Honhom Fam Kɔm Wɔ Romania
NSƐM Amanneɛbɔfo Fekuw bi amanneɛbɔ a efi Brasov, Romania, no kae sɛ nnipa ɔpepem 23 a wɔwɔ Romania no mu bɛyɛ ɔha biara mu 90 na wɔyɛ Ortodɔks Asɔre a wɔmaa wɔn kwan ma wodii dwuma wɔ Kɔmunis nniso ase no mufo. Nanso, Daily Record kae sɛ wɔ Canon City, Colorado, U.S.A. no, nnipa pii hu sɛ asɔre no tɔ sin wɔ nneɛma bi mu. Ná ekura asɛmti a ɛne: “Romaniafo Hu sɛ Ortodɔks Asɔre Tɔ Sin Wɔ Nneɛma Mu.”
October a etwaam no, krataa no bɔɔ amanneɛ sɛ, “Alexandru Paleologu, a ɔyɛ nhoma kyerɛwfo ne nyansapɛfo no, kaa ahotoso a wonni wɔ asɔre mpanyimfo mu ho asɛm, na ɔkae sɛ ɔkwan a ɔsom no fa so yɛ n’ade ne aniberesɛm a ɛwom no nhyia. Sɛ nhwɛso no, nkurɔfo yɛ mmeamudua ho sɛnkyerɛnne no, na wɔkyene kɔm wɔ nna a wɔahyɛ ato hɔ mu. Nanso nyinsɛn a wotu gu a asɔre no bu no bɔne no, yɛ ade a abu so.”
Daily Record kae sɛ nnipa pii abɛyɛ Yehowa Adansefo, na ɛkaa nkɛntɛnso a Adansefo no Bible nkyerɛkyerɛ adwuma no anya wɔ abusua bi so ho asɛm sɛ: “Ná Florentina Petrisor kunu yɛ obi a ɔnom nsa yiye, na ɔbea no ka sɛnea na ɔhwe no. Nanso efi bere a awarefo no bɛyɛɛ Yehowa Adansefo no, n’abusua asetra abɛyɛ nea asomdwoe wom.”
Wɔbɔ amanneɛ sɛ, Florentina, ɔdepamfo a wadi mfe 38 no, “gyaee Ortodɔks asɔre no esiane asɔre no asɔfo nkyerɛkyerɛ a enni mu, ne sɛnea kurow a ɔwom no sɔfo yɛ ade dodowpɛfo nti.” Krataa no kyerɛkyerɛɛ mu sɛ: “Petrisor kae sɛ bere a n’ase barima wui no, na ɛsɛ sɛ abusua no tua ɔsɔfo no ka ma no aduan sɛnea ɛbɛyɛ a wɔbɛyɛ n’ayi ma afata, ansa na ɔno Petrison ankasa atumi ama ne mma aduan. Ɔkae sɛ: ‘Ná misusuw sɛ enye.’”
Ɛdefa atosɛm a asɔre no trɛw mu fa Adansefo no ho ho no, Daily Record kae sɛ: “Wɔ Romania no, Ortodɔks asɔre no a asan anya nkɛntɛnso kɛse no boaa aban no ma wotuu Yehowa Adansefo pii fii ahenkurow Bucharest mu ahohuru bere yi mu kɔɔ Transylvanian nkurow a ɛne Brasov ne Cluj mu.”
March 8, 1997, Nyan! no kaa asɔre no satu a ɛde daadaa aban no sɛ entwa amanaman ntam nhyiam ho nhyehyɛe a Adansefo no yɛe wɔ Bucharest wɔ July 1996 mu no ho asɛm. Wubetumi akenkan sɛnea wɔyɛɛ nhyiam foforo a ɛte sɛ ɛno ho nhyehyɛe ntɛm ara wɔ Cluj-Napoca ne Brasov, ne sɛnea nnipa dodow 34,866 kɔe no ho asɛm wɔ saa nsɛmma nhoma no mu. Sɛnea wiase nyinaa tee ho asɛm no yɛ nwonwa. Ɔdansefo nanmusini bi kae sɛ: “Ade a Romania Ortodɔks Asɔre no susuwii sɛ ebesiw yɛn kwan no bɛyɛɛ nea ɛbɛma asɛmpa no anya nkɔso ankasa.”
[Kratafa 31 mfonini]
Nhyiamfo reto nnwom wɔ Brasov nhyiam ase