Wiase Nsɛm

So Ayaresabea Yɛ Asiane?

So ayaresabea ne aduruyɛfo betumi de w’akwahosan ato asiane mu? Ɛda adi pefee sɛ wɔboa nnipa pii sen sɛ wobepira wɔn. Nanso, Harvard Sukuupɔn mu nhwehwɛmu bi daa no adi sɛ ayarefo 2,500,000 a woyii wɔn fii New York ayaresabea wɔ afe biako mu no mu bɛyɛ 100,000 na “wɔaba tebea bɔne mu,” anaa wɔapira esiane ɔkwan a wɔfaa so yɛɛ wɔn aduru no nti na ɛnyɛ ɔyare no. Eyinom mu 27,179 fi anibiannaso. Eyi a etumi ba no ho asiane no yɛɛ kɛse wɔ ayarefo a wɔadi mfe 65 ne nea ɛboro saa no fam. Saara na nhwehwɛmufo a wɔwɔ Germany yɛɛ nhwehwɛmu wɔ nnipa 780 a wowuwui na wɔpaapae wɔn fi 1977 kosi 1990 no mu; nea ekum ayarefo no mu ɔha biara mu nkyem 25 no yɛ nea nnuruyɛfo antumi anhu. Wɔ nyansahu mu nkɔanim nyinaa akyi no, mfomso ahorow a ɛtete sɛɛ no dodow so antew wɔ mfe 13 a wɔyɛɛ mu nhwehwɛmu no mu.

Dwumadi Kɛse ma Amanaman Nkabom No?

Paris atesɛm krataa Le Figaro bɔ amanneɛ sɛ wiase no mu aman a wɔakɔ anim wɔ mfiridwuma mu a wɔwɔ tumi sen biara no ayɛ mmara kwan so mpaemuka bi sɛ Amanaman Nkabom no nya kyɛfa kɛse wɔ asomdwoe a wɔbɛma atra amanaman ntam no mu. Mpaemuka no fa bi se: “Yɛde reyɛ yɛn botae sɛ yɛbɛma Amanaman Nkabom no anya tumi kɛse na atumi abɔ hokwan ahorow a nnipa wɔ no ho ban yiye, ama asomdwoe ne ahotɔ atra hɔ, na asiw basabasayɛ ano.” Mpaemuka no si hia a ehia sɛ wɔyɛ nsakrae wɔ sɛnea ɔman biara de ne ho ho adwene mu no so dua, na egyina Amanaman Nkabom no akyi wɔ ho a ɛde begye nsɛm mu wɔ aman a esiane sɛ wɔnkyerɛ obu mma hokwan ahorow a nnipa wɔ no nti, wɔde wiase asomdwoe to asiane mu no mu.

Afrika Rehu Amane

Nigeria atesɛm krataa Sunday Concord no se “World Health Organization [WHO] no bu akontaa sɛ mmea ɔpepem 1.7 a wɔanya Human Immuno-deficiency Virus (HlV), ɔyare aboawa a ɛma AIDS no mu ɔpepem 1.2 yɛ Afrikafo mmea.” Nkokoaa a mmea yi wo wɔn no ɔha biara mu nkyem 20 kosi 45 betumi anya ɔyare mmoawa yi bi, na ɛkyerɛ sɛ “ebetumi atwe nkɔso a wɔanya wɔ sɛnea wɔbɛma mmofra atumi atra ase na wɔanya nkɔso wɔ mfe aduonu a atwam no mu no asan akyiri.” Wɔ Afrika Apuei Fam ɔman bi mu no, wɔn a wɔanya AIDS no mu ɔha biara mu nkyem 14 yɛ wɔn a wonnii mfe anan.

Sɛnea WHO kyerɛ no, cholera nso “rekunkum nnipa pii” wɔ Afrika aman pii mu. Ɛwom sɛ nnipa dodow a wɔbɔ amanneɛ sɛ aka wɔn no sua sen dodow a ɛkaa wɔn wɔ Amerika Kesee Fam a ɔyaredɔm no sii wɔ hɔ afe a etwaam no mfiase mu no de, nanso akunkum nnipa pii wɔ Afrika sen Amerika. Efi afe a etwaam no mu July 18 reba no, wɔbɔ amanneɛ sɛ akunkum nnipa 3,488. Cholera kaa nnipa bɛboro 11,000 wɔ Zambia, na 981 na wowuwui; ɛkaa bɛboro 7,600 wɔ Nigeria, na 990 na wowuwui; na ɛkaa bɛyɛ 6,500 wɔ Ghana, na 181 na wowuwui.

James C. Ingram a ɔyɛ World Food Program panyin no se esiane osu a ɛntɔ ne nnipa ɔpehaha pii a wɔreguan ɔmanko a ɛrekɔ so wɔ Somalia, Ethiopia, ne Sudan no nti, “nnipa ɔpepem pii rehyia ɔduankɔm.” Wosuro sɛ ɔkɔm no mu bɛyɛ den te sɛ nea ɛbaa saa ɔmantam no mu wɔ 1980 mfe no mfinimfini mu no, bere a ɔkɔm kunkum nnipa ɔpepem ne akyi no.

