Efi Yɛn Akenkanfo Hɔ
Awofo a Wɔn Mfe Akɔ Anim M’ase barima aka mpa mu na ehia sɛ obi na ɔyɛ ne ho biribiara. Esiane sɛ mabrɛ wɔ adwene ne honam mu nti, ɛtɔ da bi a me bo fuw, na mekeka nsɛm bi a ɛma minu me ho akyiri yi. Enti bere a mekenkan nsɛm a ɛfa ‘Awofo a Wɔn Mfe Akɔ Anim Hwɛ ho Asɛnnennen’ ho (April 8, 1994) no, ɛyɛɛ me yaw yiye! Meda mo ase yiye sɛ musiesiee saa nsɛm yi. Nsɛm no bɛboa me bere a mekɔ so yɛ me nnwuma no.
T. H., Japan
Madi mfe 16, na ehia sɛ wɔhwɛ me nanabea nnɔnhwerew 24. Ɔte akyiri bɛyɛ sɛ kilomita 160. Enti, ɛde ɔhaw kɛse abɛto m’abusua no so. Enti mepɛ sɛ meda mo ase wɔ mo nsɛm no ho. Ná ɛhyɛ den yiye.
M. R., United States
Meyɛ adwuma wɔ asetram nsɛm ho adwumayɛkuw bi a ɛboa wɔn a wɔhwɛ awofo a wɔn mfe akɔ anim mu. Mpɛn pii no, me mfɛfo adwumayɛfo no nnye Bible ho nhoma biara a mede ma wɔn no. Nanso, wɔ adwumayɛfo nhyiam bi a yɛyɛɛ nnansa yi ase no, mede saa nsɛmma nhoma no biako maa obiara. Wɔn mu biara gyei! Na mihui sɛ odwumayɛni biako rekenkan wɔ ne pon ho.
B. H., United States
Mokamfo kyerɛɛ pefee sɛ obi nka nkyerɛ ne honam fam nuabarimanom ne nuabeanom sɛ wɔmmoa ɔhwɛ no. Ná misusuw sɛ sɛ wɔka sɛ obi nyɛ mmoa a, obiara rempopo ne ti da. Nanso, mereka akyerɛ mo sɛ, me na mahwɛ m’awofo bɛboro mfe du ni, na sɛ meka kyerɛ me nuanom sɛ wɔmmɛboa a, wɔnyɛ. Yɛte wiase a ɔdɔ nnim na wonnwen afoforo ho mu. Me yam a anka nkurɔfo abehu sɛ w’awofo a wobɛhwɛ wɔn no nyɛ adwuma—ɛyɛ hokwan!
M. D., United States
Kyerɛwnsɛm no ka sɛ abusua mufo a wɔbɛhwɛ wɔn no yɛ asɛyɛde ma Kristofo. “Sɛ obi nhwɛ n’ankasa ne nnipa ne, ne titiriw no, ne fifo a, wapa gyidi, na ɔyɛ onipa bɔne sen nea onnye nni.” (1 Timoteo 5:8)—Samufo.
M’ani sɔɔ afotu a ese ɛsɛ sɛ wunya bere ma wo hokafo ne wo ho no kɛse. Ná mintumi nyɛ eyi bere a atwam no, efisɛ na mete nka sɛ yɛn awofo a yɛbɛhwɛ wɔn no ba ansa na bere a menya ama me kunu—anaa me ho no adi hɔ. Nanso, mahu nyansa a ɛwɔ saa afotu yi mu no, na mɛbɔ mmɔden akari pɛ wɔ eyi mu.
M. O., United States
Otukɔ Madi mfe 14 na mepɛ sɛ meda mo ase wɔ asɛm “Mmofra Bisa Sɛ . . . Dɛn Nti na Ɛsɛ sɛ Yetu?” no ho. (February 22, 1994, Engiresi de) Bere a midii mfe akron no, wɔkae sɛ me papa a ɔyɛ asafo mu ɔpanyin no nkɔ asafo bi a ɛbɛn hɔ mu. Yɛadi bɛboro mfe anan wɔ ha na yɛanya ɔdɔ kɛse ama asafo no. Afei wose me papa nsan nkɔ asafo foforo mu. Da a wɔkaa sɛ yɛnkɔ no na yɛn nsa kaa saa nsɛmma nhoma yi. Ɛboaa me ne me nuabarima ma yegyinaa ano yiye. Ɛyɛ hokwan sɛ wɔbɛka sɛ yentu nkɔ baabi foforo, nanso ɛyɛ den yiye sɛ yebegyaw wɔn a yɛabɛdɔ wɔn no nyinaa hɔ.
L. B., England
Nnipa mu Nyiyim Seesei ara na minyaa hokwan kɛse de kenkan mo August 22, 1993 (Engiresi) de no a ɛfa nsɛm “So Mmusua Nyinaa Bɛyɛ Biako Da Bi?” ho no. Ɔhaw a emu dɔ yi ho adwempa ne ntease a mufi nhumu mu daa no adi no maa me ho dwiriw me na ɛyɛɛ me anigye. Nnansa yi ara na merewie me sukuupɔn adesua wɔ abakɔsɛm ho. Nanso mo nsɛmma nhoma no de ɛho abakɔsɛm tiawa, nkyerɛkyerɛmu, ne ano aduru mae wɔ nkratafa akron pɛ mu! Ɛsen nneɛma a wɔde bɛyɛ asram anan ne fã sua wɔ sukuupɔn adesua nhoma ne nkyerɛkyerɛ nyinaa mu.
R. J., United States