Wiase Nsɛm

Mmofra a Wɔyɛ Adwuma

Wɔ Wiase Aman a Ɛto so Abiɛsa pii mu no, su ahorow a ɛresakra ne sikasɛm mu tebea horow a ɛkɔ so sɛe ahyɛ mmofra a wɔn dodow kɔ anim bere nyinaa ma wɔagyae sukuukɔ na wɔreyɛ nnwuma ahorow. Sɛnea akontaabu a ILO (Amanaman Ntam Adwumayɛ Kuw) a ɛyɛ Amanaman Nkabom no fã bi a ɛwɔ Geneva, Switzerland, no de ma kyerɛ no, anyɛ yiye koraa no mmofra 100,000,000 a wonnii mfe 15 (ebia ɛyɛ ne mmɔho mpo) na wɔreyɛ adwuma wiase nyinaa. Sɛ sukuukɔ yɛ kwa wɔ wɔn man no mu mpo a, mmofra no nkɔ efisɛ wɔn awofo te nka sɛ ɛrensakra wɔn mma no daakye adwumayɛ. ILO kyerɛ sɛ ‘wɔrentumi mmara mmofra a wɔde wɔn di dwuma ɔkwammɔne so no anaasɛ wɔrentumi nsɔw ano wɔ daakye a ɛda yɛn anim pɛɛ no mu.’

Ɛbere ho Adesua

Easton, Pennsylvania, atesɛm krataa The Express amanneɛbɔ bi se: “Nnipa pii de wɔn asetra bere mu mfe anum gyina santen ahorow mu na wɔde asram asia tra akanea a ɛkyerɛ kar ahorow kwan no ho.” Sɛnea amanneɛbɔ no kyerɛ no, nhwehwɛmu bi a adwumakuw bi yɛe no kyerɛe nso sɛ “sɛ wɔkyekyem a onipa biara de afe biako hwehwɛ nneɛma a wɔamfa anto yiye, . . . ɔde asram awotwe tew nkrataa a ɛho nhia ano, . . . na ɔde mfe abien bɔ mmɔden sɛ ɔne nnipa a ɛte sɛ nea wonni fie bɛkasa telefon so.” Ɔkwan bɛn so na wobetumi atew bere no so na wɔatew nhyɛso no nso so? Nyansahyɛ ahorow a wɔde mae no bi ni: Yɛ akwantu ne ɔkwan a wobɛfa so no ho nhyehyɛe na ama woakwati kyɛ a wobɛkyɛ; nya biribi a wobɛkenkan ne nneɛma afoforo wɔ wo ho bere a wotwɛn no; fa nneɛma gu baabi pɔtee, titiriw no nea wotaa de di dwuma no; na kyerɛkyerɛw nneɛma a ɛho hia sen biara a wobɛyɛ adekyee no wɔ da biara awiei. Ɔkwan foforo so no, nhwehwɛmu no kyerɛe sɛ ‘sɛ wɔkyekyem a, awarefo biara de simma anan na edi nkɔmmɔ a edi mũ da biara, na awarefo a wɔyɛ adwuma de anibu 30 na ɛne wɔn mma kasa da biara.’ Adwumakuw no titrani Michael Fortino se: “Nkurɔfo ka sɛ wɔn mmusua ho hia wɔn, nanso wɔntra ase saa.”

AIDS ho Nsamana

Bere a U.S. Po so Asraafo panyin bi kyerɛ sɛ Po so Asraafo nnuruyɛfo de ɔbarima bi a ɔne mmarima da a ɔwɔ AIDS mmoawa mogya maa ne yere no, wasamana ɔman no nniso no dɔla ɔpepem 55. Sɛnea wɔbɔɔ amanneɛ wɔ The New York Times mu no, Ɔsraani panyin Martin Gaffney kae wɔ nsamana no mu sɛ “Po so Asraafo no anhwɛ ne yere nyinsɛn yiye na ɛmaa abofra no wui ɔyafunu mu, na afei wɔmaa no mogya a ɛmaa ne yere nyaa AIDS mmoawa, afei n’ankasa ne ɔbabarima bi a wɔwoo no akyiri yi no nyinaa nyaa bi.” John a ɔne ɔbabarima no a odii asram 13 no wui wɔ 1986 mu. Ne yere Mutsuko wui afe a edi hɔ no mu. Gaffney se ɔsamanae sɛnea ɛbɛyɛ a obenya sika ama ne babea Maureene a wadi mfe anan a ɛda adi sɛ ɔbɛyɛ ayisaa no.

Wɔpɛ Bible Kɛse

Sɛnea mpanyimfo akwankyerɛ kyerɛ no, ɔdeduani biara a ɔwɔ Britania afiase a obebisa Bible no betumi anya bi kwa. Nnansa yi ara, afiase asɔfo a wɔwɔ Leeds hui sɛ nneduafo pii bisa Bible. So ɛyɛ honhom mu nneɛma ho anigye nkɔanim a wɔanya? Ɛnte saa koraa. Scotland atesɛm krataa Daily Express bɔ amanneɛ sɛ ɛda adi sɛ nneduafo no pii de Bible mu nkrataa no kyekyere sigaret. Wɔ mmɔden a afiase asɔfo no bɔe sɛ wɔbɛkora Bible so mu no, wɔtɔɔ nkrataa a wɔde kyekyere sigaret maa nneduafo no. Nanso ɛda adi sɛ eyi ammoa. Obi a na anka ɔda afiase kae sɛ: “Krataa a ɛwɔ nhoma no mu no ye kɛse sen sigaret nkrataa no.”