Sɛ Yehowa Teɛ Obi So Na Yegye Tom a, Ɛkyerɛ Sɛ Yɛwɔ Ɔdɔ

Sɛ wotu obi fi asafo no mu a, ɛbɔ asafo no ho ban; ɛsan nso yɛ nteɛso ma ɔbɔnefo a wannu ne ho no. (1Ko 5:6, 11) Ɛwom, sɛ wotu obi fi asafo no mu a, ɛma n’abusuafo a wɔbɛn no ne mpanyimfo a wodii n’asɛm no di yaw, nanso sɛ Yehowa de nteɛso a ɛte saa ma onipa no, na yegye tom a, ɛkyerɛ sɛ yɛwɔ ɔdɔ. Adɛn nti na yɛreka saa?

Nea edi kan, ɛkyerɛ sɛ yɛdɔ Yehowa, na ne din a ɛho bɛtew no ho hia yɛn. Afei nso, yɛpɛ sɛ asafo no ho tew. (1Pe 1:14-16) Bio nso, ɛkyerɛ sɛ yɛdɔ onipa a wɔatu no no. Ɛwom, saa nteɛso no yɛ yaw, nanso akyiri yi, ebetumi asow “asomdwoe aba a ɛne trenee” kyerɛ sɛ, biribi pa betumi afi mu aba. (Heb 12:5, 6, 11) Enti sɛ wotu obi anaa obi twe ne ho fi asafo no ho na yɛne no bɔ a, ɛkyerɛ sɛ yennye Yehowa nteɛso ntom. Momma yɛnkae sɛ, sɛ obi yɛ bɔne a, nteɛso a Yehowa de bɛma biara “fata.” (Yer 30:11) Enti sɛ wɔteɛ obi so, na yegye tom na yɛamma ansɛe anigye a yɛde resom Yehowa a, ɛkyerɛ sɛ yɛwɔ anidaso sɛ daakye, nea wɔatu no no betumi asan aba mmɔborɔhunu Agya no nkyɛn.—Yes 1:16-18; 55:7.

HWƐ VIDEO A YƐATO DIN FA KOMA MŨ DI YEHOWA NOKWARE NO. WUWIE A, BUA NSƐMMISA A EDIDI SO YI:

• 

  Sɛ wotu abofra bi fi asafo no mu a, sɛn na ɛyɛ a n’awofo te nka?

• 

  Abusuafo a aka a wɔresom Yehowa no, dɛn na asafo no mufo betumi ayɛ de aboa wɔn?

• 

  Bible mu asɛm bɛn na ɛma yehu sɛ, ɛsɛ sɛ yenya ɔdɔ a emu yɛ den ma Yehowa sen yɛn abusuafo?

• 

  Yɛbɛyɛ dɛn akyerɛ sɛ yedi Yehowa nokware sen yɛn abusuafo?