ADESUA 34
Dɛn Na Yebetumi Ayɛ De Akyerɛ Sɛ Yɛdɔ Yehowa?
Efi bere a wufii ase sɛ woresua Bible no, wuhu sɛ woabɛn Onyankopɔn anaa? W’ani begye ho sɛ wo ne n’adamfofa no mu bɛkɔ so ayɛ den? Sɛ Yehowa hu sɛ woreyɛ nneɛma a ɛkyerɛ sɛ wodɔ no paa a, ɔdɔ a ɔno nso wɔ ma wo no bɛkɔ so ayɛ kɛse. Ɛnde, dɛn na wubetumi ayɛ de akyerɛ sɛ wodɔ Onyankopɔn?
1. Dɛn na yɛyɛ a ɛbɛma Yehowa ahu sɛ yɛdɔ no?
Sɛ yetie Yehowa a, ɛkyerɛ sɛ yɛdɔ no. (Kenkan 1 Yohane 5:3.) Yehowa nhyɛ obiara sɛ ontie no. Mmom, sɛ́ yebetie no anaa yɛrentie no no, wagyaw ama yɛn. Adɛn ntia? Ɔpɛ sɛ yɛn ankasa fi yɛn ‘koma mu yɛ osetie.’ (Romafo 6:17) Enti yɛbɛka a, Yehowa pɛ sɛ ɔdɔ a yɛdɔ no nti na yetie no, na ɛnyɛ sɛ ɛsɛ sɛ yetie no ara nti na yɛreyɛ saa. Ɔfã 3 ne 4 a ɛwɔ nhoma yi mu no bɛboa wo ama woahu nneɛma a woyɛ a ɛbɛkyerɛ sɛ wodɔ Yehowa. Ɛbɛma yɛahu nneɛma a Yehowa ani gye ho ne nea n’ani nnye ho.
2. Adɛn nti na ebetumi ayɛ den sɛ yɛbɛyɛ nneɛma a ɛkyerɛ sɛ yɛdɔ Yehowa?
Bible ka sɛ: “Ɔtreneeni amanehunu dɔɔso.” (Dwom 34:19) Asɛm no ne sɛ, bɔne wɔ yɛn nyinaa yɛn ho, enti ɛnna fam sɛ yɛbɛyɛ nea ɛteɛ. Ɛtɔ da nso a, nkurɔfo ne yɛn nni no yiye, yɛn sikasɛm tumi yɛ basaa, na yehyia ɔhaw afoforo nso. Ɛba saa a, etumi yɛ den sɛ yɛbɛyɛ nea Yehowa pɛ. Nea enti a ɛte saa ne sɛ, sɛ yɛn ho kyere yɛn a, ɛyɛ a na yɛrepɛ kwatikwan bi afa so ama yɛn ho atɔ yɛn. Nanso sɛ wumia w’ani di nokware, na wudi Yehowa ahyɛde so a, ɛbɛkyerɛ sɛ wodɔ no sen biribiara. Ɛba saa a, ɔno nso bedi wo nokware, na ɔrennyaw wo da.—Kenkan Dwom 4:3.
SUA PII KA HO
Sɛ yetie Yehowa a, ɛma n’ani gye paa. Ɔfã yi bɛma yɛahu nea enti a yɛreka saa. Ɛbɛsan ama yɛahu nea ɛbɛboa yɛn ama yɛadi no nokware.
3. Satan de asɛm bi ato wo so
Hiob nhoma no ma yehu sɛ, Satan de asɛm bi too Hiob so, na saa asɛm no fa nnipa a wɔsom Yehowa nyinaa nso ho. Monkenkan Hiob 1:1, 6–2:10. Muwie a munsusuw nsɛmmisa yi ho:
Ná Satan se dɛn nti na Hiob resom Yehowa?—Hwɛ Hiob 1:9-11.
Asɛm bɛn na Satan aka afa wo ne nnipa nyinaa ho?—Hwɛ Hiob 2:4.
Monkenkan Hiob 27:5b. Muwie a munsusuw asɛmmisa yi ho:
Dɛn na Hiob yɛ de kyerɛɛ sɛ ɔdɔ Yehowa ampa?
