Ntoboa a Wofi Wɔn Pɛ Mu Yi so a Wɔnam Boa wɔ Sika Fam

Nnwuma ahorow a yɛadi kan aka ho asɛm no nyinaa yɛ nea adwumayɛfo a wɔde wɔn ho ama na wɔyɛ na eyi ma ka a wɔbɔ no ba fam. Yehowa Adansefo yɛ afie afie som adwuma no na wɔkyekyɛ nhoma ahorow no a wonnye ho akatua biara. Wɔn ankasa na wotua ka ahorow a wɔbɔ wɔ ho no. Mpanyimfo a wɔhwɛ asafo no so ne asafo mu asomfo a wɔboa wɔn no nnye akatua wɔ wɔn adwuma no ho. Wɔn ankasa na wotua ka ahorow a wɔbɔ wɔ ho no.

Sodikuw no mufo ne afoforo a wɔde wɔn bere nyinaa yɛ adwuma de tintim Bible ne Bible nhoma ahorow no nyinaa nso, wɔma wɔn dabere ne aduan ne sika kakra bi a wɔde tua ɛka ahorow a wɔbɔ no. Saa ara na ɛte wɔ ahwɛfo akwantufo a wɔde wɔn bere nyinaa som no fam.

Yetintim yɛn nhoma ahorow no de boa nnipa a wɔkyerɛ Bible no ho anigye ankasa. Wɔde ntoboa a anigyefo fi wɔn pɛ mu yi na etua ɛho nneɛma, ne tintim, ne mena a wɔde mena no ho ka, na Yehowa Adansefo ankasa de ntoboa, akyɛde horow, ne nea ɛkeka ho boa.

Wɔ Yehowa Adansefo nhyiam ahorow nyinaa ase, sɛ́ ɛyɛ nketewa anaa akɛse no, ntoboa nnaka wɔ hɔ a wɔn a wɔpɛ no betumi akoyi ntoboa. Wɔmmfa prɛte mmfa obiara anim nnyigye sika. Wontua afirihyia-tow anaasɛ ntotoso du du biara. Sɛnea wɔahyɛ ato hɔ wɔ Kyerɛwnsɛm mu no, obiara betumi ayi ntoboa sɛnea wasusuw wɔ ne koma mu no.—2 Korintofo 8:12; 9:7.

• Ɔkwan bɛn so na wɔnam boa Yehowa Adansefo adwuma no nyinaa wɔ sika fam?