Ɛbɛyɛ Dɛn Na Asomdwoe Aba Asase So?

Nea Bible ka

Ɛnyɛ nnipa na wɔde asomdwoe bɛba asase so. Mmom no, Onyankopɔn Ahenni na ɛde bɛba. Onyankopɔn Ahenni no yɛ aban a ɛwɔ soro, na Kristo Yesu na odi so hene. Nea Bible ka fa saa anidaso nwonwaso yi ho ni:

1. Onyankopɔn bɛma ‘akodi agyae akosi asase ano.’ Ɛno bɛma ɛbɔ a Onyankopɔn ahyɛ sɛ ɔbɛma “nnipa a wɔsɔ n’ani anya asomdwoe wɔ asase so” no aba mu.—Dwom 46:9; Luka 2:14, Good News Translation.

2. Onyankopɔn Ahenni no wɔ soro, nanso ebedi asase nyinaa so tumi. (Daniel 7:14) Ade baako a ɛtaa de ɔko ba ne ɔdɔ a obi wɔ ma ne man. Sɛ Onyankopɔn Ahenni a ɛyɛ aban a ebedi wiase nyinaa so no ba a, ebetu ɔdɔ a obi wɔ ma ne man ase korakora.

3. Yesu a ɔyɛ Onyankopɔn Ahenni no so hene no, wɔfrɛ no “Asomdwoe Hene.” Enti ɔbɛhwɛ ama ‘asomdwoe a enni awiei aba.’—Yesaia 9:6, 7.

4. Wɔn a wɔmpɛ sɛ wogyae akodi no rennya Onyankopɔn Ahenni no, efisɛ “obiara a n’ani gye awudisɛm ho no, [Onyankopɔn] kra kyi no koraa.”—Dwom 11:5; Mmebusɛm 2:22.

5. Onyankopɔn kyerɛkyerɛ n’asomfo ma wohu sɛnea wɔbɛtena asomdwoe mu. Bible ka mfaso a saa nkyerɛkyerɛ no de bɛba no ho asɛm. Ɛka sɛ: “Wɔde wɔn nkrante bɛyɛ nsɔw na wɔde wɔn mpeaw ayɛ kantankrankyi. Ɔman bi rentwe nkrante wɔ ɔman bi so, na wɔrensua akodi bio.”—Yesaia 2:3, 4.

Seesei mpo, Yehowa Adansefo a wɔwɔ wiase nyinaa ama Onyankopɔn rekyerɛ wɔn sɛnea wɔbɛyɛ nnipa a wɔpɛ asomdwoe. (Mateo 5:9) Ɛwom, ɛsono abusuakuw a yɛn mu biara fi mu, na yɛte aman bɛboro 230 so. Nanso, yɛmpene so sɛ yɛbɛfa akode na yɛne yɛn yɔnko nnipa akɔko.