Asɔre Mu Mpaapaemu A Ɛwɔ Britania No Ho Abakɔsɛm

Efi Britania “Nyan!” kyerɛwfo hɔ

Asɔre ahorow a ɛwɔ Britania no aka biakoyɛ ho asɛm bɛyɛ mfe pii ni. Ɛnyɛ sɛ wɔreka sɛ ɛsɛ sɛ wogu wɔn mu biako na mmom ɛsɛ sɛ wɔyɛ “nkabom a asɔre biako rennyae ɔkwan a ɔfa so som no, nkɔka ɔfoforo ho.” Wɔn mu biara begye akwan horow a afoforo fa so som na wɔyɛ wɔn asɔre no atom. Wɔabɔ asɔre mu biakoyɛ a ɛte saa no abien ho mmɔden nnansa yi. Biako yɛ ka a Asɔre a ɛwɔ England no ne Roman Katolek bɛka abom; na foforo no ne ka a Asɔre a ɛwɔ England no ne Asɔre ahorow a wɔde wɔn ho no bɛka abom. Nsɛm abien a edi so yi bɛboa yɛn ma yɛahwehwɛ sɛnea ebia asɔre mu biakoyɛ betumi aba wɔ Britania no mu.

ASƆRE mu mpaapaemu a ɛwɔ Britania no yɛ nea ada adi fi teteete. Obiara nnim sɛnea Kristosom duu Britania wɔ afeha a ɛto so abien no mu. Akyiri yi wonyaa asɔre ahorow abien​—Celtic asɔre a na ɛde ne ho ne Roman a na ɛhyɛ paapa no ase no.

Bɛyɛ mfehaha pii no, na akameakamedi a anibere wom nni wɔn ntam, esiane sɛ na ɛsono baabi a asɔre abien no mu biara wɔ wɔ ɔman no mu nti. Nanso ebeduu afeha a ɛto so ason no mu no, wɔn asɛmpatrɛw dwumadi no de akameakame bae. Ná wɔn akameakamedi no fa guasodeyɛ ho, da a wɔde di Easter ne nea ɛte saa ho a ɛnyɛ nea ɛfa nkyerɛkyerɛ ho mmom.

Wɔ 663 Y.B. mu no, Northumbria Hene too nsa frɛɛ afanu no nyinaa sɛ wɔmmra Whitby Bagua nhyiam a na ɔyɛ otitrani no ase. Ɛwom sɛ na n’ankasa kɔ Celtic asɔre no bi de, nanso ɔne Romafo no yɛɛ adwene na Bagua no gye toom. Esiane eyi nti, nkɛntɛnso a na Celticfo wɔ wɔ Britaniafo pii so no yerae wɔ bere tiaa mu. Rome adi nkonim. Bɛyɛ mfirihyia 900 no, ɛkɔɔ so yɛɛ asɔre a nkurɔfo kɔ kɛse na ɛhyɛɛ nyamesom mu tumi a na edi ne amammui mu nkɛntɛnso a na ɛwɔ wɔ nkurɔfo no so no mu den bere nyinaa. Ahantan a ɛkɔɔ so yɛe no maa ahemfo no bo fuwii kɛse na nnipa no ani annye ho.

Wɔn Ho a Wɔtwe Fii Rome Ho

Asɔre ne Ɔman ntam ntawntawdi no baa awiei wɔ afeha a ɛto so 16 no mu wɔ Henry VIII nniso ase. Catherine a ofi Aragon antumi anwo ɔbabarima a obedi n’ade enti ɔde ahopere kɛse pɛe sɛ ogyae no na ɔware Anne Boleyn. Paapa no ampene so sɛ obegu aware no denam ma a ɔbɛma hokwan titiriw bi na ɔde agyae no no so, ɛwom sɛ na eyi yɛ adeyɛ a abu so kɛse wɔ saa bere no mu de. Ɛda adi wɔ asɛm yi mu sɛ amammui ho nsɛm na amma paapa no ampene so. Afei Henry maa Mmarahyɛ Bagua no yɛɛ mmara ahorow a etwaa abusuabɔ nyinaa a wɔne Rome wɔ no mu na wɔyɛɛ no asɔre a ɛwɔ England no so panyin. Enti wɔ 1534 mu no, asɔre no fã a ɛwɔ England no nyaa ahofadi.

Bere a Henry wui no, ne babarima a wadi mfe akron a wɔfrɛ no Edward bɛyɛɛ ɔhene. Wɔpaw mpanyimfo bi sɛ wonni tumi nkosi sɛ obenyin. Na ɛyɛ asɔre a wɔayɛ nsakrae wom a wɔabɔ wɔn tirim sɛ wobeyi abosonsom ne atetesɛm afi nyamesom mu. Nanso Edward wui wɔ mfe asia akyi, na Mary a ɔyɛ Henry yere a odi kan babea no bedii n’ade. Esiane sɛ na Mary yɛ Roman Katolekni mmɔdenbɔfo nti, ɔbɔɔ ne tirim sɛ ɔbɛsan de Asɔre a ɛwɔ England no akɔhyɛ Rome ase. Wɔ 1554 mu no, wotwaa mmara ahorow a etia Rome no mu. Wɔne Rome boom koraa wɔ afe biako akyi. Afei Protestantfo a wɔsɔre tiaa wɔn wɔ atirimɔden so a wɔhyew wɔn mu bɛyɛ 300 wɔ dua ho no dii akyi bae.

