Ohia, Ahonya, Ne Ɔsom

Ɔsom ahorow a wɔkyerɛ sɛ wɔyɛ Kristofo no ahonya pii no ahaw nnipa pii wɔ mfe no nyinaa mu. Paapanom, asɔfo mpanyin, ne asɔre mu atitiriw atra ase wɔ apɔmpɔmfe mu a wɔn nguan a wɔn mu dodow no ara te ohia mu no na wɔboa wɔn. Tebea no nsakrae wɔ nnɛ mmere yi mu.

U.S. News & World Report kae nnansa yi sɛ: “Na Kristo yɛ ɔhobrɛasefo a na okyi honam fam ahonya a wɔboaboa ano.” Bere a saa atesɛm nsɛmma nhoma a agye din yi de ne nhwɛso no retoto TV so asɛnkafo asetra kwan ho no, ɛkae sɛ: “Ɔkwan foforo so no, na Bakkernom tete Mercedes-Benz ne Rolls-Royce mu. Oral Roberts wɔ afie wɔ Oklahoma, Beverly Hills ne Rancho Mirage, Calif. Swaggart bɔ Rolex watch a ne bo yɛ dɔla 5,000 na ɔte ofi a esi asase a ne kɛse yɛ susuhama 20 so na ɛsom bo dɔla ɔpepem 2.4 a wɔde ntayaa afasu ne mfoninitwa mfiri a ahintaw bɔ ho ban so. Wɔbɔ amanneɛ sɛ Jacuzzi[asubura kɛse bi a asikafo akɛse nkutoo na wotumi nya] a ɛwɔ adum anan wɔ n’ankasa atrae hɔ.”​—March 7, 1988, kratafa 63.

Sɛ wɔn a wɔkyerɛ sɛ wɔyɛ Kristofo akannifo fa ahonya akɛse asetra kwan a, so ɛrentumi mma fata a wɔfata sɛ Kristo akyidifo no nyɛ afoforo nwonwa, titiriw esiane sɛ Petro kae sɛ Kristo gyaw n’akyidifo “nhwɛso sɛ [wonni] n’anammɔn akyi pɛɛ” no nti anaa?​—1 Petro 2:21, NW.