Brɛ Wo Ho Ase Hyɛ Onyankopɔn Nhyehyɛe Ase Na Nya So Mfaso

NHYEHYƐE a wɔayɛ ma yɛde ayɛ Yehowa apɛde no, sɛ yebetumi adi so pɛpɛɛpɛ a, ehia sɛ yɛbrɛ yɛn ho ase hyɛ Onyankopɔn a ɔne Amansan Hene no ase. Yegye tom sɛ ne Ba no ne Kristofo asafo no ti. Ɛno da nkyɛn a, yɛde tiyɛ ho nnyinasosɛm no yɛ adwuma wɔ nneɛma foforo mu wɔ yɛn asetena mu. Sɛ yɛbrɛ yɛn ho ase ma tiyɛ ho nhyehyɛe a Onyankopɔn ayɛ no a, ɛboa yɛn nyinaa.

² Eden turo mu hɔ tɔnn na Onyankopɔn yɛɛ tiyɛ ho nhyehyɛe maa nnipa. Yehu wei wɔ Onyankopɔn ahyɛde a ɛwɔ Genesis 1:28 ne 2:16, 17 no mu. Ná ɛsɛ sɛ nnipa di mmoa so, na Adam ne Hawa nso brɛ wɔn ho ase hyɛ Onyankopɔn tumidi ase na wɔyɛ n’apɛde. Sɛ wɔbrɛɛ wɔn ho ase hyɛɛ Onyankopɔn ase a, anka wɔn asom bedwo wɔn ma biribiara akɔ so pɛpɛɛpɛ. Akyiri yi, ɔsomafo Paulo sii tiyɛ nhyehyɛe yi so dua wɔ 1 Korintofo 11:3. Ɔkyerɛwee sɛ: “Mepɛ sɛ muhu sɛ ɔbarima biara ti ne Kristo; ɔbea nso ti ne ɔbarima; Kristo nso ti ne Onyankopɔn.” Wei kyerɛ sɛ obiara hyɛ obi ase, gye Yehowa nkutoo.

³ Ɛnnɛ, nnipa pii nnye tiyɛ nhyehyɛe yi ntom. Adɛn ntia? Efisɛ Eden turo mu hɔ tɔnn na yɛn awofo a wodi kan no boapa twee wɔn ho fii Onyankopɔn tumidi ase. (Gen. 3:4, 5) Nanso, wɔannya ahotɔ biara. Mmom, wɔbɛhyɛɛ ɔbɔfo tirimɔdenfo, Satan Ɔbonsam ase. Nnipa a wodi kan no atuatew no sɛee nnipa ne Onyankopɔn ntam. (Kol. 1:21) Wei nti, ɛnnɛ, nnipa dodow no ara hyɛ ɔbɔnefo no tumi ase.—1 Yoh. 5:19.

⁴ Onyankopɔn Asɛm mu nokware a yɛahu no, yɛde bɔ yɛn bra. Wei nti, yɛade yɛn ho afi Satan tumi ase. Yɛyɛ Yehowa Adansefo a yɛahyira yɛn ho so abɔ asu, na yegye Yehowa tom sɛ yɛn Sodifo Pumpuni. Yɛne Ɔhene Dawid yɛ adwene. Ogye toom sɛ Yehowa ‘korɔn sen ade nyinaa.’ (1 Be. 29:11) Anokwa, yefi ahobrɛase mu ka sɛ: “Munhu sɛ Yehowa ne Nyankopɔn. Ɔno na ɔyɛɛ yɛn, na ɛnyɛ yɛn ankasa. Yɛyɛ ne man ne n’adidibea nguan.” (Dw. 100:3) Yegye tom sɛ Yehowa yɛ kɛse, na ɛfata sɛ yɛbrɛ yɛn ho ase koraa ma no, efisɛ ɔno na ɔbɔɔ nneɛma nyinaa. (Adi. 4:11) Yɛreka obi a ɔbrɛɛ ne ho ase paa maa Onyankopɔn a, ɔne Yesu Kristo. Yɛyɛ nokware Nyankopɔn no asomfo, enti yedi Yesu nhwɛso akyi.

⁵ Bere a Yesu wɔ asase so no, ohuu amane pii. Dɛn na osua fii mu? Hebrifo 5:8 ka sɛ: “Ɛwom sɛ na ɔyɛ Ɔba de, nanso osuaa osetie fii amane a ohui no mu.” Yesu kɔɔ so brɛɛ ne ho ase maa ne soro Agya no bere mpo a na ɔrehu amane no. Afei nso, Yesu ammɔ ne tirim anyɛ hwee; wammɔ ne tirim anka asɛm biara, na wanhwehwɛ n’ankasa anuonyam. (Yoh. 5:19, 30; 6:38; 7:16-18) Bere a ɔreyɛ ne som adwuma wɔ asase so no, ɔde anigye yɛɛ n’Agya apɛde ɛmfa ho sɛ ɛma ohyiaa ɔsɔretia ne ɔtaa no. (Yoh. 15:20) Yesu ‘brɛɛ ne ho ase’ maa Onyankopɔn, na ɔyɛɛ osetie kosii “asɛndua ho wu mu” mpo. Sɛnea Yesu brɛɛ ne ho ase koraa hyɛɛ Yehowa ase no ama yɛanya nhyira pii. Ama adesamma anya anidaso sɛ wɔbɛtena ase daa, na ama Yesu ankasa anya gyinabea a ɛkorɔn, na ahyɛ n’Agya anuonyam.—Filip. 2:5-11; Heb. 5:9.

NNEƐMA BƐN MU NA ONYANKOPƆN HWEHWƐ SƐ YƐBRƐ YƐN HO ASE?

