Rwanda Asiane No mu Amanehunufo Ahiade Ho Dwuma A Wodi

WƆAFRƐ Rwanda a ɛwɔ Afrika mfinimfini pɛɛ no, “Switzerland a ɛwɔ Afrika.” Sɛ nkurɔfo te wimhyɛn mu retwam wɔ ɔman no mu a, nhabammono frɔmm a wohu no ma wonya sɛnea na Eden turo no te ho adwene bi. Ɛnyɛ nwonwa sɛ na wɔtaa ka sɛ Rwanda yɛ paradise.

Bere bi no, na wodua nnua abien si dua biako biara a wotwa ananmu. Wɔde da koro sii hɔ afe biara de duaa nnua foforo. Woduaduaa nnua a ɛsow aba wɔ nkwankyɛn. Ná akwanside biara nni ɔman no mu akwantu mu, na na ɛnyɛ den. Ná wɔagu akwantempɔn a efi amantam no mu kɔ Kigali, a ɛyɛ ahenkurow no nyinaa so. Ná ahenkurow no retrɛw ntɛmntɛm. Ná odwumayɛni biara tumi nya sika a ɛfata a ɔde hwɛ ne ho wɔ ɔsram awiei.

Ná Yehowa Adansefo Kristofo dwumadi no nso renya nkɔso wɔ Rwanda. Afe yi mfiase no, na Adansefo bɛboro 2,600 reka Onyankopɔn Ahenni ho asɛmpa no kyerɛ ɔman no mu nnipa a wɔyɛ bɛyɛ ɔpepem awotwe a wɔn mu dodow no ara yɛ Katolekfo no. (Mateo 24:14) Wɔ March mu no, na Adansefo no reyɛ Bible adesua bɛboro 10,000 wɔ nkurɔfo no afie mu. Asafo ahorow 15 na na ɛwɔ Kigali ne ne mpɔtam.

Yehowa Adansefo ɔhwɛfo kwantufo bi kae sɛ: “Wɔ November 1992 no, na mesom asafo ahorow 18. Nanso eduu March 1994 no, na anya nkɔanim akodu 27. Ná akwampaefo (bere nyinaa asomfo) dodow nso renya nkɔanim afe biara.” Wɔ Memeneda, March 26, 1994 no, nnipa dodow a wɔbaa Kristo wu Nkaedi ase yɛ 9,834.

Afei, tebea no sakrae mpofirim wɔ Rwanda ma ɛyɛɛ awerɛhow.a

Asomdwoe a Ɛba Awiei Mpofirim

Wɔ April 6, 1994, bɛyɛ anadwo 8:00 no, Rwanda ne Burundi amampanyin a na wɔn baanu nyinaa yɛ Hutufo no wuwui wɔ wimhyɛn akwanhyia bi mu wɔ Kigali. Wɔtee polisifo abɛn wɔ ahenkurow no mu baabiara saa anadwo no na wosisiw akwan. Afei anɔpatutu no, asraafo ne mmarima a wokurakura nkrante fii ase kunkum nnipa a wɔyɛ Tutsifo. Ná Ntabana Eugène—Yehowa Adansefo kuropɔn sohwɛfo a ɔwɔ Kigali—ne yere, ne babarima, ne ne babea ka nkurɔfo a wodii kan kunkum wɔn no ho.

Ná Yehowa Adansefo abusua bi a wofi Europa ne wɔn afipamfo pii a wɔyɛ Tutsifo asua Bible no. Saa afipamfo no mu baakron guan kɔhyɛɛ Europafo no fie bere a awudifo a wɔn ani so ayɛ hagyahagya kɔɔ afie afie mu no. Simma kakraa bi mu no, afowfo bɛyɛ 40 kɔɔ ofie no mu kɔsɛee nneɛma butubutuw nkongua ne mpa. Nea ɛyɛ awerɛhow no, wokunkum afipamfo a wɔyɛ Tutsifo no. Nanso, ɛmfa ho sɛ afoforo no bɔɔ mmɔden sɛ wobegye wɔn nnamfo no nkwa no, wɔmaa wɔn kwan ma woguan nyaa wɔn ti didii mu.