Mmofra a Wɔyɛ Wɔn Ayayade wɔ Japan

Sɛnea Mainichi Daily News kyerɛ no, “mmofra a wɔn awofo hwe wɔn, wobu wɔn ani gu wɔn so anaa wɔto wɔn mmonnae no dodow rekɔ soro wɔ Japan.” Nea wɔbɔɔ ho amanneɛ no kɔɔ soro mmɔho abiɛsa wɔ mfe anum mu. Sɛnea The Daily Yomiuri, kyerɛ no, bere a kɔlege akyerɛkyerɛfo kuw bi yɛɛ nhwehwɛmu bi wɔ sukuufo mmea 350 a wɔresua nna mu basabasayɛ ho ade mu no, wohui sɛ wɔn a wɔmaa ho mmuae no mu ɔha mu nkyem 68 na wɔtoo wɔn mmonnae wɔ wɔn mmofraase. Nanso, Mainichi Daily News no se ɛmfa ho sɛnea ɔhaw no akɔ akyiri akodu no, “Japanfo nnye ɔhaw no ntom ahe biara, na ɔkwan bi so no, ɛma wohu nokwasɛm a ɛyɛ sɛ na nkokoaa mmarima ne mmea nyinaa a wɔmpɛ wɔn a wokunkum wɔn, ne mmabea a wɔtɔn wɔn ma wɔkɔyɛ tuutuufo no yɛ nneɛma a na abu so de besi afeha yi mfiase.” Nanso, abenfo bɔ kɔkɔ sɛ sɛ wɔanyɛ ho biribi ntɛm a, mmofra a wɔyɛ wɔn ayayade no bɛyɛ nea wontumi nyɛ ho hwee. Mprempren Japan anya ahyehyɛde ahorow pii ne telefon nhyehyɛe bi a wɔnam so de mmoa ma wɔn a nsɛm a ɛte sɛɛ to wɔn no bere nyinaa.

AIDS ma Wɔn a Wɔn Mogya Ntumi Nna Bɔ Hu

AIDS rekunkum wɔn a wɔn mogya ntumi nna a wɔwɔ Spain no. Sɛnea amanneɛbɔ bi a ɛwɔ Madrid atesɛm krataa El País mu kyerɛ no, AIDS akunkum bɛboro 200 dedaw; 300 nso anya ɔyare a ɛyɛ hu no. Tebea no betumi asɛe asen saa. Wɔn a wɔn mogya ntumi nna a wɔn din wɔ aban nhoma mu wɔ Spain no dodow yɛ 2,730, na wɔn a wonni ade a wɔfrɛ no factor VIII wɔ wɔn mogya mu—mogya a entumi nna mu nea abu so sen biara—mu wɔn a wɔreyɛ adu ɔha biara mu 90 anya AIDS ɔyare mmoawa no bi. Aduruyɛ mu abenfo se mogya a wɔde ma wɔ aduruyɛ mu na ɛde awerɛhosɛm yi aba. Nea ɛyɛ anigye ne sɛ wɔ wɔn a wɔn mogya ntumi nna nhyiam bi a wɔyɛɛ nnansa yi ase no, wɔbɔɔ amanneɛ sɛ ɛrenkyɛ na wɔanya factor VIII a wɔde fra mogya nanso ɛnyɛ mogya wɔ Spain.

Kɔkɔbɔ ma Wɔn a Wɔto Owia

Ozone (mframa a ɛsɔn owia ahoɔden so) a ɛwɔ Europa fam no so retew ntɛmntɛm. Sɛnea nsɛmma nhoma New Scientist kyerɛ no, Strastospheric Ozone Review Group (Wɔn a wɔyɛ mframa a atwa asase ho ahyia ho nhwehwɛmu) de amanneɛbɔ bi mae nnansa yi sɛ ozone no so tewee ɔha biara mu nkyem 8 wɔ 1979 ne 1990 ntam. Ɛno yɛ sɛnea nyansahufo kae sɛ ɛso bɛtew no mmɔho abien. Ɛda adi sɛ ozone no so atew pii wɔ Europa sen aman te sɛ New Zealand, Australia, ne South Africa mpo a wɔbɛn ozone “tokuru” a ɛba afe biara wɔ Antartica no. Nnipa pii a wɔwɔ Asase Anafo aman yi mu no de nnuru a esiw owia ahoɔden kwan di dwuma, esiane sɛ owia ahoɔden a ennye (ultraviolet-B) fa ozone mframa a ɛso atew no mu ba nti. Sɛnea England Guardian Weekly kyerɛ no, Britain nyansahufo bi rekamfo akyerɛ sɛ Britainfo nso mfa nnuru yi bi nni dwuma bere a wɔreto owia no.

