“Meyɛ Mogya Tɔw Nko No”

Dodow a onipa sua sɛnea yafunum aba nyin ho ade no, dodow no ara na ohu adanse ahorow a ɛkyerɛ sɛ efi mfiase no, ɛyɛ biribi a ɛwɔ nkwa a ɛrenyin nkakrankakra a ɔwɔ nkate, ɔte asɛm, ohu ade, ɔkeka ne ho na ɔyɛ nneɛma afoforo nso. Nneɛma pii a onipa ahu a ɛkyerɛ sɛ yafunum aba yɛ biribi a ɛsen nkwa mmoawa ara kwa no ma ne ho kɔ so dwiriw no. Anne Beirne da nea wonim mprempren adi wɔ Chatelaine a ɛyɛ Canadafo mmea nsɛmma nhoma bi no mu. Ahokeka: Ɛwom sɛ ebia abofra no maame rente de, nanso ofi ase keka ne ho bere a wanya adapɛn awotwe pɛ no​—na ɛyɛ nea ne koma rebɔ dedaw! “Bere a abofra a ɔrenyin sɛnea ɛsɛ no benya adapɛn 28 no, anyɛ yiye koraa no, na ɔkeka ne ho mpɛn du wɔ nnɔnhwerew 12 biara mu.” Nkate: Ɔte yaw nka bere a wanya adapɛn 16 no. Asɛm a otumi te: Sɛ onya adapɛn 24 a, otumi te sɛ ne maame koma rebɔ na ɔkeka ne ho bere a ɔte nnyigyei a ano yɛ den, nnwom ne nne ahorow no. “Obetumi ahuruw wɔ ɔkwan pɔtee bi so bere nyinaa bere a ɔte ne maame nne no.” Nea ohu: Bere a obenya adapɛn 16 no, na otumi dannan n’aniwa; na bere a obenya adapɛn 24 no, . . . otumi hu hann.”

Efi bere a nkwa foforo no fi ase no, Yehowa nso hu eyi nyinaa​—obi a ɔrenyin nkakrankakra a ɛyɛ nwonwa no. Nnipa a wɔkyerɛ obu ankasa ma nkwa ne ne Fibea no remmu wɔn ani ngu nokwasɛm yi so na wɔrennyɛ wɔn ade te sɛ nea nyinsɛn a woyi gu nyɛ hwee sɛ nkwa mmoawa a woyi wɔn gu ara kwa. Odwontofo no ka kyerɛɛ Yehowa sɛ: “Meyɛ mogya tɔw nko no, w’ani huu me, na wo nhoma mu wɔakyerɛw ne nyinaa, nna a wɔahyɛ asie na emu biako pɛ nnya mmae no.”​—Dwom 139:16.