Asɛmmisa Afã

◼ Ɔkwan pa bɛn na yebetumi afa so ayi ntoboa de aboa yɛn nuanom a wɔaba ahokyere mu wɔ aman afoforo so?

Ɛtɔ da bi a yɛte sɛ yɛn nuanom bi a wɔwɔ ɔman foforo bi so aba ahokyere mu esiane ɔtaa, atoyerɛnkyɛm anaa tebea foforo bi a emu yɛ den nti. Eyi aka anuanom binom ma wɔde sika amane baa dwumadibea a ɛwɔ saa ɔman no so tẽẽ a wɔkyerɛ mu sɛ wɔmfa sika no mmoa onua bi, asafo bi, anaa adansi adwuma pɔtee bi.—2 Cor. 8:1-4.

Ɛwom sɛ ɔdɔ mu a wofi boa yɛn mfɛfo gyidifo saa no fata nkamfo de, nanso ɛtaa ba sɛ nneɛma afoforo bi wɔ hɔ a ehia sɛ wodi ho dwuma ntɛm sen nea ntoboayifo no susuwii no. Ɛtɔ mmere bi mpo a, na anuanom adi nea ɔse wɔmfa ntoboa no nyɛ no ho dwuma dedaw. Yebetumi anya awerɛhyem sɛ wɔde ntoboa a yɛde mane ɔman yi mu baa dwumadibea sɛ wɔmfa mmoa wiase nyinaa adwuma, Ahenni Asa Foto, anaa wɔn a atoyerɛnkyɛm ato wɔn no nyinaa bɛyɛ nea ntoboayifo no aka no.

Wɔde ntetee biara a ɛfata ama anuanom a wɔwɔ baa dwumadibea nyinaa ma wɔatumi ayɛ ntɛm aboa bere a ahokyere bi aba mpofirim no. Wɔ tebea biara mu no, baa dwumadibea no de nea asi no ho amanneɛ kɔbɔ Sodikuw no. Sɛ mmoa foforo hia a, Sodikuw no tumi frɛ aman a ɛbemmɛn hɔ no baa dwumadibea no bi ma wɔkɔboa anaa wɔde sika fi yɛn adwumayɛbea ti hɔ tẽẽ kɔboa.—2 Kor. 8:14, 15.

Enti ɛsɛ sɛ wode ntoboa biara a wode reboa wiase nyinaa adwuma, adansi wɔ aman afoforo so, anaa wɔn a atoyerɛnkyɛm ato wɔn no kɔma baa dwumadibea a ɛhwɛ ɔman a wote mu no. Wubetumi de amane tẽẽ anaa wode afa w’asafo no so. Saa kwan yi so no, “akoa nokwafo ne ɔbadwemma” no tumi fa nhyehyɛe a Sodikuw no ayɛ so hwɛ ma anuanom a wɔwɔ wiase nyinaa nsa ka nea ehia wɔn.—Mat. 24:45-47; 1 Kor. 14:33, 40.