Akatarhwa na Ruka
20 Pa zuwa rimweni paainga ecifundisa anhu mu tempro uye eciziisa masoko akanaka, atungamiriri e apristi, atari no akuru akaguma 2 uye akamubvunza kuti: “Tibvunze, uri kuita zvese izvi no simba raani? Uye ndiani akakupasa simba irona?” 3 Iyena akaadaira kuti: “Inini ndicamuitaiwo mubvunzo, uye imwimwi munodikana kundidaira: 4 Rubhabhatidzo ra Juau rakabva kudenga here kana kuti ku anhu?” 5 Asi awona akatanga kubvunzana pacawo eciti: “Kana tikabhuya kuti: ‘Rakabva kudenga,’ iyena acati: ‘Hino ngei imwimwi musikazi kutenda maari?’ 6 Asi kana tikati: ‘Rakabva ku anhu,’ anhu ese acatifura no mapuwe, ngokuti awona anotenda kuti Juau wainga ari muphorofita.” 7 Ngokudaro, akadaira kuti ainga asikazvizii kuti rakabvepi. 8 Djesu akadaira kuti: “Hino andimubvunziiwo kakabva simba randinoita naro zviro izvi.”
9 Pedzepo, iyena akatanga kuitira anhu muezaniso unoti: “Mwanarume umweni wakasima munda we uvha wousiira arimi, uye woenda ku nyika ye kunza ke nguwa yakareba. 10 Payakaguma nguwa ye kuibva ke micero, wakatuma muranda wake ku arimi kuti amupase micero minganani ye munda we uvha. Asi arimiwo akamuponda, uye omuendesa asina ciro. 11 Asi iyena wakaatumirazve muranda umweni. Awona akamupondawo, omupsverudza uye akamuendesa asina ciro. 12 Iyena wakaatumirazve wecitatu; awona akamukuwadza uye akamudzingirisa. 13 Ngokudaro, muridzi we munda we uvha wakati: ‘Ndicaitei? Ndicaatumira mwana wangu we pa mwoyo. Pamweni acamureremedza.’ 14 Arimi paakamuona, akatanga kubvunzana pacawo eciti: ‘Uu ndiye mugari we nhaka. Ngatimuuraye kuti nhakei igare yedu.’ 15 Hino awona akamubvisa mu munda we uvha uye omuuraya. Muridzi we munda we uvha acaitei no arimi aya? 16 Iyena acahwirira, wouraya arimi aya, uye acapasa munda we uvha uu arimi amweni.”
Paakazwa izvi, awona akati: “Izvi azvidikani kuitika!” 17 Asi iyena akanyasa kuaringira uye akati: “Hino zviro izvi zvakatarhwa zvinoreyei: ‘Buwe rakarambwa no awaki, ndiro rakazogara buwe guru re pakhona? 18 Munhu wese anombwerera pa buwe iri acaguka-guka. Wese uya anombwererhwa naro, acadzengenyeka.”
19 Atari no atungamiriri e apristi aipsvaka mukana we kumubata ciriporipoco, ngokuti awona aizviziya kuti iyena ainga aita muezaniso uwona ecirangarira nge zvawo. Asi awona aithya anhu. 20 Uye mumasure me kuongorora zvese zvaitika, akatuma anhu aainga apasa mare pacifise-fise kuti anyepedzere kugara anatsi, kuitira kuti amubate pa masoko ake uye amuendese ku akuru-akuru e govherno. 21 Uye awona akamubvunzisa kuti: “Mufundisi, tinozviziya kuti munoreketa no kufundisa zvakanaka, uye amusananguri munhu, asi munofundisa makwanza a Mwari maererano no zvirokwazvo: 22 Zvinotenderhwa* here kana kuti haiwa kuripa musoho kuna Sezari?” 23 Asi iyena akaona ucengedzi wawo uye oabvunza kuti: 24 “Ndipangidzei dhenariyo* rimwe. Mufanikiso no masoko akatarhwa apa nge zvaani?” Awona akadaira kuti: “Ngezva Sezari.” 25 Iyena akaabvunza kuti: “Hino munodikana kupasa zva Sezari kuna Sezari, asi zviro zva Mwari kuna Mwari.” 26 Awona akakonerhwa kumubata pa masoko ake pamberi pe anhu, asi akashamiswa no mhinduro yake, zvekuti akakonerhwa zvekureketa.
27 Asi Asadhusi anganani, anhu anobhuya kuti akuna rumuko, akauya, omubvunzisa kuti: 28 “Mufundisi, Mozesi wakatitarira kuti: ‘Kana mwanarume akafa, wosiya mukadzi wake asina ana, hama yake inodikana kuwaka mufirhwakadziwo, kuti abarire hama yake ana.’ 29 Cakaitika nge cekuti pakati pedu painga pano hama dzinokwana 7. Wekutanga wakawaka, asi wakafa asina ana. 30 Hino wecipiri 31 no wecitatu akamuwakawo. Zvimwezvo zvakaitikawo no ese 7; awona akafa asina ana. 32 Pakupedzesera, mwanakadziwo wakazofawo. 33 Hino pa rumuko, acazogara mukadzi waani? Ngokuti ese 7 akambogara amuna ake.”
34 Djesu akaabvunza kuti: “Ana e nguwa ino* anowaka uye anowakwa, 35 asi aya akasanangurhwa kuti akasisira kugara nhaka ye mugariro we zviro ucauya uye kumutswa kubva ku akafa aawaki uye aawakwi. 36 Zvezvirokwazvo, awona aazofizve, ngokuti acaita hingana ngirozi, uye anonga ari ana a Mwari nge kugara ana e rumuko. 37 Asi panocokuita no kumutswa ke akafa, kunyazi Mozesi wakazvireketa paakabhuya ngezve pfiba re minzwa, paanodainza Djehovha* kuti ‘Mwari wa Abrahamu, Mwari wa Izaki uye Mwari wa Djakobo.’ 38 Iyena ndi Mwari we apenyu haiwa we akafa, ngokuti kaari* ese awona ari apenyu.” 39 Asi atari anganani akamubvunza kuti: “Mufundisi, imwimwi mareketa zvakanaka.” 40 Kubvira ipona, awona ainga asinazve ushingi we kumuita kunyazi mubvunzo umwe hawo.
41 Hino iyena akaabvunzisa kuti: “Ngei mecireketa kuti Kristu ndi mwana wa Dhavhidhi? 42 Ngokuti Dhavhidhi wakati mu bhuku re Mapisarema: ‘Djehovha* akati kuna Tenzi wangu: “Gara ku moko wangu kwawo 43 dakara ndakanda azondi ako pasi pe tsoka dzako.”’ 44 Hino, kana Dhavhidhi ecimudainza kuti Tenzi; zvingaitika kudini kuti iyena agare mwana wake?”
45 Anhu ese paainga ecipurutana, iyena akabvunza afundi ake kuti: 46 “Ngwarirai atari anoda kuhamba-hamba akapfeka macira akareba uye anoda kucungamidzwa mu mabazari, anoda kugara pa mbuto dze kutanga* mu masinagoga uye pa mbuto dzinonyasa kuoneka pa mabiko, 47 awona anotorera afirhwakadzi zviro uye ecida kuoneka anoita minamato yakareba. Awona anozotambira muphanico wakakura kudarika anhu ese.”