“Ɛna a Wawo nnua Pii Sen Obiara”

Wɔaka Leontina Judith Espinoza ho asɛm wɔ Guinness Book of World Records mu sɛ “ɛna a wawo mma pii sen obiara wɔ wiase no mu.” Sɛnea Brazil atesɛm krataa O Estado de S. Paulo kyerɛ no, onyinsɛn ne ba a ɔto so 74 bere a wadi mfe 60. Wanyinsɛn mpɛn 35 na wawo mma 73, wɔn mu 39 yɛ ahennasa na 24 yɛ ntafo. Ne mma 61 a wɔda so te ase no mu nea wanyin sen biara no adi mfe 44. Atesɛm krataa no se “Leontina a wɔwoo no wɔ Argentina na wayɛ Chile ɔman ba fi 1963 no ne ne kunu ne wɔn mma 32 te akuraa bi a ɛbɛn Rancagua, bɛyɛ kilomita 90 wɔ Santiago kesee fam no ase.

Basabasayɛ a Wotumi Kra

Nnansa yi ara, Britain nsɛmma nhoma The Economist kasa tiaa Amerikafo adetɔn nhoma bi a ɛde nhoma ahorow a ɛkyerɛ sɛnea wodi nsɛmmɔne ahorow a ɛyɛ hu ho kaseɛbɔ ma. Wɔbɔ amanneɛ sɛ adetɔn nhoma no de nhoma a ekura nsɛmti a edidi so yi na ɛkyerɛ; sɛnea wɔyɛ atopae, atopae a wɔde hyɛ asase mu, ne atuo; sɛnea wɔde asekan ko anaa wɔbɔ atwɛre wɔ asanombea; sɛnea wokum nnipa a wɔnyɛ dede; sɛnea wɔdaadaa nkurɔfo gye wɔn sika; sɛnea wobu dan ani na wɔde mfiri tie afoforo nkɔmmɔbɔ; ne sɛnea wɔde akode sie na wɔde sum ase nneɛma tra ahye. Adetɔn nhoma no de nhoma a ɛkyerɛ sɛnea sɛ nhoma no mu nneɛma a wode bedi dwuma no ma polisifo kyere wo a, ɛsɛ sɛ woyɛ ade no kyerɛ. Ɛwɔ nhoma a ɛkyerɛ sɛnea wobɛyɛ wo ho onipa foforo, sɛnea wubetumi adi sɔhwɛ a wɔde hwehwɛ atorofo mu nkonim, ne sɛnea wɔde mmara di dwuma de kwati atɛntrenee ho nhyehyɛe no.

Cheque mu Nsisi Abu So

Sɛnea atesɛm krataa The Natal Witness kyerɛ no, South Africa rehyia cheque mu nsisi a abu so a ennye koraa sen biara wɔ n’abakɔsɛm mu. Ɛte sɛnea nnipa nnwuma dodow a wɔsamana wɔn esiane sɛ wɔma cheque a ennye nti no akɔ soro ɔha biara mu nkyem 22, fi 4,600 kosi 5,600 ɔsram biara wɔ mfe abien a etwaam no mu. Nanso, akontaabu yi yɛ ɔhaw no fa ketewaa bi kɛkɛ, efisɛ wɔn a wowia cheque ahorow no nka ho; bio nso, sikasɛm mu abenfo bu akontaa sɛ adetɔnfo 4 biara mu 1 pɛ na ɔhwehwɛ mmara mu mmoa bere a wɔama no cheque a ennye no. Afoforo a aka no de ka a wɔbɔ no hyɛ wɔn ho ara kɛkɛ.

Mpaboa Ase a Ɛtra hɔ Daa

Nnipa nyinaa mu henanom na wohia mpaboa ase a ɛkyɛ sen biara? Wobisaa asɛm a ɛte sɛɛ nnansa yi wɔ Britain nyansahu ho nsɛmma nhoma Nature mu wɔ Daedalus afã no ase. Ɛkaa aduru bi a wɔfrɛ no monomer a wɔde bedi dwuma ho asɛm sɛ ebetumi ama wɔanya “tyre bi a n’ankasa yɛ ne ho foforo na ɛnwe da.” Nsɛmma nhoma no kae sɛ, sɛ wodi ho dwuma yiye a, ebetumi ama wɔanya mmirikatu mpaboa a ase no ankasa yɛ ne ho foforo! Nanso, Nature ka sɛ “wɔn a wɔwɔ mmirikatu mpaboa dodow no ara yɛ wɔn a wɔte nkongua mu mmere nyinaa a wɔntaa nnantew mpo.” Enti nsɛmma nhoma no kae sɛ mpaboa ase a “ɛnwe da” sɛɛ no ho bɛba mfaso wɔ wɔn a wɔnantew ankasa—ɔyerenom a wɔhwɛ fie, adetɔnfo, ne Yehowa Adansefo—mpaboa a wɔde yɛ adwuma no ase.”