Neem Dua a Ɛyɛ Nwonwa

EFI NYAN! KYERƐWFO A ƆWƆ NIGERIA HƆ

“AKURAA adugyebea”—saa na nkurɔfo frɛ neem dua wɔ India. Mfe ɔhaha pii na nnipa a wɔwɔ saa man no mu nam neem so ahwehwɛ ahotɔ bere a wɔn honam yɛ wɔn yaw, wonya atiridii, ne nsanyare ahorow no. Esiane sɛ Hindufo pii gye di sɛ neem betumi aboa ma wɔn mogya mu atew nti, wɔwe neem nhaban kakra afe biara mfiase. Nkurɔfo de neem nnubaa twitwiw wɔn sẽ, wɔde neem ahaban mu nsu twitwiw wɔn honam ani nyarewa so, na wɔnom neem tii sɛ ahoɔdennuru.

Nyansahufo ani abegye neem ho kɛse nnansa yi. Nanso, nyansahu mu amanneɛbɔ a n’asɛmti ne “Neem”—A Tree for Solving Global Problems (Neem—Dua a Wɔde Di Wiase Haw Ahorow Ho Dwuma) bɔ kɔkɔ sɛ: “Ɛwom sɛ ɛte sɛ nea yebetumi anya nneɛma pii afi neem mu de, nanso ɛho biribiara nni hɔ a yebetumi asi no pi seesei. Nyansahufo a wɔn ani gye dua no ne nea wobetumi anya afi mu ho kɛse no gye tom sɛ saa bere yi de adanse a wɔde begyina wɔn akwanhwɛ akyi no yɛ nea ennii mũ.” Nanso, amanneɛbɔ no ka nso sɛ: “Wɔahu nneɛma pii a ɛyɛ anigye wɔ akwan pii so wɔ nhwehwɛmu a wɔde mfe aduonu ayɛ mu sɛ ebia saa afifide yi a wonnim ho nsɛm pii no so betumi aba aman a ahia wɔn ne wɔn a wodi yiye nyinaa so mfaso. Nhwehwɛmufo a wɔn ani da hɔ paa no bi reka mpo sɛ ‘ɛfata sɛ yɛfrɛ neem dua a ɛyɛ nwonwa.’”

Dwuma a Edi sɛ Dua

Neem a ɛyɛ dua a ɛwɔ mmeae a osu tɔ na awia bɔ wɔ hɔ kɛse no ka nnua a wɔfrɛ no kwabɔhorɔ no abusua ho. Enyin ma ne tenten kodu mita 30, na ne kɛse tumi du mita 2.5. Esiane sɛ ɛkame ayɛ sɛ nhaban mpa so nti, ɛma onwini afe mũ no nyinaa. Enyin ntɛmntɛm, enhia sɛ wɔtɛw, na etumi nyin yiye wɔ asasenini so.

Wɔde baa Afrika Atɔe fam wɔ afeha yi mfiase sɛ ɛbɛma onwini na asiw Sahara Anhweatam a ɛretrɛw kɔ kesee fam no ano. Kwae ho nimdefo de dua no akɔ Fiji, Mauritius, Saudi Arabia, Amerika Mfinimfini ne Kesee fam, ne Caribbean nsupɔw so nso. Wɔ United States no, wɔadua bi wɔ nsase bi so wɔ Arizona, California, ne Florida a wɔde yɛ nhwehwɛmu.

Nea ɛka onwini a neem ma afe mũ no nyinaa wɔ wim tebea a emu yɛ hyew mu ho ne sɛ wotumi de sɔ gya nso. Afei nso, wɔde ne dua a mfɔte ntumi nwe no sisi adan yɛ dua dwumfo adwuma. Enti, sɛ yegyina dwuma a wotumi de neem di nkutoo so ka ho asɛm a, yɛbɛka sɛ ɛyɛ dua a mfaso wɔ so. Nanso pii ka ho.

Mmoawammoawa Mpɛ

Esiane sɛ Indiafo nim dedaw sɛ neem nhaban pam nkoekoemmoa nti, wɔde ne nhaban hyehyɛ mpikyi, nhoma, nnaka nketewa ne akɛse, ne mpia mu. Wɔ 1959 mu, bere a Germanni nkoekoemmoa ho nimdefo bi ne ne sukuufo hui sɛ mmoadabi ɔpepepem pii awe Sudan nnua biara so nhaban gye neem no, wɔde wɔn ho hyɛɛ neem ho nhwehwɛmu mu.