Nnipakum no kɔɔ so adapɛn pii. Awiei koraa no wobuu akontaa sɛ wokunkum Rwandafo 500,000 anaa nea ɛboro saa. Mpempem pii guan gyee wɔn kra nkwa, titiriw Tutsifo no. Yehowa Adansefo baa dwumadibea a ɛwɔ Zaire no kaa hia a wohia nneɛma no ho asɛm kyerɛɛ anuanom a wɔwɔ France no. Zaire baa dwumadibea no kyerɛkyerɛ mu sɛ: “Yɛsrɛe sɛ wɔmmrɛ yɛn ntade dedaw adaka kɛse biako. Anuanom a wɔwɔ France abrɛ yɛn ntade a emu dodow no ara yɛ foforo ne mpaboa nnaka anum.” Wɔ June 11 no, wɔde ntade bɛyɛ tɔn 65 kɔe. Kenya baa dwumadibea no nso de ntade, nnuru ne Ɔwɛn-Aban nsɛmma nhoma a ɛwɔ aguanfo no kasa mu kɔmaa wɔn.

Eduu July no na asraafo kuw a wɔn mu dodow no ara yɛ Tutsifo, a wɔfrɛ wɔn Rwanda Ɔmampɛ Kuw no adi aban asraafo a wɔn mu dodow no ara yɛ Hutufo no so nkonim. Ɛno akyi no, Hutufo ɔpehaha pii fii ase guan fii ɔman no mu. Basabasayɛ no maa Rwandafo ɔpepem abien anaa nea ɛboro saa guanguan kɔpɛɛ guankɔbea wɔ atrae ahorow a wɔkyekyeree no ahopere so wɔ aman a ɛbemmɛn hɔ mu no.

Wɔbɔɔ Mmɔden sɛ Wɔbɛboa Wɔn Ho Wɔn Ho

Ná nnipa baasia a wɔyɛ adwuma wɔ Yehowa Adansefo Nsɛm Asekyerɛ Adwumayɛbea a ɛwɔ Kigali no mu baanu yɛ Tutsifo—Ananie Mbanda ne Mukagisagara Denise. Mmɔden a Hutu anuanom no bɔe sɛ wɔbɛbɔ wɔn ho ban no tumi yɛɛ yiye adapɛn kakra. Nanso, ɛde rekɔ May 1994 awiei no, wokunkum Adansefo baanu yi a wɔyɛ Tutsifo no.

Yehowa Adansefo de wɔn ho bɔɔ afɔre, de wɔn ankasa nkwa mpo too asiane mu de bɔɔ mmɔden sɛ wɔbɛbɔ wɔn mfɛfo Kristofo a wofi mmusua afoforo mu ho ban. (Yohane 13:34, 35; 15:13) Sɛ́ nhwɛso no, Mukabalisa Chantal yɛ Tutsini. Bere a Rwanda Ɔmampɛ Kuw mufo rehwehwɛ Hutufo wɔ agumadibea a na ɔte no, ɔde ne ho gyee asɛm no mu maa ne nnamfo Hutufo no. Ɛwom sɛ nea ɔyɛe no maa atuatewfo no bo fuwii de, nanso obiako kae sɛ: “Mo Yehowa Adansefo wɔ onuayɛ a emu yɛ den ankasa. Mo som no ne nea eye sen biara!”

Mmusuakuw mu Nitan a Wɔkwati

Ɛno nkyerɛ sɛ Yehowa Adansefo ade wɔn ho koraa afi mmusuakuw mu nitan a atra hɔ mfehaha pii wɔ Afrika beae yi no ho. Ɔdansefo bi a ofi France a na ɔrenya kyɛfa wɔ mmoa adwuma no mu kae sɛ: “Ɛsɛ sɛ yɛn nuanom Kristofo mpo yere wɔn ho kɛse na wɔamfa wɔn ho anhyehyɛ nitan a ama wɔakunkum nnipa pii a wontumi nkyerɛkyerɛ mu no mu.

“Yehyiaa anuanom bi a wokunkum wɔn abusuafo wɔn anim. Sɛ́ nhwɛso no, onuawa Kristoni bi waree akyi nnanu pɛ na wokum ne kunu. Adansefo binom hui sɛ wɔrekunkum wɔn mma ne wɔn awofo. Onuawa bi a ɔwɔ Uganda mprempren huu sɛnea wokunkum n’abusua mũ nyinaa a ne kunu ka ho. Eyi yɛ nkate fam ne honam fam amanehunu a aka Yehowa Adansefo abusua biara ho nhwɛso.”

Sɛ wɔka ne nyinaa bom a, Adansefo bɛyɛ 400 na wokunkum wɔn wɔ mmusuakuw ntam basabasayɛ no mu. Nanso, eyinom mu biara anwu wɔ ne yɔnko Ɔdansefo nsa ano. Nanso Tutsifo ne Hutufo a wɔyɛ Roma Katolek ne Protestant asɔre ahorow no mufo kunkum nnipa mpempem pii. Sɛnea wɔayɛ ho kyerɛwtohɔ yiye no, Yehowa Adansefo a wɔwɔ wiase nyinaa mfa wɔn ho nhyehyɛ wiase yi mu akodi, ɔman anidan, anaa wiase akodi foforo a ɛtete saa no fã biara mu.—Yohane 17:14, 16; 18:36; Adiyisɛm 12:9.

