɔ owusɔre no mu anidaso paa, na na wɔdɔ Yehowa. Afei nso, akwankyerɛ biara a Yehowa ahyehyɛde no de bɛba no, na wɔdi so. Wei kaa yɛn koma paa. Wɔn nhwɛso no boaa yɛn ma yɛsan susuw nea enti a yɛresom Yehowa no ho, na ɛhyɛɛ yɛn gyidi den. Ná anuanom no binom afie ne wɔn nnɔbae asɛe. Ɛno ma mekaee sɛnea ahonyade betumi afi yɛn nsa prɛko pɛ no, na ɛma mihui sɛ, yɛne Yehowa ayɔnkofa ne ade a ehia paa. Ɛmfa ho abɛbrɛsɛ yi nyinaa akyi no, na ɛyɛ den sɛ wubehu sɛ anuanom no renwiinwii. Wɔn nhwɛso no boaa yɛn ma yɛde akokoduru gyinaa yɛn yare ne ɔhaw a na yɛrehyia no ano.

YƐKƆKAA ASIA ASETENA HWƐE

Biribi a yɛnhwɛ kwan san sii. Wɔka kyerɛɛ yɛn sɛ yɛnkɔ Hong Kong Betel. Amma yɛn adwene mu da sɛ yɛbɛkɔ akɔtena Asia! Nanso bere a yehui sɛ Yehowa nsa adi aboa yɛn wɔ yɛn dwumadi biara mu no, yɛpenee so. Afe 2013 no, yɛde nisu ne yɛn nnamfo a wɔda yɛn koma so no dii nkra, na yefii Afrika asaase fɛfɛɛfɛ no so a na yennim nea ɛda yɛn anim.

Hong Kong a yɛkɔe no, na nsakrae no sõ, efisɛ na aman horow bebree so nnipa wɔ hɔ, na na ɛhɔ yɛ bagyabagya. Ná Cantonese kasa a wɔka wɔ hɔ no sua nna fam. Nanso anuanom gyee yɛn fɛw so, na yɛn ani begyee ɛhɔ aduan ho paa. Ná adwuma no mu retrɛw ntɛmntɛm, nanso na adan ne nsaase bo kɔ ara na ɛrekɔ soro. Enti Akwankyerɛ Kuw no hwɛɛ ade kɔɔ akyiri, na wɔsii gyinae sɛ wɔbɛtɔn Betel adan dodow no ara. Ɛno akyi bere tiaa bi wɔ afe 2015 mu no, wɔma yɛkɔɔ South Korea, na ɛhɔ na yɛda so ara wɔ resom. Ɛha nso, kasa no nyɛ mmerɛw, na ɛnyɛ nnɛ ne ɔkyena yi ara na yɛn ano bɛtɔ Korea kasa no so. Nanso kakra a yetumi ka no, anuanom kamfo yɛn na ɛma yɛn koma tɔ yɛn yam.

ASUADE A YƐANYA

Ɛnyɛ bere nyinaa na ɛyɛ mmerɛw sɛ yebenya nnamfo foforo, nanso yɛahu sɛ, sɛ yɛto nsa frɛ afoforo sɛ wɔmmɛsra yɛn a, ɛnkyɛ na yɛahu wɔn yiye. Yɛahu nso sɛ, ɛsono onua biara de, nanso yedi nsɛ wɔ nneɛma bebree mu, na Yehowa hyɛɛ da yɛɛ yɛn saa sɛnea ɛbɛyɛ a yebetumi abue yɛn koma mu na yɛanya ɔdɔ ama nnipa bebree.—2 Kor. 6:11.

Yɛahu sɛ, sɛnea Yehowa gye afoforo tom no, ɛsɛ sɛ yɛn nso yɛyɛ saa ara, na yɛhwehwɛ adanse a ɛkyerɛ sɛ Yehowa dɔ yɛn, na ɔrekyerɛ yɛn kwan. Bere biara a yɛn abam bebu anaa yɛbɛte nka sɛ ebinom mpɛ yɛn asɛm no, kaad ne nkrataa a yɛn nnamfo akyerɛw abrɛ yɛn no, yɛsan kenkan. Afei nso, yɛahu sɛ Yehowa atie yɛn mpaebɔ, na ɛno ama yɛanya ne mu awerɛhyem ne ahoɔden a yɛde bɛsom no.

Nkakrankakra, me ne Lesli abehu sɛ, sɛ yenni adaagye sɛ dɛn mpo a, ɛho hia paa sɛ yenya bere ma yɛn ho. Yɛabehu nso sɛ, sɛ yedi mfomso a, ɛsɛ sɛ yɛde bi yɛ serew, ɛnkanka bere a yɛresua kasa foforo no. Anadwo biara nso, yɛbɔ mmɔden sɛ yɛbɛhwehwɛ biribi a yɛn ani gyee ho na yɛada Yehowa ase wɔ ho.

Sɛ mɛka paa a, na mete nka sɛ merentumi nyɛ ɔsɛmpatrɛwni anaa merentumi ntena ɔman foforo so da. Nanso mahu sɛ Yehowa mmoa so no, ade nyinaa betumi ayɛ yiye, na wei ama m’ani agye paa. Wei ma mekae asɛm a odiyifo Yeremia kae no. Ɔkaa sɛ: “O Yehowa, woadaadaa me.” (Yer. 20:7) Anokwa, wama yɛn nhyira bebree a yɛanna anso ho dae da; nea na esi m’ani so sɛ daakye mɛtena wimhyɛn mu atu kwan mpo, wama aba mu. Mmeae a yɛatena wimhyɛn mu atutu akwan akɔ de, meyɛ abofra no, manna annwen ho da; yɛakɔsrasra Betel ahorow wɔ aman pii so. Sɛnea Lesli aboa me na wataa m’akyi wɔ dwumadi biara a yɛanya mu no, m’ani asɔ paa.

Da biara, yɛkae yɛn ho nea enti a yɛreyɛ saa adwuma yi ne onii a yɛreyɛ ama no no. Nhyira a yenya no nnɛ no, ɛyɛ asetena pa a yebenya daakye no ho mpopoe kɛkɛ. Saa bere no, Yehowa ‘bebue ne nsam na wama ɔteasefo biara anya nea ohia nyinaa.’—Dw. 145:16.