Nea Ɛbɛma Yɛatu Mpɔn Wɔ Asɛnka Mu​—Di Anifuraefo Adanse

NEA ENTI A ƐHO HIA: Wɔn a wɔn ani afura no mu pii wɔ hɔ a, wɔn ani nnye ho sɛ wɔne obi a wonnim no bɛbɔ nkɔmmɔ. Wei nti, egye mmɔdenbɔ paa na yɛatumi adi wɔn adanse. Yehowa dwen anifuraefo ho paa. (Le 19:14) Yɛn nso, sɛ yɛyere yɛn ho sɛ yɛbɛboa anifuraefo ama wɔne Yehowa afa adamfo a, ɛkyerɛ sɛ yɛresuasua Yehowa.

SƐNEA WOBƐYƐ NO:

• ‘Hwehwɛ’ wɔn a wɔn ani afura. (Mt 10:11) Wunim obi a ne busuani bi ani afura? Sɛ wohwɛ w’asasesin mu a, mowɔ anifuraefo sukuu bi anaa adwumakuw bi a wɔhwɛ anifuraefo a wobehia anifuraefo nhoma anaa?

• Ma onhu sɛ wudwen ne ho. Sɛ wuhyia obi a n’ani afura na woma ohu sɛ wudwen ne ho, anaa ne ho hia wo a, ɛbɛma ne koma atɔ ne yam. Wubetumi ne no abɔ biribi a ɛrekɔ so wɔ mpɔtam hɔ ho nkɔmmɔ

• Ma anifuraefo nsa nka yɛn nhoma ahorow a ɛbɛboa wɔn ama wɔabɛn Yehowa. Yehowa ahyehyɛde no ayɛ anifuraefo nhoma ahorow a wubetumi de aboa wɔn a wɔn ani afura ne wɔn a wonhu ade papa no. Bisa no sɛ, sɛ ɔpɛ sɛ osua ade a, ɔyɛ no sɛn? Ɛsɛ sɛ ɔsom adwuma sohwɛfo no hwɛ hu sɛ, onua a ɔhwɛ nhoma so no akra nhoma a onifuraefo no hia