Ɛyɛ Nhoma a Akyɛ Paa, Nanso Ɛso Wɔ Mfaso Nnɛ

Ebinom akenkan Bible de emu afotusɛm ayɛ adwuma ma ɛso aba wɔn mfaso. Ma yentie nea wɔn mu bi aka.

“Seesei, m’asom dwo me. Memma nsɛm nhyɛ me so, na wei ma m’ani gye paa.”​—Fiona.

“Bible a meresua no aboa me ama mahu nea enti a yɛwɔ wiase, na ama me koma atɔ me yam paa.”​—Gnitko.

“Nneɛma atotɔ yiye wɔ m’asetenam. Seesei memfa adwumasɛm nkyekyere me ho bio, enti minya bere ma m’abusua.”​—Andrew.

Ɛnyɛ saa nnipa yi nko ara na wɔanya Bible so mfaso. Wokɔ wiase baabiara a, nnipa pii ahu sɛ Bible ma yenya akwankyerɛ pa a yebetumi de abɔ yɛn bra da biara da.

Ma yɛnhwɛ sɛnea Bible betumi aboa yɛn ama . . . 

• Yɛanya apɔwmuden

• Yɛanya suban pa

• Yɛne yɛn abusuafo ne yɛn nnamfo ntam ayɛ kama

• Yɛatoto yɛn sikasɛm yiye

• Yɛne Onyankopɔn ntam ayɛ papa

Nsɛm a edidi so wɔ nhoma yi mu no bɛma yɛahu sɛ, Bible nyɛ nhoma kronkron kɛkɛ, mmom ebetumi ama yɛanya akwankyerɛ pa a yɛde bɛbɔ yɛn bra da biara da.