Yɛ Bible Adesua A Enya Nkɔso
1 Bible adesua a yɛbɛyɛ yɛ yɛn Kristofo som adwuma no fã a ɛma akomatɔyam kɛse no biako. Ɛyɛ asɛm a wɔkyerɛw gu koma so. (2 Kor. 3:2, 3) Hwɛ anigye ara a ɛyɛ sɛ yebehu nnipa a yɛne wɔn sua ade no sɛ wonya nimdeɛ, wɔde Bible nnyinasosɛm ahorow di dwuma na wɔma wɔn asetra ne Yehowa trenee ahiade ahorow hyia no!
2 Nanso, fa no sɛ wunhu nkɔso a wohwehwɛ no—adesuafo no nyɛ nsakrae ahorow ntɛm sɛnea wususuw sɛ ɛsɛ sɛ wɔyɛ no na ebia anigye a wɔwɔ no mpo nyɛ kɛse biara. Ebia ɛbɛyɛ nea ɛho hia sɛ wohwehwɛ ɔkwan a wofa so kyerɛkyerɛ no mu hwɛ. So wubetumi ayɛ adesua no wɔ ɔkwan a ɛyɛ anigye kɛse na enya nkɔso so? Ebia nyansahyɛ ahorow a edidi so yi betumi aboa.
ƆKYERƐKYERƐ PA HO NYANSAHYƐ AHOROW
3 Ahosiesie a wubedi kan ayɛ ho hia. Nea ɛka eyi ho ne adesua no mu nsɛntitiriw a wobɛma atra w’adwene mu yiye na woakae Kyerɛwnsɛm a ɛboa no yiye.
4 Ɛsɛ sɛ woma osuani no nsa ka nimdeɛ wɔ ɔkwan a ɛnyɛ den na ntease wom so. Sɛ woyɛ eyi wɔ ɔdɔ, adamfofa ne anifere kwan so a, ɛma osuani no koma tɔ ne yam na otumi sua. Ɛho hia nso sɛ wohwɛ sɛ onya nneɛma a eye a ɛsom bo ma no wɔ nsrahwɛ biara mu. Ɛsɛ sɛ osuani te nka sɛ n’asetra ayɛ nea nneɛma pa wom ne sɛ woama ɔne Onyankopɔn anya abusuabɔ a emu yɛ den.
5 Osuani no a wobɛkyerɛ no sɛnea wosua ade betumi aboa. Ebia nea ɛka eyi ho ne boa a wobɛboa no ma wahu nsɛntitiriw a ɛwɔ asɛm no mu na watwitwa nea ɛho hia no ase. Boa no ma omfi ne koma mu nkasa na ɔmma nsɛm ho mmuae wɔ n’ankasa kasa mu mmom sen sɛ ɔbɛkenkan nsɛm a ɛwɔ nhoma no mu ara kwa. Sɛ woma osuani no nya ɔpɛ sɛ obenya nea mobɛbɔ ho nkɔmmɔ wɔ nsrahwɛ a edi hɔ no mu ho nimdeɛ pii a, ɛbɛma wadi kan asiesie ne ho na ɔnam saa yɛ so anya nkɔso ntɛmntɛm.
6 Onipa no koma mu a wubedu no bɛma wahu sɛnea ade a musuae no fa n’ankasa nkwa ho. Sɛnea ɛbɛyɛ a obedu nnipa no koma mu no, Yesu de nsemmisa dii dwuma na ɛmaa n’atiefo no dwenee. Hwɛ eyi ho nhwɛso wɔ Mateo 16:13-16; 17:24-27 ne Luka 10:25-27. Mfatoho ahorow a wode bedi dwuma nyansam, sɛnea Yesu yɛe no, nso ho wɔ mfaso kɛse. Hwɛ sɛnea mfatoho betumi ama asɛm bi mu ada hɔ yiye.—Hwɛ You Can Live Forever in Paradise on Earth, kratafa 36, nkyekyem 5.
7 Ɛtɔ bere bi a ade a ebetumi asiw Bible osuani nkɔso kwan ne ɔsɔretia. (2 Tim. 3:12) Eyi taa yɛ nea efi n’abusua mufo anaa ne mfɛfo adwumayɛfo hɔ. Ɛho hia sɛ wusiesie osuani no ma ɔtaa a ɛte sɛɛ. Kyerɛ no sɛ wɔhyɛɛ eyi ho nkɔm sɛ ɛbɛba. (Mat. 10:34-39; Luka 21:16-19) Boa no ma onnya adwene a ɛteɛ wɔ wɔn a wɔtaa no no ho. (Mat. 5:43-48; Rom. 12:17) Sɛ ɔtaa no kɔ so ara a, boa no ma onnyina mu denam Kyerɛwsɛm no mu a wubefi akyerɛ no nhwɛso ahorow a ɛfa wɔn a wɔagyina mu ho no.—Hiob 1:20-22; Mmeb. 27:11.
8 Ansa na wubetumi ayɛ adesua a enya nkɔso no, ɛho hia sɛ wunya obi a ɔpɛ sɛ osua. Sɛ wonyɛ Bible adesua mprempren a, dɛn nti na wo ne wɔn a wɔyɛ bi no nkasa na wunsua sɛnea wofi ase no mfi wɔn hɔ. Wubetumi ne ɔdawurubɔfo no akɔ n’adesua no bi ase na woakɔhwɛ sɛnea ɔyɛ no. Ebia eyi bɛboa wo ma woayɛ adesua wɔ ɔkwan a enya nkɔso so, na woakyerɛkyerɛ wɔ ɔkwan pa so. Bɔ Yehowa mpae, srɛ ne mmoa wɔ adesua a wofi ase mu na afei yɛ nea ɛne wo mpaebɔ no hyia. Kɔ anigyefo a wunyaa wɔn no nyinaa nkyɛn. Ebia ebinom a wɔwɔ asafo no mu a wɔn ho akokwaw titiriw wɔ adesua asefi mu no bɛpɛ sɛ wɔboa denam wɔn adesua horow no bi a wɔbɛdan ama afoforo no so. Ɛyɛ nea ɛda adi yiye sɛ bere a yɛn nhoma foforo Live Forever no wɔ hɔ na yɛbɛsan de ama bio wɔ afie afie wɔ August ne September mu no, yebetumi afi adesua pii ase. Sɛ yɛde nyansahyɛ ahorow a wɔde ama wɔ ha no di dwuma yiye a, wɔn a yɛne wɔn sua ade no betumi anya nkɔso ntɛmntɛm wɔ Yehowa som ho.