‘Me Ho Hia Onyankopɔn?’

“ME HO hia? Onyankopɔn dwen me ho?” Saa na asɛmti bi a epuee Christianity Today mu kenkan. Philip Yancey a ɔkyerɛw asɛm no ka sɛ: “Me dwumadi sɛ ɔkyerɛwfo no kɛse no ara fa ɛyawdi ho. Mabisa nsɛm koro yi ara mpɛn pii, te sɛ nea mede me nsa rewɔw kudedaw bi a enwu da mu. Mete fi wɔn a wɔkenkan me nhoma hɔ, na wɔn nsɛm a ɛyɛ yaw a wɔka no ma m’adwenem naayɛ no yɛ kɛse.”

Ebia wo nso woasusuw ho pɛn sɛ w’asetra ho hia Onyankopɔn anaa. Oo, ebia wunim Yohane 3:16, a ɛka sɛ “Onyankopɔn dɔ wiase . . . sɛ ɔde ne ba a ɔwoo no koro no mae” no yiye. Anaasɛ ebia woakenkan Mateo 20:28, nea ɛka sɛ Yesu bae ‘de ne kra bɛyɛɛ agyede maa nnipa pii’ no. Ebia wobɛkɔ so abisa sɛ, ‘Onyankopɔn nim me? Odwen me ho sɛ ankorankoro?’ Ntease pa bi wɔ hɔ nti a ɛsɛ sɛ wugye di sɛ ɔyɛ saa, sɛnea yebehu no.