3 “Anadwo a meda me mpa so no,
Mehwehwɛɛ nea medɔ no no.+
Mehwehwɛɛ no, nanso manhu no.+
2 Mɛsɔre akokyinkyin kurom;
Mɛkɔ akɔfa mmɔnten so ne gua so,
Ma menhwehwɛ nea medɔ no no.
Mehwehwɛɛ no, nanso manhu no.
3 Awɛmfo a wɔnenam kurom no huu me.+
Ɛnna mibisaa wɔn sɛ, ‘Moahu nea medɔ no no?’
4 Bere a misian wɔn ho ara pɛ
Na mihuu nea medɔ no no.
Misoo ne mu, na mannyaa ne mu
Kosii sɛ mede no baa me maame fi,+
Nea onyinsɛn me no dan mu.
5 O Yerusalem mma mmea,
Mede ɔtwe ne wuram ɔwansan ka ntam gu mo so sɛ:
Monnkanyan ɔdɔ wɔ me mu kosi sɛ ne bere bɛso.”+
6 “Dɛn na efi sare so reba sɛ wusiw kumɔnn yi?
Dɛn na kurobow ne ɛhyɛ
Ne oguadini nnuhuam nyinaa bi agye ho yi?”+
7 “Hwɛ! Ɛyɛ Solomon mpa.
Mmarima akatakyi 60 atwa ho ahyia,
Israel mmarima akatakyi.+
8 Asekan hyehyɛ wɔn nyinaa ho,
Wɔn nyinaa aben wɔ ɔko mu.
Obiara sekan bɔ n’asen,
Sekan a ɔde wɛn, anadwo nneɛma a ɛyɛ hu nti.”
9 “Ɛyɛ Ɔhene Solomon apakan
A ɔde Lebanon nnua ayɛ.+
10 Ɔde dwetɛ ayɛ ne nan,
Na ɔde sika kɔkɔɔ ayɛ ne nnyinaso.
N’agua yɛ ntama afasebiri;
Yerusalem mma mmea
Adura emu nso fɛfɛɛfɛ.”
11 “O Sion mma mmea, mumpue.
Monkɔhwɛ Ɔhene Solomon
Sɛ wahyɛ ayeforo kyɛw a ne maame+ yɛ maa no
Ɛda a ɔwaree no,
Ɛda a ne koma dii ahurusi no.”