Efi saa bere no, nyansahufo ahu sɛ neem nnuru a wotumi de yɛ nneɛma pii no tumi nkoekoemmoa bɛboro 200 ne mmoawammoawa, asunson, ntuw, afifide nketewa, ne ɔyare mmoawa pii mpo. Wɔ nhwehwɛmu bi mu no, nhwehwɛmufo no de adua nhaban guu adaka bi mu de Japanfo nwewee guu mu. Wɔde neem mu nsu petepetee nhaban no mu biara fã. Nwewee no wee nhaban no mu biara fã a wɔamfa aduru ampete no, nanso wɔamfa wɔn ano anka afã a wɔde aduru petee no. Nokwarem no, wɔmaa ɔkɔm kunkum wɔn mmom sen sɛ wɔbɛwe nhaban no fã a wɔde aduru apete no kakraa bi mpo.

Nhwehwɛmu ahorow a ɛte saa ma wohu sɛ wobetumi ayɛ nnuru a ekunkum mmoawammoawa a ne bo nyɛ den, a ɛnyɛ awuduru mma nnipa, mmoa, anaa nnomaa, de asi nnuru a ekunkum mmoawammoawa bi ananmu. Sɛ nhwɛso no, wɔ Nicaragua no, akuafo de neem aba a wɔawɔw fra nsu—wɔde n’aba gram 80 fra nsu lita biako mu. Wɔde aba a wɔawɔw no gu nsu mu nnɔnhwerew 12, woyi aba no fi mu na afei wɔde nsu no apetepete nnɔbae so.

Nnuru a wɔde neem ayɛ no nkunkum nkoekoemmoa amonom hɔ ara. Neem nnuru a wɔde pete no sɛe nkoekoemmoa asetra, ma enti awiei koraa no, wontumi nnidi, ntow nkesua, anaa wɔnnaadan. Bere a neem nnuru tumi mmoawammoawa no, ɛte sɛ nea empira nnomaa, mmoa a wɔn mogya ano yɛ hyew, anaa nnipa.

“Akuraa Adugyebea”

Afei, ɛso wɔ mfaso foforo ma nnipa. Nneɛma bi wɔ n’aba ne ne nhaban mu a ɛko tia adeporɔw, yare mmoawa, ne ntuw. Nyansahyɛ ahorow bi wɔ hɔ a ɛkyerɛ sɛ wobetumi de neem ako ahonhon, mogyammoroso, ne akisikuru. Wɔkyerɛ sɛ wɔde nnuru a wonya fi neem mu sa asikreyare ne atiridiinini. Mfaso foforo a ɛka ho bi ne nea edidi so yi:

Nnuru a ɛpam nkoekoemmoa. Neem mu aduru bi a wɔfrɛ no salannin no tumi pam nkoekoemmoa bi a wɔkeka yiye. Aduru a wɔde neem anwa ayɛ a ɛpam nwansena ne ntontom wɔ gua so dedaw.

Ɛsẽ a wodi no ni. Indiafo ɔpepem pii bubu neem dua anɔpa biara, we de twitwi wɔn sẽ. Nhwehwɛmu ada no adi sɛ mfaso wɔ eyi so, efisɛ nnuru bi wɔ ne hono mu a ɛko tia adeporɔw yiye.

Nnuru a wɔde siw awo ano a ɛwom. Neem anwa yɛ aduru a ano yɛ den a ekunkum ahobae mu mmoawa, na ada adi sɛ etumi tew mmoa a wɔde wɔn yɛ nhwehwɛmu awo so paa. Nhwehwɛmu ahorow a wɔde asoroboa yɛe nso da no adi sɛ wobetumi de neem mu nnuru ayɛ aduru a wɔde siw awo ano a wɔmene ama mmarima.

Ɛda adi pefee sɛ neem nyɛ dua hunu bi ara kwa. Ɛwom sɛ wonhuu neem ho nneɛma nyinaa de, nanso ɛda adi sɛ anidaso wɔ hɔ sɛ—wobetumi de asiw mmoawammoawa a wɔsɛe nnɔbae ano ma ayɛ yiye, aboa ma akwahosan atu mpɔn, aboa ma kwae asan ayɛ yiye, na ebia atew nnipa nkyereso so. Ɛnyɛ nwonwa sɛ nkurɔfo afrɛ neem a ɛyɛ nwonwa no “Onyankopɔn akyɛde ma adesamma”!

[Kratafa 25 mfonini ahorow]

“Neem” dua, ne “neem” ahaban a ɛwɔ adaka mu