Abusua Nhyehyɛe—Abusua Adesua
1 Sɛ́ Kristoni a woyɛ ɔwofo no, ɔdɔ a wowɔ ma Yehowa no ne akyɛde a ɛsen biara a wubetumi de ama wo mma. Bere titiriw a wubetumi ayɛ eyi ne bere a ‘wote wo fie’ reyɛ dapɛn dapɛn abusua Bible adesua no. (Deut. 6:5-7) Sɛ́ ebia wo hokafo yɛ gyidini, sɛ́ ɛsono w’abusuafo no bi gyidi, anaasɛ woyɛ ɔwofo biako a woretete wo mma no, wubetumi aboa wo mma ma wɔabɛn wo ne Yehowa denam abusua adesua a mobɛyɛ no daa so.
2 Sɛnea Wubefi Ase: Nea edi kan ne sɛ mode adesua a mobɛyɛ sɛ abusua no bɛyɛ mo su. Sɛ munhu bere a mode bɛyɛ adesua no a, dɛn nti na munsusuw eyi ho sɛ abusua? (Mmeb. 15:22) Sɛ wowɔ mmofra nkumaa a, wubetumi ahyehyɛ bere ntiantia pii a mode bɛyɛ adesua no wɔ dapɛn no mu nyinaa. Monhwehwɛ bere a ɛyɛ paa ma mo abusua no. Paw bere pɔtẽẽ a mode bɛyɛ adesua no wɔ mo abusua nhyehyɛe no mu, na si wo bo sɛ wubedi so.
3 Dɛn na mubetumi asua? Ebinom siesie wɔn ho ma nea wobesua wɔ Asafo Nhoma Adesua anaa Ɔwɛn-Aban adesua a edi hɔ no ase. Afoforo sua nhoma a wɔahyɛ da asiesie ama mmabun. Agya bi a ɔwɔ babarima ne ɔbabea bi a wosusua kae sɛ: “Ade biako a ɛma mmofra no ani gye yɛn adesua no ho kɛse wɔ dapɛn no mu ne sɛ yɛde nsɛm a ɛwɔ Me Nhoma a Ɛka Bible Mu Nsɛm mu no yɛ ɔyɛkyerɛ. Ntease a ɛma yenya ne sɛnea enya yɛn so nkɛntɛnso no ho hia sen nkyekyem dodow a yɛbɛkenkan ara kwa.”
4 Monyɛ Adesua no Dapɛn Biara: Ɛsɛ sɛ moyɛ abusua adesua no dapɛn biara a abusua no mufo nyinaa de anigye hwɛ kwan. Ebehia sɛ moyɛ fakaa wɔ da ne bere a mode bɛyɛ adesua no mu na ama moatumi adi tebea a monhwɛ kwan a ɛbɛsɔre ho dwuma. Edu bere bi nso a, ebehia sɛ mosakra nea musua no nso mu. Nanso ɛnsɛ sɛ nsakrae a ehia a mobɛyɛ no twe abusua adesua nhyehyɛe no san bere tenten biara. Wɔ abusua bi mu no, ɔbabea no kae sɛ: “Bere biara a ɛho behia sɛ yɛsesa bere a yɛde yɛ yɛn adesua no, Paapa de bere foforo no bɔ yɛn frigye pon ho sɛnea ɛbɛyɛ a yɛn nyinaa behu bere a yɛde bɛyɛ adesua no.” Hwɛ sɛnea mmɔden a ɛte saa a wɔbɔ de yɛ abusua adesua daa no fata nkamfo! Bere a wokɔ so tete wo mma wɔ “Yehowa nteɛso ne nyansakyerɛ mu” no, woda ɔdɔ a wowɔ ma wɔne yɛn soro Agya no adi.—Efe. 6:4.