Ahotew Ho Mmara a Onyankopɔn De Maa Israelfo No, Afei Na Nyansahufo Rehu Sɛ Ntease Wom
Bɛyɛ mfe 3,500 a atwam ni no, Onyankopɔn kaa asɛm bi kyerɛɛ Israelfo no. Saa bere no, na aka kakra ama wɔakɔ Bɔhyɛ Asase no so. Asɛm a Onyankopɔn ka kyerɛɛ wɔn ne sɛ ɔbɛbɔ wɔn ho ban afi “yare bɔne” a wohui sɛ ɛwɔ Egypt no ho. (Deuteronomium 7:15) Ɔkwan baako a Onyankopɔn faa so bɔɔ wɔn ho ban ne sɛ ɔma wohuu sɛnea wobedi wɔn ho ni, na ɔkyerɛɛ wɔn sɛnea wobesi nyarewa ano na antrɛw. Akwankyerɛ a ɔde maa wɔn no bi na edidi so yi:
Mmara a Onyankopɔn de maa wɔn no, na ɛhwehwɛ sɛ woguare na wɔhoro wɔn ntade.—Leviticus 15:4-27.
Onyankopɔn maa wɔn ahyɛde a ɛfa agyanan ho. Ɔkaa sɛ: “Siesie baabi wɔ nsraban no akyi na woakɔyɛ wo ho yiye wɔ hɔ. Nya ɔsosɔw wɔ wo nneɛma mu na sɛ worekogya w’anan wɔ mfikyiri hɔ a, wode atu amoa, na wuwie a wode akata wo tiafi so.”—Deuteronomium 23:12, 13.
Sɛ obi nya nsanyare a, na woyi no fi nnipa mu kosi sɛ ne ho bɛtɔ no. Sɛ ne ho tɔ no a, ansa na wɔbɛka sɛ “ne ho atew” no, ɛsɛ sɛ ɔhoro ne ntade na ɔde nsu guare. Ɔyɛ weinom nyinaa wie a, afei wɔma no kwan ma ɔsan ba nnipa mu bio.—Leviticus 14:8, 9.
Sɛ obi de ne nsa ka aboa anaa onipa funu a, na woyi no fi nnipa mu.—Leviticus 5:2, 3; Numeri 19:16.
Nyarewa ne ahotew ho mmara a Onyankopɔn de maa Israelfo no, nnansa yi ara na nyansahufo rehu sɛ ntease wom.
Israelfo no bere so no, na nnipa a wɔte aman foforo mu no nni wɔn ho ni koraa. Wei ho nhwɛso na edidi so yi:
Ná wɔto nwura gu mmɔnten so. Ná nsufĩ, aduan a asɛe, ne efĩ agye wɔn nkurow no abɔ so. Wei maa nyarewa buu so, na ɛmaa mmofra pii wuwui.
Mmoawammoawa a wɔde yare ba no, na adɔkotafo a wɔwɔ hɔ tete no nni ho nimdeɛ pii. Wohwɛ Egyptfo sei a, nneɛma a na wɔde sa yare no bi ne ɔketew mogya, pokupoku agyanan, nkura a wɔawuwu, ne paanoo a abɔ ntuw. Afei nso, nneɛma a na wɔde yɛ adwuma wɔ ayaresa mu no bi ne nnipa ne mmoa agyanan.
Ná mmoawammoawa pii ahyɛ Nil asubɔnten no ne ne nsuka ahorow mu mã. Wei maa nkurɔfo pii yareyaree. Afei nso, esiane sɛ na Egyptfo mmofra pii di aduan a asɛe nti, ayamtu ne nyarewa afoforo pii kunkum wɔn.
Israelfo no de, esiane sɛ wotiee Onyankopɔn Mmara a ɛfa ahotew ho no nti, na wɔwɔ apɔwmuden, na na wɔntaa nyareyare te sɛ aman afoforo a aka no.