Ɛsɛ sɛ Yɛn Nyinaa Boa na Ama Yɛatumi Ayɛ Adwuma No
1 Ɛsɛ sɛ Yesu Kristo suani biara hu sɛ mmɔden a ɔbɔ wɔ Ahenni asɛnka adwuma no ho ne ne ho a ɔde hyɛ mu no ho hia yiye. Yesu hui sɛ Ahenni aba a n’asuafo bɛsow no dodow begu ahorow. (Mat. 13:23) Ɛwom sɛ akwampaefo a wɔyɛ adwumaden pii na wɔreyɛ asɛnka adwuma no fã kɛse no ara de, nanso ɛsɛ sɛ yɛkamfo wɔn a wɔde anigye kɔ so hyɛ Onyankopɔn anuonyam denam aba dodow biara a wɔbɔ mmɔden sow so no nyinaa.—Yoh. 15:8.
2 Nnipa Dodow Mmɔdenbɔ Tumi Yɛ Pii: Yesu ka siei sɛ adwuma a n’asuafo nyinaa bɛbom ayɛ no bɛma wɔayɛ nnwuma akɛse asen ɔno. (Yoh. 14:12) Sɛ́ ebia yɛn ankasa nsɛm tebea ahorow mma yentumi nyɛ nea yɛpɛ sɛ yɛyɛ nyinaa anaa ɛmma yentumi mfa bere pii nyɛ Ahenni asɛnka adwuma no, ɛsɛ sɛ yɛn nyinaa boa na ama yɛatumi ayɛ adwuma no. Ɛte sɛ nea Paulo kae no ara pɛ: “Nipadua no nyinaa ayɛ mua, esiane akwaa horow a aka atõatõam asisi so pɛpɛ na biara yɛ n’adwuma yiye nti, na ɛma nipadua no nyin.”—Efe. 4:16.
3 Ebinom betumi ate nka sɛ wontumi nyɛ pii. Nanso, wɔ Yehowa ani so no, ade a ehia ne sɛ yɛn som befi ɔkra nyinaa mu. Biribiara a yɛyɛ ma no no som bo ma no, na n’ani sɔ.—Fa toto Luka 21:1-4 ho.
4 Kɔ so Boa Adwuma No: Yɛn nyinaa wɔ hokwan sɛ yɛde honam fam nneɛma boa wiase nyinaa adwuma no. Ebinom nso betumi ayɛ honam fam adwuma de aboa Ahenni adwuma no. Yɛn mu biara betumi abɔ mmɔden ama mmuae a wasiesie no yiye wɔ asafo nhyiam ahorow ase, na yɛde yɛn ho ahyɛ Teokrase Ɔsom Sukuu mu. Sɛ yɛde hokwan ahorow a yɛwɔ sɛ yɛbɛhyɛ afoforo nkuran no di dwuma a, yɛboa ma asafo no honhom fam yiyedi tu mpɔn kɛse, na eyi boa ma asafo no tumi yɛ adwuma a wɔde ahyɛ wɔn nsa no.
5 Yiw, ɛsɛ sɛ yɛn nyinaa boa na ama yɛatumi ayɛ adwuma no. Ɛnsɛ sɛ obiara te nka sɛ ne ho nhia. Yɛn nyinaa mmɔdenbɔ, akɛse ne nketewa, a yɛde som Yehowa no na ɛma yɛda nsow sɛ yɛn nkutoo na yɛyɛ Onyankopɔn nokware asomfo no. (Mal. 3:18) Yɛn mu biara betumi anya kyɛfa titiriw ahyɛ Yehowa anuonyam, na yɛaboa afoforo ma wɔahu no na wɔasom no.