Amanehunu a Enni Kabea

Ahohuru bere a etwaam yi mu no, nnipa a wɔwɔ wiase nyinaa hwɛɛ nnipa amanehunu a ɛkame ayɛ sɛ wonhuu bi da ho mfonini. Wohuu Rwanda aguanfo ɔpehaha pii sɛ wɔresen yuu akɔ aman a ɛbemmɛn hɔ no mu na wɔkɔtratra atrae a ɛhɔ ntew koraa. Yehowa Adansefo no mu biako a ofi France bɛboae kaa tebea a ɔne ne mfɛfo adwumayɛfo kohui wɔ July 30 no ho asɛm sɛnea edi so yi.

“Yehyiaa tebea ahorow a na ɛyɛ hu yiye. Ná afunu deda kwan ho akwansini pii. Wɔde afunu mpempem pii guguu nnipakuw adamoa mu. Ná yentumi nnyina pampan a yɛtee bere a yɛfaa nnipa pii a na wɔayɛ begyabegya mu no ano, na na mmofra redi agoru wɔ afunu ho. Yehuu awofo a wɔawuwu a na wɔn mma a wɔda so te ase hyehyɛ wɔn akyi afunu wɔ hɔ. Tebea horow a ɛtete saa a yehuu no mpɛn pii no nyaa yɛn so tumi kɛse. Ahude ne adesɛe kɛse no ma abasamtu a enni kabea bunkam obi so a ontumi ntra ase a ne werɛ nhow.”

Bere a na aguanfo mpem du du pii resen yuu kɔ Zaire wɔ July mfinimfini mu hɔ no, Adansefo a wɔwɔ Zaire no kɔɔ ɔhye no so, na wɔmomaa wɔn Bible ho nhoma ahorow so sɛnea ɛbɛyɛ a wɔn nuanom Kristofo ne anigyefo betumi ahu wɔn. Afei wɔboaboaa Rwanda aguanfo a wɔyɛ Adansefo no ano na wɔde wɔn kɔɔ Ahenni Asa a ɛwɔ Goma a ɛbɛn hɔ no, baabi a wɔhwɛɛ wɔn. Adansefo a wɔwɔ ayaresa ho nimdeɛ yɛɛ adwuma denneennen de brɛɛ ayarefo no amanehunu ase, ɛmfa ho sɛ na wonni nnuru pii ne nneɛma a ɛfata.

Amanehunu ho Ade a Wɔyɛ no Ntɛmso

Wɔ Fida, July 22 no, Yehowa Adansefo a wɔwɔ France nsa kaa nkra bi a egye ntɛmpɛ a wɔde hwehwɛ mmoa fii Afrika. Ɛkaa wɔn nuanom Kristofo a wɔreguan fi Rwanda no amanehunu a emu yɛ den no ho asɛm. Efi bere a wɔn nsa kaa nkra no akyi bɛyɛ simma anum anaa du pɛ no, anuanom no sii gyinae sɛ wɔde ahiade begu wimhyɛn a ɛfa nneɛma mu. Eyi maa wɔde ɔhyew boaboa nneɛma ano a na ɛyɛ nwonwa kɛse titiriw esiane sɛ na wɔmmoaboaa nneɛma pii saa ano wɔ bere tiaa mu da nti.

Wogyee nsa a wɔto frɛe sɛ wonyi ntoboa nkɔboa no so kɛse. Adansefo a wɔwɔ Belgium, France, ne Switzerland nkutoo yii ntoboa bɛboro $1,600,000. Wɔn nsa kaa ahiade no a na nnuan, nnuru, ne nneɛma a egye nkwa ka ho, na wɔde ne nyinaa guguu nnaka mu kyerɛkyerɛw ho hyehyɛɛ no nsow wɔ Yehowa Adansefo adwumayɛbea a ɛwɔ Louviers, France, ne Brussels, Belgium. Adansefo no yɛɛ adwuma awia ne anadwo de yɛɛ nneɛma no krado sɛ wɔde bɛkɔ Ostend, Belgium. Wɔ wimhyɛn gyinabea hɔ wɔ Wukuda, July 27 no, wɔde nneɛma a emu duru bɛboro tɔn 35 guu wimhyɛn ketewa bi a wɔde fa nneɛma nkutoo mu. Ɛda a edi hɔ no wɔde nneɛma kakraa bi a emu dodow no ara yɛ ayaresa ho nneɛma kɔe. Nnanu akyi a na ɛyɛ Memeneda no, wimhyɛn foforo de ayaresa ho nneɛma pii kɔmaa wɔn a wɔrehu amane no.

