Ahenni Adawurubɔfo Bɔ Amanneɛ

Abrabɔ A Ɛhyehyɛ Yɛn Kristofo Som Adwuma No

ƆSOMAFO Petro tu Kristofo fo sɛ: “Mommɔ ɔbra pa amanaman mu.” (1 Petro 2:12) Ɔsomafo Paulo da no adi sɛ yɛnam yɛn abrabɔ pa so “hyehyɛ yɛn agyenkwa Onyankopɔn kyerɛ, ade nyinaa mu.” (Tito 2:10) Yehowa Adansefo a wɔwɔ wiase nyinaa agye din pa wɔ wɔn abrabɔ pa ho. Hyɛ eyi ho nhwɛso binom nsow.

Sɛnea Ɔkyerɛkyerɛfo bi Huu Abrabɔ Pa

◻ Ɔwɛn Aban Asafo no baa dwumadibea a ɛwɔ Costa Rica bɔ amanneɛ sɛ mmofra a wɔwɔ saa ɔman no mu no pii yɛ nhwɛso pa. Onua biako ka nea ɛtwetwee no baa nokware no mu ho asɛm. Ose: “Nea ɛyɛɛ me fɛ titiriw ne mmofra ne mpanyimfo nyinaa abrabɔ pa no, nanso titiriw no mmofra no de. Bere a meyɛ ɔkyerɛkyerɛfo no, minyaa hokwan hwɛɛ me sukuu mu hɔ Adansefo no suban yiye. Na esiane sɛ na me ne Yehowa Adansefo abusua bi te fie nti, mihuu mmofra a wɔwɔ hɔ no nso suban.

“Mihuu nsonsonoe a ɛwɔ sukuufo a wɔyɛ Adansefo ne sukuufo afoforo a wɔnyɛ bi wɔ me sukuu mu no ntam. Adansefo no di wɔn bere so bere nyinaa na wobu ade, wonni atoro, na wɔyɛ dwumadi a wɔde hyɛ wɔn nsa no bere nyinaa. Mihui nso sɛ wodi nokware bere a wɔreyɛ sɔhwɛ, ɛwom mpo sɛ sukuufo afoforo no nni nokware de. Bio nso, wɔapɔw yiye, na wɔde obu ma me sɛ wɔn kyerɛkyerɛfo. Esiane sɛ m’ani gyee Adansefo mmofra a wɔwɔ sukuu mu ne fie a na mete mu no abrabɔ ho nti, mifii ase hwehwɛɛ wɔn ɔsom no mu na awiei koraa no, migyee nokware no toom.”

Nneɛma pa a Kristofo Abrabɔ wɔ Nhyiam bi Ase de Bae

◻ Yehowa Adansefo a wɔwɔ El Salvador atɔe fam asafo bi mu no mu biako pɛe sɛ ɔka Ahenni ho asɛmpa no kyerɛ ne honam fam anuanom mmarima baanu. Obiako tiei na ofii ase ne Yehowa Adansefo suaa Bible no. Na ɔfoforo no kɔ Evangelikal asɔre a wɔfrɛ no Prince of Peace no, na ɔka kyerɛɛ ne nua no sɛ: “Wo ne me nnkasa; woreyɛ Ɔbonsam adwuma.””

Bere a ɔmantam nhyiam bere dui no, nea ɔresua ade no too nsa frɛɛ ne nuabarima no sɛ ɔne no nkɔ nhyiam no. Ne nua no kae sɛ: “Eye, mɛkɔ; mekɔhwɛ nea mede benya Adansefo no ara kɛkɛ.” Enti anuanom baanu no boom kɔɔ nhyiam no. Nnipa bebree a wɔbae, ne sɛnea wɔyɛɛ nneɛma wɔ ano wɔ ano wɔ nhyiam no ase no yɛɛ Evangelikaini no fɛ, na ɔkae sɛ onhuu biribi a ɛte saa da. Okoduu fie no, ɔka kyerɛɛ ne nua no sɛ: “Kyia me.” Ne nua no bisae sɛ: “Ɛno nso kyerɛ dɛn?” Obuae sɛ: “Wode kyia me.” Wokyiaa wɔn nsam, na nea na ɔkɔ Evangelikal asɔre no kae sɛ: “Efi nnɛ rekɔ me ne Yehowa Adansefo besua ade. Nokwarem no, na minnim nea merehwere.” Mprempren ɔno nso yɛ Onyankopɔn Ahenni ɔsɛmpakafo mmɔdenbɔfo a ɔyɛ hyew.