Akatarhwa na Ruka

19 Iyena akapinda mu Djeriko uye ainga ecidarika nge mu thaundiro. 2 Mwanarume umweni waizwi Zakeu wainga ari mu thaundi irona; iyena wainga ari mutungamiriri we arongosi e musoho, uye wainga akapfuma. 3 Iyena waiedza kuona kuti Djesu wakhona ndiani, asi wainga asikakwanisi kumuona nge ndaa yo anhu, ngokuti iyena wainga wakafupika. 4 Ngokudaro, iyena wakagogoma ecienda mberi uye wakakwira mu muti* kuti amuone, ngokuti Djesu aida kupinda ndipona. 5 Hino Djesu paakaguma pa mbuto iyona, akaringira mudenga uye akati: “Zakeu, cita nokukasika, ngokuti nyamasi ndinodikana kuenda kumba kako.” 6 Ngokudaro, iyena wakacita mu muti nokukasika uye wakamutambira no mupfaro kumba kake. 7 Anhu ese paakazviona, akatanga kugurunguta eciti: “Iyena waenda koogara pa nyumba pe mushaishi.” 8 Asi Zakeu wakamuka uye wakati kuna Tenzi: “Izwai basi Tenzi, ndicapasa arombo hafu yo zviro zvangu, uye ciro cipi haco candakabira munhu, ndicamuhwirinzira zvakapethwa karongomuna.” 9 Hino Djesu akamubvunza kuti: “Nyamasi mapinda ruponeso mumba muno, ngokuti iyena ndi mwanawo wa Abrahamu. 10 Ngokuti Mwana we munhu auya koopsvaka no kuponesa anhu ainga apsveteka.”

11 Anhu paainga ecipurutana zviro izvi, iyena akaaitira muezaniso umweni, ngokuti ainga ari dhuze no Djerusarema uye anhu airangarira kuti Umambo wa Mwari waizouya ciriporipoco. 12 Ngokudaro iyena akati: “Mwana wa mambo umweni wakaenda ku nyika iri kure kuti aende koogadzwa hinga mambo uye wohwirira. 13 Iyena wakadainza aranda ake gumi, wakaapasa mina* dzinokwana gumi uye woabvunza kuti: ‘Itai bhizi no mina idzi dakara ndahwirira.’ 14 Asi agari e nyika yake aimuzonda uye akatuma aimiriri anganani mumasure make kuti abhuye kuti: ‘Atidi kuti mwanarume uu agare mambo wedu.’

15 “Paakahwirira mumasure me kugara mambo, iyena wakadainza aranda ake aya aakapasa mare,* kuti aziye mare yaakaona ngo bhizi raakaita. 16 Wekutanga wakauya kaari, womubvunza kuti: ‘Tenzi, mina yenyu yabarira dzimweni gumi.’ 17 Iyena wakamubvunza kuti: ‘Waita zvakanaka muranda wakanaka! Ngokuti iwewe wapangidza kuti wakatendeka pa zviro zvidoko, gara no ubaba wo kuonerera mathaundi gumi.’ 18 Hino umweni wakauyawo, womubvunza kuti: ‘Tenzi, mina yenyu yabarira dzimweni shanu.’ 19 Iyena wakamubvunzawo kuti: ‘Iwewewo onerera mathaundi mashanu.’ 20 Asi umweni wakaguma, wobhuya kuti: ‘Tenzi, iri pano mina yenyu ii yandakaputiridza mu djira ndoiiga. 21 Inini ndamuthyai, ngokuti muri munhu wakashata mwoyo; munotora zvamusikazi kuiga, uye munokorora pamusikazi kusima.’ 22 Iyena wakamubvunza kuti: ‘Ndinokutonga ngo masoko ako, muranda wakashata. Kureya kuti, waitozviziya kuti ndiri munhu wakashata mwoyo, ndinotora pandisikazi kuiga uye ndinokorora pandisikazi kusima? 23 Hino ngei auzi kuenda kookanda mare* yangu mu bhanko? No kuhwirira kandaita, kudai ndaitambira no juru.’

