Abrabɔ Ne Asɛnka Adesua Nhoma Nhwehwɛmu

DECEMBER 3-9

BIBLE MU AKORADE | ASOMAFO NNWUMA 9-11

Tweetwee Bible Mu

nwtsty Aso 10:6 ho adesua asɛm

nhomahyɛfo bi a ɔde Simon: Obi yɛ nhomahyɛfo a, na ɔyɛ mmoa nhoma ho adwuma. Ná ɔde akado gu nsu mu de yiyi nwi anaa nam ne srade biara a ɛwɔ nhoma no ho. Ɛno akyi no, na ɔde nsã a ano yɛ den hyɛ nhoma no na ama watumi de ayɛ nneɛma bi te sɛ, bag, mpaboa ne nneɛma afoforo. Sɛ ɔreyɛ aboa nhoma no ho adwuma a, na ɛbɔn pa ara, enti na ohia nsu pii. Ɛbɛyɛ sɛ ɛno nti na na Simon te mpoano wɔ Yopa kurotia no. Wɔn a na wɔyɛ mmoa afunu ho adwuma no, na Mose Mmara no ka sɛ wɔn ho ntew. (Le 5:2; 11:39) Wei nti, na Yudafo dodow no ara bu nhomahyɛfo animtiaa, na na wɔmpɛ sɛ wɔne wɔn bɛtena mpo. Talmud no kaa no akyiri yi mpo sɛ, obi a oyi tiafi mpo wɔ anuonyam sen obi a ɔhyɛ nhoma. Nanso Petro anyɛ nyiyim, efisɛ wamma adwuma a Simon yɛ no ansiw no kwan sɛ ɔbɛkɔ akɔsoɛ no. Sɛnea Petro nyaa adwempa wɔ saa asɛm yi mu no, na ɛyɛ pa ara. Efisɛ na ɛrenkyɛ koraa na wɔde adwuma bi ahyɛ ne nsa. Ná saa adwuma no behia sɛ ɔkɔ Amanaman muni bi fie. Hela asɛmfua byr·seusʹ a ɛkyerɛ “nhomahyɛfo” no, abenfo bi mpo kyerɛ sɛ ɛyɛ din a na wɔde frɛ Simon.

DECEMBER 10-16

BIBLE MU AKORADE | ASOMAFO NNWUMA 12-14

Tweetwee Bible Mu

nwtsty Aso 13:9 ho adesua nsɛm

Saul, a wɔsan frɛ no Paulo: Efi saa asɛm yi so rekɔ no, wofii ase frɛɛ Saul sɛ Paulo. Wɔwoo ɔsomafo Paulo sɛ Hebrini, nanso na ɔwɔ hokwan sɛ Roma man ba. (Aso 22:27, 28; Flp 3:5) Enti ɛbɛyɛ sɛ efi ne mmofraase no, na wɔde Hebri din Saul ne Roma din Paulo nyinaa frɛ no. Ná ɛnyɛ nwonwa sɛ obi a ɔyɛ Yudani, titiriw nea ɔnte Israel kurow no mu no benya din mmienu. (Aso 12:12; 13:1) Ná Paulo abusuafo bi mpo wɔ Romafo anaa Helafo din. (Ro 16:7, 21) Ná Paulo yɛ “ɔsomafo ankasa ma amanaman no,” efisɛ na wɔahyɛ no sɛ ɔnka asɛmpa no nkyerɛ wɔn a wɔnyɛ Yudafo. (Ro 11:13) Ɛbɛyɛ sɛ ɔyɛɛ n’adwene sɛ ɔde ne Roma din no bɛyɛ adwuma, efisɛ na osusuw sɛ ɛno pa ara na nkurɔfo ani begye ho. (Aso 9:15; Ga 2:7, 8) Ebinom kyerɛ sɛ Sergio Paulo nti na Saul faa saa Roma din no sɛnea ɛbɛyɛ a ɔde bɛhyɛ amrado no anuonyam. Nanso, ɛbɛyɛ sɛ na ɛnyɛ saa na asɛm no te, efisɛ bere a Paulo fii Kipro mpo no, na ɔda so ara de din no yɛ adwuma. Ebinom susuw sɛ na Paulo mpɛ sɛ ɔde ne Hebri din no bɛyɛ adwuma, efisɛ sɛnea na wɔbɔ din no wɔ Hela mu no, na ɛne Hela asɛmfua bi a ɛkyerɛ onipa (anaa aboa) a ɔnantew kyeakyea ne ho di nsɛ.