Adansefo a wɔwɔ France, a oduruyɛfo bi ka ho, dii nneɛma pii a wɔde kɔɔ hɔ no anim kan kɔɔ Goma. Bere a Oduruyɛfo Henri Tallet duu Goma Dwoda, July 25 no, na kɔlera akunkum Adansefo bɛyɛ 20 dedaw, na na afoforo nso rewuwu da biara da. Esiane sɛ na ɛsɛ sɛ wɔde nneɛma no fa kar twa kwan bɛyɛ kilomita 250 fi Bujumbura, Burundi nti, ammedu Goma araa de kosii Fida anɔpa, July 29.

Yare Ano Gyina

Saa bere no mu no, na wɔaboaboa Adansefo bɛyɛ 1,600 ne wɔn nnamfo ano wɔ asase a Ahenni Asa ketewa no si so wɔ Goma no so. Baabi a wogya wɔn anan biako pɛ na na ɛwɔ hɔ ma saa nnipa yi nyinaa, a na wonni nsu, na aduan ketewaa bi pɛ na wɔwɔ. Wɔde nnipa pii a kɔlera ayɛ wɔn no kɔkyeree so wɔ Ahenni Asa no so. Ná nnipa a wɔrewuwu no redɔɔso.

Kɔlera twe obi mu nsu nyinaa. N’ani yɛ hyɛnn na afei aniwa tuntum no kɔhyehyem. Sɛ wɔde aduru bi a ɛma nipadua nya nsu ma no ntɛm a, ne ho tɔ no wɔ nnanu akyi. Enti, wɔbɔɔ mmɔden ntɛm ara de nnuru a ɛma nipadua nya nsu kakra a wɔwɔ no maa anuanom no.

Afei nso, anuanom bɔɔ mmɔden yiyii wɔn a yare no ayɛ wɔn no fii afoforo no mu sɛnea ɛbɛyɛ a ɛrensan wɔn. Wɔhwehwɛe sɛ woyi aguanfo no fi Goma tebea horow a ɛyɛ hu no mu. Wonyaa baabi a ɛfata wɔ Ɔtare Kivu ho, beae a mfutuma nni na ɛmmɛn afunu pampan a agye mframa mu no.

Wɔbɔɔ tiafi pii, na wɔhyehyɛɛ ahotew ho mmara denneennen. Nea ɛka eyinom ho ne obi nsa a ɔbɛhohoro wɔ ɔsɛn bi a aduru ne nsu wom mu bere a wakogya ne nan awie no. Wosii hia a saa ahyɛde ahorow yi ho hia so dua, na nkurɔfo no penee nea na wɔhwehwɛ fi wɔn hɔ no so. Ankyɛ na owuyare a na ɛretrɛw no ano brɛɛ ase.

Bere a ahiade pii a wɔde faa po so hyɛn no beduu Fida, July 29 no, wɔhyehyɛɛ ayaresabea ketewa bi wɔ Goma Ahenni Asa no so. Wɔhyehyɛɛ mpa a wotumi bobɔ 60, ne afiri a wɔde sɔn nsu so. Nea ɛka ho no, wɔde ntamadan kɔmaa Adansefo a wɔwɔ Ɔtare Kivu ano no. Wɔhyehyɛɛ ntamadan 50 a ɛsesa so fɛfɛɛfɛ bere tiaa bi akyi.

Bere bi, Adansefo 150 ne wɔn nnamfo yaree denneennen. Eduu August dapɛn a edi kan mu no, na wɔn mu bɛboro 40 awuwu wɔ Goma. Nanso wɔde nnuru ne nneɛma ahorow a wɔde boa baa ntɛm begyee nnipa pii nkwa, na wosiw amanehunu pii ano.

Honhom Mufo a Wɔwɔ Anisɔ

Adansefo aguanfo no kyerɛɛ anisɔ kɛse wɔ nea wɔyɛ maa wɔn no nyinaa ho. Ɔdɔ a wɔn nuanom Kristofo a wɔwɔ aman foforo so yii no adi ne adanse a ɛda adi pefee sɛ wɔka amanaman ntam onuayɛ bi ho no kaa wɔn kɛse.