24 “Ngokudaro, iyena wakabvunza aya ainga aripo kuti: ‘Mutorerei mineyo uye pasai uya ano mina dzinokwana gumi.’ 25 Asi awona akamubvunza kuti: ‘Tenzi, iyena waano mina dzinokwana gumi!’ 26 Iyena wakaadaira kuti: ‘Inini ndinomubvunzai kuti, uya anazvo acapaswa zvimweni, asi uya asina, acatorerhwa kunyazi zviya zvaanazvo. 27 Uyezve, unzisai azondi angu aya ainga asikadi kuti ndigare mambo wawo uye aurayei pamberi pangu.’”

28 Mumasure me kureketa zviro izvi, Djesu akaenderera mberi, ecikwidza ku Djerusarema. 29 Uye paakaguma dhuze no Bhetifajee uye Bhetanya pa dunhu rinozwi Dunhu re Miorivhi, akatuma afundi ake airi, 30 eciti: “Endai mu mutanha wamuri kuona uu, uye pamunopinda imona, mucagumira kadhongi kakasungirhwa kekuti apana munhu wakambokakwira. Kasudzunurei, mokaunzisa kandiri. 31 Asi kana munhu akamubvunzisai kuti: ‘Ngei muri kukasudzunura?’ Mubvunzei kuti: ‘Kari kudiwa na Tenzi.’” 32 Hino aya ainga atumwa akaenda uye akagumira zvese hinga zvaainga abvunzwa. 33 Asi paainga ecisudzunura kadhongiko, aridzi ako akaabvunzisa kuti: “Ngei muri kusudzunura kadhongi?” 34 Awona akadaira kuti: “Kari kudiwa na Tenzi.” 35 Hino akatora kadhongi oenda nako kuna Djesu, akakanda macira awo pa musana pe kadhongi uye akaita kuti Djesu apakire.

36 Paainga ecihamba, anhu aiwarira macira awo mu gwanza. 37 Paakandoguma padhuze no gwanza rinobva mu Dunhu re Miorivhi, afundi akawanda akatanga kupfara, ese ainga ecikudza Mwari no izwi guru nge ndaa yo mabasa e simba aainga aona, 38 eciti: “Akakomborerhwa uya anouya hinga Mambo mu zina ra Djehovha!* Kudenga ngakugare no runyararo, uye rukudzo ngarigare ku mbuto dze kumusoro-soro!” 39 Asi Afarisi anganani ainga ari pakati pe anhu akamubvunza kuti: “Mufundisi, sumururai afundi enyu.” 40 Asi iyena akadaira kuti: “Ndinomubvunzai kuti, kudai awona arumbwa akanyarara, mapuwe aizodainzira.”

41 Paakaguma padhuze, akaringira thaundi uye akatanga kucema nge ndaa yaro, 42 eciti: “Kudai nyamasi iwewe wazwisisa zviro zvinocokuita no runyararo; asi zvino zvafiswa pa madziso ako. 43 Ngokuti acauya mazuwa ekuti azondi ako acakutenderedza no mitanda ino midjubo uye acakutambudza ngo matii ese. 44 Awona anozopondera pasi iwewe pamwepo no ana ako, uye aazokusiiri buwe pamusoro pe buwe rimweni, ngokuti auzi kuzwisisa nguwa ye kuongororhwa kako.”

45 Hino iyena akapinda mu tempro uye akatanga kudzingira aya aitengesa, 46 eciabvunza kuti: “Zvakatarhwa kuti: ‘Nyumba yangu icadainzwa nyumba yo minamato,’ asi imwimwi makaiita nyumba* yo mambavha.”

47 Iyena airumbwa ecifundisa mazuwa ese mu tempro. Asi atungamiriri e apristi, atari uye atungamiriri e anhu aipsvaka mukana wekumuuraya; 48 asi ainga asina mukana wokuzviita, ngokuti anhu ese ainyasa kumupurutana.