Nea Ɛbɛma Yɛatu Mpɔn Wɔ Asɛnka Mu​—Sɛnea Wobɛdannan Ɔkwan a Wofa So Ka Asɛmpa No Mu

NEA ENTI A ƐHO HIA: Wɔn a wɔasra wɔn no ne nguan foforo no reto nsa afrɛ nnipa ahorow nyinaa sɛ wɔmmra “mmegye nkwa nsu kwa.” (Adi 22:17) Saa nsu yi gyina hɔ ma nhyehyɛe biara a Yehowa ayɛ a ɔde begye nnipa asoɔmmerɛwfo afi bɔne ne owu mu. Sɛ yebetumi aboa nnipa ahorow nyinaa ɛmfa ho baabi a wofi ne nea wogye di a, gye sɛ yɛma “daa asɛmpa” no yɛ wɔn akɔnnɔ anaa yɛka asɛm no ma ɛka wɔn koma.—Adi 14:6.

SƐNEA WOBƐYƐ NO:

• Paw asɛm ne kyerɛwsɛm bi a ɛbɛkã nnipa a wɔte w’asaasesin mu no koma. Wubetumi apaw nsɛm a yebetumi aka wɔ asɛnka mu no bi, anaa asɛm bi a woahyɛ no nsow sɛ, sɛ wode di dwuma a, nkurɔfo ani gye ho. Nsɛm ne kyerɛwnsɛm bɛn na wode di dwuma a, nkurɔfo ani gye ho paa? Nsɛm bɛn na asisi nnansa yi a ɛda nkurɔfo ano? Sɛ wuhyia ɔbea anaa ɔbarima a, asɛm bɛn na wohwɛ a, n’ani begye ho?

• Hwɛ sɛnea mpɔtam hɔfo kyia ne sɛnea wɔyɛ wɔn ade. Wei bɛboa wo ama woahu sɛnea wo ne wɔn bɛbɔ nkɔmmɔ.—2Ko 6:3, 4

• Nhoma ne video a ɛwɔ Nnwinnade Titiriw a Yɛde Kyerɛkyerɛ no mu no, hu mu yiye, na sɛ ɛba sɛ wo ne obi bɔ nkɔmmɔ na n’ani gye ho a, woatumi de bi akyerɛ no

• Nnipa a ebia wubehyia wɔn wɔ w’asaasesin mu no, wubetumi atwe nhoma ne video ahorow a wopɛ sɛ wode yɛ adwuma no bi wɔ wɔn kasa mu

• Fa w’ani to fam na hwɛ asɛm a ɛbɛboa ofiewura no, na wo ne no mmɔ ho nkɔmmɔ. (1Ko 9:19-23) Sɛ nhwɛso no, fa no sɛ woate sɛ ofiewura no ho nipa bi wui nkyɛe. Asɛm bɛn na anka wobɛka akyerɛ no?

HWƐ VIDEO NO. WUWIE A, BUA NSƐMMISA A EDIDI SO YI:

• Ɔdawurubɔfo no hyiaa ofiewura no, asɛm bɛn na ɔne no bɔɔ ho nkɔmmɔ?

• Dɛn na na ɛrekɔ so wɔ ofiewura no asetena mu?

• Wohwɛ tebea a ɔdawurubɔfo no hyiae no a, kyerɛwnsɛm no mu nea ɛwɔ he paa na anka ɛsɛ sɛ ɔde yɛ adwuma? Adɛn ntia?

• Wuhyia obi a ɛsono ne nsɛm tebea wɔ w’asaasesin mu a, sɛn na ɛyɛ a wodannan wo nsɛm mu ma ɛyɛ akɔnnɔ sɛ obetie wo?