Ɛmfa ho amanehunu a aguanfo no wom no, wɔakura wɔn honhom fam yiyedi mu. Nokwarem no, obi a ɔrehwɛ wɔn kae sɛ “ɛwom sɛ wohia biribiara denneennen de, nanso ɛte sɛ nea honhom fam aduan a wobenya ho hia wɔn sen honam fam mmoa.” Bere a wobisae no, wɔde Wubetumi Atra Ase Daa wɔ Paradise wɔ Asase So nhoma a wɔde sua Bible no 5,000 a ɛwɔ Rwanda kasa Kinyarwanda mu kɔɔ aguanfo atrae ahorow mu.b

Ná aguanfo no susuw Bible mu asɛm bi ho da biara da, na wɔyɛɛ asafo nhyiam horow ho nhyehyɛe. Wɔyɛɛ sukuu adesua ho nhyehyɛe nso maa mmofra no. Akyerɛkyerɛfo de hokwan no kyerɛkyerɛɛ adesua akuw yi ahotew ho ade, na wosii so dua sɛ nkwa mu a wɔbɛkɔ so atra gyina di a wobedi so so.

Ɛho Hia sɛ Wɔkɔ so Hwɛ Wɔn

Sɛ yɛde Goma to nkyɛn a, Adansefo aguanfo ɔhaha pii kɔɔ mmeae afoforo te sɛ Rutshuru. Wɔde mmoa a ɛte saa ara maa saa anuanom yi. Wɔ July 31 no, Adansefo abɔfo baason bi de wimhyɛn fi Goma kɔɔ Bukavu wɔ kesee fam, baabi a na Adansefo aguanfo bɛyɛ 450 wɔ. Ná eyinom mu pii nso fi Burundi. Ná Kɔlera asi wɔ hɔ, na wɔbɔɔ mmɔden de mmoa mae hwehwɛe sɛ onua biara nwu.

Da a edi hɔ no, abɔfo no de kar twaa kwan a ɛreyɛ adu kilomita 150 kɔɔ Uvira, Zaire, baabi a na Adansefo a wofi Rwanda ne Burundi bɛboro 1,600 wowɔ kwan so bɛyɛ mmeae ahorow nson. Wɔde sɛnea wobetumi abɔ wɔn ho ban afi nyarewa ho nkyerɛkyerɛ maa wɔn. Amanneɛbɔ bi a egyina nea abɔfo no hui so ka sɛ: “Nea yɛayɛ de besi nnɛ no nyinaa yɛ mfiase ara kwa, na nnipa 4,700 a yɛreboa wɔn mprempren no behia mmoa foforo asram pii.”

Wɔbɔ amanneɛ sɛ eduu August no na Adansefo ɔhaha pii asan kɔ Rwanda. Nanso ɛkame ayɛ sɛ wɔafow wɔn afie ne wɔn nneɛma nyinaa. Enti adwumaden a ɛwɔ hɔ ne sɛ wobesisi afie ne Ahenni Asa ahorow.

Onyankopɔn asomfo kɔ so bɔ mpae denneennen ma wɔn a wɔahu amane kɛse saa wɔ Rwanda no. Yenim sɛ bere a nneɛma nhyehyɛe yi awiei bɛn kɛse no, basabasayɛ bɛdɔɔso. Nanso, Yehowa Adansefo a wɔwɔ wiase nyinaa bɛkɔ so akura afã biara a wonni sɛ Kristofo no mu na wɔada nokware ayamhyehye adi.

[Ase hɔ nsɛm]

[Asase mfonini wɔ kratafa 12]

(Wopɛ nsɛm a wɔahyehyɛ awie no a, hwɛ nhoma no mu)

RWANDA

Kigali

UGANDA

ZAIRE

Rutshuru

Goma

Ɔtare Kivu

Bukavu

Uvira

BURUNDI

Bujumbura

[Kratafa 15 mfonini]

Benkum so: Wokunkum Ntabana Eugène ne n’abusua. Nifa so: Ɛmfa ho mmɔden a anuanom a wɔyɛ Hutufo bɔe sɛ wobegye Mukagisagara Denise a ɔyɛ Tutsini no nkwa no, wokum no

[Mfonini wɔ kratafa 16, 17]

Atifi hɔ: Ayarefo a wɔrehwɛ wɔn wɔ Ahenni Asa so wɔ Goma. Ase hɔ wɔ benkum so: Nneɛma a wɔde kɔboa bɛboro tɔn 35 a Adansefo siesie de guu wimhyɛn ketewa bi a wɔde fa nneɛma mu kɔe. Ase hɔ: Ɔtare Kivu ho, baabi a wɔde Adansefo kɔe. Ase hɔ wɔ nifa so: Rwanda aguanfo a wɔwɔ Ahenni Asa bi so wɔ Zaire