Nhyehyɛe a Ɛbɛma Woatu Mpɔn sɛ Ɔkasafo ne Ɔkyerɛkyerɛfo

SƐ́ EBIA wunnyinii anaa wo mfe akɔ anim, sɛ́ woyɛ ɔbarima anaa ɔbea no, adesua yi betumi aboa wo ma woatu mpɔn kɛse wɔ ɔkasa mu na ama woafata yiye sɛ Onyankopɔn Asɛm kyerɛkyerɛfo.

Sukuu sohwɛfo no na ɔbɛkyekyɛ Teokrase Ɔsom Sukuu dwumadi no. Wubehu w’afotu kratasin no wɔ kratafa abiɛsa a edi hɔ no. Akontaahyɛde a ɛwɔ nsɛm no anim no kyerɛ adesua horow a ɛwɔ nkratafa a edidi so no mu. Wɔ saa adesua horow no mu no, wubehu nea ɛbɛma wo ho akokwaw wɔ ɔkasa afã yi ne nkyerɛkyerɛ no mu ne nea enti a emu biara ho hia. Afei nso wubehu ɛho akwankyerɛ a ɛbɛboa wo ma woatumi adi nea wɔkamfo kyerɛ wo no ho dwuma.

Kɔla a ɛwɔ afotu kasa kratasin no so no kyerɛ nneɛma atitiriw a ɛsɛ sɛ wudi ho dwuma wɔ dwumadi te sɛ nea edidi so yi mu (1) atiefo anim akenkan, (2) ɔyɛkyerɛ a nnipa baanu anaa nea ɛboro saa yɛ, anaa (3) ɔkasa a wɔma kyerɛ asafo no. Sukuu sohwɛfo no de nea wubedi ho dwuma no bɛma wo. Ɛyɛ papa sɛ wudi ho dwuma mmiako mmiako. Dwumadi ahorow a ɛwɔ adesua no akyi a wɔkamfo kyerɛ a wobɛyɛ no bɛboa wo. Sɛ wode adanse a ɛkyerɛ sɛ woatumi de afotu a wɔde maa wo wɔ adesua bi ho no adi dwuma ma a, wo fotufo no bɛma wo foforo.

Sɛ wobɛyɛ wo dwumadi no sɛ ɔyɛkyerɛ a, ebehia sɛ wuhu sɛnea wobɛyɛ no. Wɔde sɛnea wɔyɛ dwumadi ahorow no ama wɔ kratafa 82, nanso ɛnkyerɛ sɛ nea wɔde ama no nkutoo na wubetumi de ayɛ adwuma. Wo fotufo no betumi akamfo ɔkwan a wɔfa so yɛ bi akyerɛ wo na ama wo ho akokwaw, anaasɛ obetumi agyaw ama wo ma woapaw bi.

Nhoma yi a wobɛkenkan na woayɛ dwumadi ahorow no wɔ bere a ɛnyɛ sukuu dwumadi na woresiesie wo ho ama no betumi ama woatu mpɔn kɛse. Wubetumi asua adesua asɛm biara awie dapɛn biara anaa nea ɛte saa.

Ɛmfa ho bere tenten a wode anya sukuu no mu kyɛfa anaa wode akɔ asɛnka no, wowɔ pii a wubetumi ayɛ de atu mpɔn. Ɛmmra sɛ wubenya ɔkyerɛkyerɛ a wɔnam Teokrase Ɔsom Sukuu so de ma no so mfaso akosi ase.