⁶ Sɛ yɛbrɛ yɛn ho ase hyɛ Onyankopɔn ase na yɛyɛ n’apɛde a, ɛma yɛn haw ne yɛn dadwen so tew. Nanso wɔn a wɔmmrɛ wɔn ho ase nhyɛ Yehowa ase no de, amanehunu nkutoo. Yɛn tamfo Bonsam de, nea ɔpɛ ara ne sɛ obesum yɛn afiri na wakyere yɛn amene. Sɛ yesiw ɔbɔnefo no kwan na yefi yɛn pɛ mu brɛ yɛn ho ase hyɛ Yehowa ase a, obegye yɛn afi ne nsam.—Mat. 6:10, 13; 1 Pet. 5:6-9.

⁷ Yegye Kristo tiyɛ tom, na tumi a ɔde ama “akoa nokwafo ne ɔbadwemma” no wɔ Kristofo asafo no mu nso, yegye tom. Wei ma yenya suban pa, na ɛma yɛne yɛn ho yɛn ho tena kama. Sɛ yɛbrɛ yɛn ho ase ma Onyankopɔn nhyehyɛe wɔ asafo no mu a, ɛbɛma yɛatie Onyankopɔn Asɛm wɔ biribiara mu. Ebi ne sɛ yɛbɛkɔ asɛnka, yɛbɛkɔ Kristofo nhyiam na yɛanya mu kyɛfa, yebetie asafo mu mpanyimfo, na akwankyerɛ biara a Yehowa ahyehyɛde no de bɛma no, yebegye atom.—Mat. 24:45-47; 28:19, 20; Heb. 10:24, 25; 13:7, 17.

⁸ Yɛbrɛ yɛn ho ase ma Onyankopɔn a, ɛma yenya asomdwoe ne ahotɔ wɔ Kristofo asafo no mu, na biribiara kɔ so pɛpɛɛpɛ. Yehowa asomfo a wɔde n’akwankyerɛ yɛ adwuma no da ne su ahorow adi. (1 Kor. 14:33, 40) Nea yɛn ankasa ahu wɔ Yehowa ahyehyɛde no mu no ma yɛne Ɔhene Dawid yɛ adwene. Bere a Dawid huu nsonsonoe a ɛda Yehowa nkoa ne abɔnefo ntam no, ɔde anigye kaa sɛ: “Anigye ne nnipa a wɔn Nyankopɔn ne Yehowa!”—Dw. 144:15.

⁹ Ɛba aware ne abusua mu a, ‘ɔbea ti ne ɔbarima.’ Saa ara nso na ɔbarima ti ne Kristo, na Kristo nso ti ne Onyankopɔn. (1 Kor. 11:3) Ɛsɛ sɛ ɔyerenom brɛ wɔn ho ase ma wɔn kununom na mmofra nso brɛ wɔn ho ase ma wɔn awofo. (Efe. 5:22-24; 6:1) Sɛ abusua no muni biara brɛ ne ho ase ma tiyɛ nhyehyɛe yi a, ɛma asomdwoe tena abusua no mu.

¹⁰ Ɛsɛ sɛ ɔbarima warefo suasua Kristo na odi n’abusua so wɔ ɔdɔ mu. (Efe. 5:25-29) Sɛ wamfa ne tiyɛ no anhyɛ ne yere ne ne mma so anaa wantoto no ase a, ɛma wɔn ani gye ho sɛ wɔbɛbrɛ wɔn ho ase ama no. Ɔyere nso asɛde ne sɛ ɔbɛboa ne kunu. (Gen. 2:18) Enti sɛ ɔtɔ ne bo ase boa ne kunu na ɔde obu ma no a, onya ne kunu anim dom, na ɛhyɛ Onyankopɔn anuonyam. (1 Pet. 3:1-4) Sɛ awarefo de nea Bible ka fa tiyɛ ho no yɛ adwuma a, wotwa sa pa to hɔ ma wɔn mma. Wei boa mmofra no ma wɔbrɛ wɔn ho ase ma Onyankopɔn.

¹¹ Sɛ yɛbrɛ yɛn ho ase ma Onyankopɔn a, ɛbɛma yɛabrɛ yɛn ho ase ama “atumfoɔ a wɔkorɔn no,” efisɛ “Onyankopɔn na ɔde wɔn asisi wɔn sibea.” (Rom. 13:1-7) Kristofo di mmara so, enti yetua tow; yetua ‘Kaesare de ma Kaesare, na yetua Onyankopɔn de ma Onyankopɔn.’ (Mat. 22:21) Afei nso, nhyehyɛe biara a yɛbɛyɛ de ayɛ yɛn asasesin mu adwuma no, ɛsɛ sɛ yedi mmara a ɛfa nhyehyɛe a wɔde bɔ nkurɔfo ho nsɛm ho ban wɔ baabi a yɛwɔ no so. Biribiara a atumfoɔ a wodi yɛn so no bɛka sɛ yɛnyɛ no, sɛ entia Yehowa mmara a, ɛsɛ sɛ yɛbrɛ yɛn ho ase na yetie. Yɛyɛ saa a, ɛma yenya kwan ka Onyankopɔn Ahenni ho asɛmpa no.—Mar. 13:10; Aso. 5:29.

¹² Biribiara a yɛyɛ wɔ yɛn asetenam no, ɛsɛ sɛ yɛbrɛ yɛn ho ase hyɛ Onyankopɔn nhyehyɛe ase. Yɛwɔ anidaso sɛ bere bi bɛba a, nnipa nyinaa bɛbrɛ wɔn ho ase ahyɛ Yehowa Nyankopɔn ase. (1 Kor. 15:27, 28) Wɔn a wofi wɔn koma nyinaa mu gye Yehowa tumidi tom na wɔkɔ so brɛ wɔn ho ase ma no no benya nhyira afebɔɔ!