Paulo: Edin Pauʹlos a efi Latin asɛmfua Paulus mu no kyerɛ “Kakra anaa Ketewa.” Kristofo Hela Kyerɛwnsɛm no mu no, wɔde din yi frɛ ɔsomafo Paulo mpɛn 157, na wɔde frɛ Sergio Paulo a na ɔyɛ amrado wɔ Kipro no nso pɛnkoro.—Aso 13:7.

DECEMBER 17-23

BIBLE MU AKORADE | ASOMAFO NNWUMA 15-16

Tweetwee Bible Mu

nwtsty Aso 16:37 ho adesua asɛm

yɛyɛ Romafo: Kyerɛ sɛ Roma man mma. Ná Paulo yɛ Roma man ba, na ɛbɛyɛ sɛ na Silas nso yɛ Roma man ba. Ná Roma mmara kyerɛ sɛ, sɛ ɔman ba bi nya asɛm a, ɛsɛ sɛ wodi n’asɛm wɔ ɔkwampa so, na ɛnsɛ sɛ wɔtwe n’aso wɔ baguam bere a wommuu no fɔ. Ná obi yɛ Roma man ba a, baabiara a ɔbɛkɔ wɔ ahemman no mu no, na ɔwɔ hokwan ahorow bi. Ná ɔnhyɛ nkurow a na Roma man no di so no mu biara mmara ase, gye Roma mmara nkutoo. Wɔbɔ no kwaadu a, na obetumi apene so ama wɔadi n’asɛm wɔ baabi a ɔwɔ no, nanso sɛ ɔpɛ a, na obetumi aka sɛ ɔpɛ sɛ wodi n’asɛm wɔ Roma asɛnnibea. Ɛba sɛ ɔkɔyɛ bɔne bi na wobetumi abu no kumfɔ a, na obetumi de asɛm no akɔdan amrado no. Ɔsomafo Paulo kaa asɛmpa no kɔɔ akyiri wɔ Roma Ahemman no nyinaa mu. Kyerɛwtohɔ ahorow wɔ hɔ a ɛkyerɛ sɛ ɔsomafo Paulo de hokwan a na ɔwɔ sɛ Roma man ba no yɛɛ adwuma mprɛnsa. Nea edi kan ne nea ɛwɔ kyerɛwsɛm yi mu a ɛkɔɔ so wɔ Filipi no. Ɔka kyerɛɛ Filipifo asɛnnifo no sɛ wɔatiatia n’ahofadi so sɛ wɔhwee no.

DECEMBER 24-30

BIBLE MU AKORADE | ASOMAFO NNWUMA 17-18

“Suasua Sɛnea Ɔsomafo Paulo Kaa Asɛm No Na Ɔkyerɛkyerɛe No”

nwtsty Aso 17:2, 3 ho adesua nsɛm

susuw: Paulo anka asɛmpa no ankyerɛ wɔn kɛkɛ. Ɔkyerɛkyerɛɛ mu, na ofii Kyerɛwnsɛm no mu de adanse mae. Ná n’adanse no gyina Hebri Kyerɛwnsɛm a wɔde honhom akyerɛw no so. Wankenkan Kyerɛwnsɛm no kɛkɛ, mmom ogyinaa so ne wɔn susuw nsɛm ho. Afei ɔhwɛɛ sɛnea n’atiefo nsɛm te ho ne wɔn susuw nsɛm ho. Hela adeyɛ asɛm di·a·leʹgo·mai no, wɔakyerɛ ase “sɛ́ wo ne obi bɛbɔ nkɔmmɔ anaa wo ne obi besusuw biribi ho.” Adwene a ɛwɔ akyi ne sɛ, wo ne nkurɔfo bedi nkitaho. Wɔasan de Hela asɛmfua yi adi dwuma wɔ Aso 17:17; 18:4, 19; 19:8, 9; 20:7, 9.