Nanso Mary dii hene mfe anum pɛ. Ne nuabea Elizabeth a ɔne no fi agya no sii n’ananmu dii hene na ɔbɔɔ ne tirim sɛ obedi ne papa Henry VIII anammɔn akyi. Wɔ afe biako mu no, Mmarahyɛ Bagua no ma wɔsan gyee mmara a wotwaa mu wɔ Mary nniso ase no toom. Paapa no pam Elizabeth fii asɔre no mu de twee wɔn aso. Afei ɔbɔɔ mmɔden sɛ ɔbɛko afa Britania a Spania Asraafo mmoa ka ho nanso odii nkogu kɛse. Eyi nyinaa ma wɔtaa Katolekfo a wɔampene so sɛ wɔbɛkɔ Anglikanfo asɔre ahorow a wɔyɛe no atirimɔden so. Wokunkum wɔn mu bɛyɛ 250.

Mpaapaemu a Ɛbaa Wɔn Ankasa Mu

Na Asɔre a ɛwɔ England no asan ade ne ho afi Rome ho nanso na ɛnnee ne ho mfii ɔhaw ho. Wɔn ankasa mu paapaee. Wɔn a na wɔwɔ ɔfã biako ne Anglikanfo anaa Asɔre Mpanyimfo a wɔpɛe sɛ wokura Romanfo amanne ahorow a wɔangu no bere a wɔtwee wɔn ho fii Rome ho akyi nyinaa no. Wɔn a na wɔwɔ ɔfã foforo a wɔne Puritanfo anaa Asɔrefo a Wɔba Fam no buu saa amanne horow no sɛ ɛyɛ atetesɛm, emfi kyerɛw nsɛm mu na ɛyɛ abosonsom. Wɔn a na wɔka Puritanfo no ho ne wɔn a pɛ a wɔpɛe sɛ wɔtwe wɔn ho no mu yɛɛ den araa ma enti wogyaw wɔn afie hɔ na wotuu kwan kɔɔ “Wiase Foforo” no mu no. Wɔn a wodii kan no de po so hyɛn a wɔfrɛ no Mayflower na ɛkɔe wɔ September 16, 1620 mu.

Wɔ 1642 mu no, mfe abiɛsa a wotwaa wɔn ho koe no fii ase. Na Charles I a ɔkae sɛ wofi soro de hokwan ama no sɛ onni hene no agu Mmarahyɛ Bagua no na na ne nkutoo redi tumi. Na wɔn a wɔreboa no ne Anglikanfo. Na wɔn a na wɔwɔ ɔfa biako no nso ne Mmarahyɛ Bagua no ne Puritanfo a Oliver Cromwell dii wɔn anim ma wodii nkonim no. Wɔ 1649 mu no, wotwaa Charles ti na ɔman no bɛyɛɛ amansin ahorow a wɔaka abom a amrado di so hene. Wɔ mfe du a edi hɔ no mu no, Mmarahyɛ Bagua no guu Asɔre a ɛwɔ England no na wɔde ɔsom a ɛte sɛ Calvinfo a wɔyɛ Presbyterianfo de a ɛyɛ den no sii ɔkwan a Anglikanfo fa so som no ananmu. Wɔtotow asɔredan ne nkokorafi ahorow a na ɛda so ara wɔ hɔ wɔ ɔko no akyi no mu anaasɛ wobubu gui.

Cromwell baraa Anglikan ne Roman Asɔre no mu amanne ahorow no nanso ɔmaa ɔsom mu ahofadi ho kwan. Enti wɔtetew asɔre ahorow pii a emu pii gui. Nanso kakraa bi a Baptistfo, Quakerfo ne Congregationalfo ka ho no kɔɔ so na abɛyɛ asɔre ahorow a ɛwɔ hɔ nnɛ. Afei wɔ 1738 mu no, John Wesley tew Methodist Asɔre no.

Ankyɛ biara, nkurɔfo a wɔmpɛ ɔkwan a Puritanfo ne Presbyterianfo fa so som a ɛyɛ den no bio no ani annye wɔn ho. Enti wɔ 1660 mu, wɔ Cromwell wu akyi bere tiaa bi no, wɔtoo nsa frɛɛ Charles II sɛ omfi nnomumfa mu mmedi hene. Ɔne Anglikanfo no bɔe a na ɔhwɛ ne ho so yiye nanso ɔyɛɛ n’ade wɔ ahotoso mu na wɔ mfe abien ntam no, onyaa Mmarahyɛ Bagua no ma ɛsan tew Asɔre a ɛwɔ England no bio. Awiei koraa, wɔ 1829 mu no, ɔde hokwan a ɔmanfo wɔ nyinaa maa Roman Katolekfo no.

Enti ɛkame ayɛ sɛ na mfirihyia ahasa a efi 1534 besii 1829 no yɛ nyamesom mu ntawntawdi ne mpaapaemu bere a emu yɛ den wɔ Britania. Na ɛyɛ mpaapaemu bere a wɔde tetew asɔre ahorow ahorow. Efi mfirihyia ahanu a edi hɔ reba de besi nnɛ no, ntawntawdi biara nsɔree esiane sɛ asɔre biara yɛ n’ade sɛnea ɔpɛ nti. Nanso bere a yɛhyɛn afeha a ɛto so aduonu yi mu no, wɔaka biako a wɔbɛyɛ ho asɛm anibere so. Dɛn na aba?

[Kratafa 23 mfoni]

Protestants

Henry VIII 1509-1547

Elizabeth I 1558-1603

Oliver Cromwell 1653-1658

Catholics

Mary I 1553-1558

Charles I 1625-1649

Charles II 1660-1685