Hiob kɔɔ so dii Yehowa nokware de kyerɛɛ sɛ ɔdɔ no
Sɛ yɛkɔ so di Yehowa nokware a, ɛkyerɛ sɛ yɛdɔ no
4. Ma Yehowa ani nnye
Monkenkan Mmebusɛm 27:11. Muwie a munsusuw nsɛmmisa yi ho:
Sɛ wutie Yehowa na woyɛ w’ade nyansam a, ɛma ɔte nka sɛn? Adɛn ntia?
5. Wubetumi adi Yehowa nokware
Esiane sɛ yɛdɔ Yehowa nti, ɛma yɛka ne ho asɛm kyerɛ afoforo. Ɛwom ɛtɔ da a, ɛnyɛ mmerɛw, nanso yemia yɛn ani efisɛ yɛpɛ sɛ yedi no nokware. Hwɛ VIDEO yi. Muwie a munsusuw nsɛmmisa yi ho.
Ɛyɛ a ɛyɛ den ma wo sɛ wobɛka Yehowa ho asɛm akyerɛ afoforo anaa?
Dɛn na ɛboaa Grayson ma otumi yii ehu fii ne mu?
Sɛ ɛbɛyɛ mmerɛw ama yɛn sɛ yebedi Yehowa nokware a, gye sɛ yekyi nea okyi, na yɛn ani gye nea ɔpɛ ho. Monkenkan Dwom 97:10. Muwie a munsusuw nsɛmmisa yi ho:
Sɛ wohwɛ nea woasua afi Bible mu no a, nneɛma bɛn na woahu sɛ Yehowa ani gye ho, na nneɛma bɛn na okyi?
Dɛn na ɛbɛboa wo ama woakyi bɔne, na woayɛ nea ɛteɛ?
6. Sɛ yetie Yehowa a, yenya so mfaso
Sɛ yetie Yehowa a, yɛn ankasa na ɛboa yɛn. Monkenkan Yesaia 48:17, 18. Muwie a munsusuw nsɛmmisa yi ho:
Wugye di paa sɛ Yehowa nim nea eye ma yɛn? Adɛn nti na woreka saa?
Efi bere a wufii ase sɛ woresua Bible ne Yehowa a ɔyɛ nokware Nyankopɔn no ho ade no, aboa wo sɛn?
EBINOM KA SƐ: “Onyankopɔn de, sɛ woyɛ papa oo, woyɛ bɔne oo, ɛnyɛ n’asɛm.”
Sɛ obi ka saa a, kyerɛwsɛm bɛn na wubetumi de aboa no ama wahu sɛ, sɛnea yɛbɔ yɛn bra betumi ama Yehowa ani agye, anaa ama ne werɛ ahow?
NEA YƐASUA
Sɛ wudi Yehowa ahyɛde so, na wokɔ so di no nokware ɛmfa ho ɔhaw biara a wubehyia a, ɛkyerɛ sɛ wodɔ no.
Ntimu
Nea Hiob yɛe no, dɛn na wusua fi mu?
Dɛn na wobɛyɛ de akyerɛ sɛ wodɔ Yehowa?
Dɛn na ɛbɛboa wo ama woakɔ so adi Yehowa nokware?
YƐ NHWEHWƐMU
Hwɛ video yi, na wubehu nea ɛbɛboa wo ama woadi Yehowa nokware, na woadi nokware wɔ asafo no mu.
Satan de asɛm bi ato nnipa nyinaa so. Kenkan saa asɛm yi, na wubehu ɛho nsɛm pii.
“Hiob Kɔɔ So Ara Bɔɔ Bra a Edi Mu” (Bible No—Asɛm Bɛn Na Ɛwom? ɔfã 6)
Hwɛ video yi, na wubehu nea mmofra mpo betumi ayɛ de akyerɛ sɛ wɔdɔ Yehowa.
Sɛ aberante anaa ababaa bi nnamfo pɛ sɛ wɔhyɛ no ma ɔyɛ biribi a enye a, dɛn na ɛbɛboa no ama wakɔ so adi Onyankopɔn nokware?