adanse ahorow: Nea Hela asɛmfua yi kyerɛ pa ara ne sɛ “wode biribi bɛto biribi ho anaa wode bɛto biribi nkyɛn.” Wei betumi akyerɛ sɛ, Paulo tɔɔ ne bo ase de Mesia no ho nkɔmhyɛ a ɛwɔ Hebri Kyerɛwnsɛm no mu no totoo nneɛma a esisii wɔ Yesu asetenam no ho. Ɔnam wei so kyerɛe sɛ nkɔmhyɛ ahorow no baam wɔ Yesu so.

nwtsty Aso 17:17 ho adesua asɛm

gua so: Ná Atene aguadibea (Hela mu no, wɔfrɛ no a·go·raʹ) no da Acropolis atifi atɔe, na na ne kɛse bɛyɛ sɛ eka 12 (hɛkta 5). Ná ɛnyɛ gua nko ara na wodi wɔ hɔ. Mmom, biribiara a ɛfa kurow no sikasɛm, amanyɔsɛm ne wɔn amammerɛ ho no, aguadibea hɔ na na ɛkɔ so. Esiane sɛ na kurow no mufo no sɔre a ɛhɔ ara na wɔte nti, na Atenefo no ani gye ho sɛ wobehyiam wɔ hɔ asusuw nsɛm a ɛkyere adwene ho.

nwtsty Aso 17:22, 23 ho adesua asɛm

Ɛyɛ Onyame Bi a Wonnim No Dea: Ná afɔremuka bi wɔ Atene a wɔakyerɛw nsɛm bi agu ho, na na Hela nsɛmfua A·gnoʹstoi the·oiʹ ka ho. Esiane sɛ na Atenefo no suro anyame ahorow nti, wosisii asɔredan ne afɔremuka pii maa wɔn. Ná wɔwɔ Ahoɔden nyame, Edin a Obi Begye nyame, ne Nkuranhyɛ nyame. Afei, su ahorow bi te sɛ ahobrɛase ne mmɔborɔhunu mpo, na wɔwɔ ho anyame, na na wɔayeyɛ afɔremuka ama wɔn. Esiane sɛ na wosuro sɛ ebia wɔn werɛ befi onyame bi na ama saa nyame no bo afuw wɔn nti, wɔyɛɛ afɔremuka bi too din sɛ “ɛyɛ Onyame Bi a Wonnim No Dea.” Saa afɔremuka no di adanse sɛ na nkurɔfo no gye tom sɛ Onyankopɔn bi wɔ hɔ a wonnim ne ho hwee. Paulo faa nyansakwan so kaa afɔremuka yi ho asɛm de danee n’atiefo no adwene kɔɔ nokware Nyankopɔn a saa bere no na wonnim no no so.

Tweetwee Bible Mu

nwtsty Aso 18:21 ho adesua asɛm

Sɛ Yehowa pɛ a: Saa asɛm yi si so dua sɛ, biribiara a yɛyɛ anaa ntotoe biara a yɛreyɛ no, ɛsɛ sɛ yɛhwɛ sɛ ɛne Onyankopɔn apɛde hyia anaa. Ɔsomafo Paulo maa saa asɛm yi tenaa n’adwenem pa ara. (1Ko 4:19; 16:7; Heb 6:3) Osuani Yakobo nso hyɛɛ ne nuanom nkuran sɛ, ɛyɛ a wɔnka sɛ: “Sɛ Yehowa pɛ a, yebenya nkwa na yɛayɛ sɛɛ anaa sɛɛ.” (Yak 4:15) Nanso ɛnsɛ sɛ saa asɛm no yɛ biribi a yɛka no yɛn ano kɛkɛ, mmom obiara a ofi ne komam ka “sɛ Yehowa pɛ a” no, ɛsɛ sɛ ɔbɔ mmɔden yɛ nea Yehowa pɛ. Ɛho nhia sɛ bere nyinaa yɛka asɛm yi ma epue yɛn ano, mmom mpɛn pii no, yɛka no wɔ yɛn komam.