Baabi a Awofo ne Mmofra Bom Tie Asɛm Sua Ade
EFI NYAN! KYERƐWFO A ƆWƆ JAPAN HƆ
“SƐ́ ADWUMAYƐKUW a yesiesie adwumayɛbea ahorow no, ɛsɛ sɛ yɛn ani wu, nanso ɛte sɛ nea sɛ [musiesie] baabi a, ɛhɔ tew sen yɛn.” Adwumayɛkuw a esiesie Fukuoka Dome Agumadibea a ɛwɔ Japan no panyin kaa eyi wɔ ahohuru bere a etwaam no faa ahosiesie a Yehowa Adansefo yɛ maa wɔn “Ɔsoro Nkyerɛkyerɛ” Ɔmantam Nhyiam no ho. Ná ɔne Tokyo Dome Agumadibea no nso ayɛ adwuma afe a edii eyi anim no bere a wɔyɛɛ Yehowa Adansefo “Hann Kurafo” Ɔmantam Nhyiam wɔ hɔ no, na ne ho dwiriw no kɛse. Bere a wowiee nhyiam ahorow no, na agumadibea hɔ atew sen sɛnea na ɛte ansa na wɔde hɔ rema wɔn no. Ɔtoaa so kae sɛ: “Ná mmofra no su yɛ soronko. Nea metumi aka ara ne sɛ: ‘Ɛda nsow!’”
Afe a etwaam no, wɔyɛɛ “Ɔsoro Nkyerɛkyerɛ” Ɔmantam Nhyiam wɔ Takamatsu Kuropɔn mu nso. Ɔbarima bi a n’ani afi a na ɔrehwɛ nhyiamfo no bisaa wɔn sɛ, “Moyɛ Kristofo?” na afei ɔtoaa so sɛ: “Afe a etwaam no nso moyɛɛ nhyiam, ɛnte saa? Sɛ moyɛ nhyiam no a ɛyɛ a mo mma no kɔ he?” Bere a nhyiamfo no buae sɛ: “Wɔtra wɔn awofonom nkyɛn tie ɔkasa horow no, na wobuebue wɔn ankasa Bible mu” no, ɔbarima no kae sɛ: “Saa na eye! Mihu mo nkurɔfo no ahohuru bere biara, na su pa a mo mma no yi no adi no yɛ me nwonwa bere nyinaa.” Afei ɔkɔɔ so kae sɛ ɛwom sɛ ɔte nkitahodi pa a enni awofo ne wɔn mma ntam ho asɛm de, nanso obetumi agyina Yehowa Adansefo mma nneyɛe so aka sɛ awofo ne mma ntam abusuabɔ a wɔwɔ no ye paa.
Mfitiase sukuu tikyani bi a ɔkɔɔ Yehowa Adansefo ɔmantam nhyiam bi a wɔyɛe wɔ Makuhari Messe ase afe a etwaam no ho dwiriw no wɔ mmofra no su a woyii no adi wɔ nhyiambea hɔ no ho. Wɔ sukuu a ɛsɛ sɛ sukuufo fa afoforo a wɔyɛ aso tie wɔn bere a wɔkasa so sua ade no, na ɔte nka sɛ mmofra no nni ɔpɛ sɛ wɔbɛyɛ aso atie asɛm. Nanso, ohuu biribi foforo wɔ nhyiam no ase. “Saa mmofra no traa ase komm bere tenten. Nea ɛsen saa no, na wokurakura wɔn kyerɛwdua denneenen a wɔrekyerɛkyerɛw nsɛm, na wotumi kyerɛw nkyerɛwde no yiye ɛmfa ho sɛ na wɔrekyerɛw wɔ wɔn srɛ so no. Wɔ sukuu mpo no, Adansefo mmofra no yɛ soronko wɔ mmofra afoforo ho, wɔ ɔkwan a wɔfa so kasa na wotie asɛm ne wɔn ntadehyɛ ne ahosiesie mu.” Afei ɔde kaa ho sɛ: “Misusuw sɛ efi ntetee a wɔde ma wɔn daa, Yehowa a woyi no ayɛ, ne wɔn mmusua a wɔbom yɛ nneɛma wɔ atirimpɔw biako mu no.”
Sɛnea Israelfo no dii ɔsoro mmara a ɛkae sɛ: “Ma ɔman no mmarima ne mmea, mmofra . . . mmɔ gua na wontie, na wonsua” akyi no, Yehowa Adansefo a wɔwɔ hɔ nnɛ, mpanyin ne mmofra nyinaa, mmarima ne mmea, bom hyia na wonya nkyerɛkyerɛ biako. Kyerɛwsɛm a ɛwɔ atifi hɔ no toa so, na ɛkyerɛ nea enti a ɛte saa sɛ: “Wonsua nsuro [Yehowa] wo Nyankopɔn, na wɔnhwɛ mmara yi mu nsɛm nyinaa nni so.”—Deuteronomium 31:12.