Akatarhwa na Ruka
9 Iyena akadainza afundi ake 12 uye akaapasa simba ro kudzingira madhimoni uye ro kuporesa nhenda. 2 Akaatuma kuti aparidze ngezve Umambo wa Mwari no kuporesa, 3 uye akaabvunza kuti: “Musatore ciro pa rhwendo renyu, kana ndonga, kana cibudu ce kukandira zvokurhya, kana pau, kana mare;* kunyazi macira amweni. 4 Asi pa nyumba pese pamunoguma, garai ipona dakara mabudepo. 5 Uye mbuto yese isina munhu anomutambirai, pamunonga mecibuda mu thaundi irona, gugudzai bukuta riri pasi pe tsoka dzenyu hinga upupuri kaari.” 6 Hino awona akaenda uye akapinda nge mu nharaunda mu mutanha umwe na umwe, eciziisa masoko akanaka uye eciporesa mu mbuto dzese.
7 Herodhi* mutungamiriri we dhistritu* wakazwa nge zviya zvainga zveciitika, uye wakathya maningi, ngokuti anhu anganani aibhuya kuti Juau wainga wamutswa kubva ku akafa, 8 asi amweni aibhuya kuti Eriya wainga wauya, uye amweniwo aibhuya kuti umwe we aphorofita e kare wainga wamuka. 9 Herodhi wakati: “Inini ndakagura musoro wa Juau. Hino, ndiani uu wandiri kuzwa ecirekethwa nge zvake?” Ndiyo ndaa iyena waipsvaka kumuona.
10 Aphostori paakahwirira, akabvunza Djesu zvese zvaainga aita. Hino iyena akaenda nawo ari oga mu thaundi rinozwi Bhetisaidha. 11 Asi anhu paakazviziya, akamuteera. Iyena akaatambira zvakanaka uye akatanga kuapanganidzira ngezve Umambo wa Mwari, uye akaporesa aya airhwara. 12 Kainga kaakudoka. Afundi 12 akamukhwederera, omubvunza kuti: “Bvunzai anhu kuti aende mu nharaunda dziri padhuze kuti apsvake kokuwatira uye adzitengere zvokurhya, ngokuti mbuto ino iri kure no kunogara anhu.” 13 Asi iyena akaabvunza kuti: “Apasei imwimwi zvokurhya.” Awona akati: “Atina ciro pano kunza ke pau shanu no howe mbiri, pamweni isusu wene tingaenda kootenga zvokurhya kuti tipase anhu ese.” 14 Ipona painga pano anarume angakwana 5000. Asi iyena akabvunza afundi ake kuti: “Itai kuti agare mu zvikwata zve anhu angakwana 50.” 15 Awona akaita izvona uye akaita kuti ese agare pasi. 16 Hino akatora pau shanu no howe mbiri uye akaringira kudenga oita munamato. Akagura pau odzipasa afundi kuti awona adzipase anhu. 17 Ngokudaro, ese akarhya oguta, uye akaunganidza matimbu ainga asara, odzadza zvitengu 12.
18 Pa zuwa rimweni, paainga ecinamata ari ega, afundi akauya kaari, uye iyena akaabvunzisa kuti: “Anhu ari kuti ndini ani?” 19 Awona akamudaira eciti: “Juau Mubhabhatidzi, asi amweni anoti ndimwi Eriya, uye amweni anobhuya kuti muri umwe we aphorofita e kare wamuka.” 20 Hino iyena akaabvunzisa kuti: “Kuzotiwo imwimwi, munoti ndini ani?” Pedru wakamudaira kuti: “Ndimwi Kristu wa Mwari.” 21 Mumasure me kunyasa kucedza nawo, akaabvunza kuti asabvunze munhu upi hake nge zvazvo, 22 asi iyena akaabvunza kuti: “Mwana we munhu anodikana kusongana no matambudziko akawanda orambwa no akuru, atungamiriri e apristi, atari, ouraiwa, uye ozomutswa pa zuwa rocitatu.”
23 Hino iyena akabvunza ese kuti: “Kana munhu ecida kunditeera, ngaadzirambe, atore mutanda wake we kutambudzikira* zuwa rimwe na rimwe uye arumbwe ecinditeera. 24 Ngokuti munhu wese anoda kuponesa upenyu* wake acauruza, asi uya anoruza upenyu* wake nge ndaa yangu ndiye acazouponesa. 25 Zvezvirokwazvo, zvinobetserei ku munhu kuona zviro zvese zve nyika woruza upenyu wake kana kuti wotsakatika? 26 Ngokuti munhu wese anopsveruka nge ndaa yangu uye nge ndaa ye masoko angu, Mwana we munhu acamupsverukirawo paacauya mu rukudzo rake no ra Baba ake no re ngirozi dzicena. 27 Ndinomubvunzai zvirokwazvo kuti, amweni enyu ari pano aazofi asati aona Umambo wa Mwari.”
28 Padarika mazuwa 8 mumasure me kureketa masoko aya, iyena akatora Pedru, Juau na Tiyago uye akakwira mu dunhu kuti anamate. 29 Paainga eciita munamato, ku hope kake kakacinja uye macira ake akacenesesa otanga kunyetukira. 30 Uye pakaoneka anarume airi aicedza naye; ainga ari Mozesi na Eriya. 31 Awona akaoneka ano rukudzo uye akatanga kureketa naye ngezve kuenda kake. Zviro izvona zvaizoitika mu Djerusarema. 32 Pedru no aya aainga anawo ainga abathwa no hope, asi paakamuka onyasa kufungura madziso, akaona rukudzo ra Djesu no anarume airi aainga akaima nawo. 33 Anarume aya paainga aakuenda, Pedru wakati kuna Djesu: “Mufundisi, zvakanaka kuti tiri pano. Hino ticagadzira zvitumba zvitatu, cimwe cenyu, cimwe ca Mozesi, no ca Eriya.” Iyena wainga asikazvizii zvaaireketa. 34 Asi paainga ecireketa izvi, pakaoneka gore uye irona rakatanga kuafukidza. Gore parainga raafukidza, awona akathya. 35 Hino, izwi rakabuda mu gore reciti: “Uu ndiye Mwana wangu, wakasanagurhwa. Mupurutanei.” 36 Izwi parainga recizika, Djesu akasara ega. Asi awona akanyarara uye pa mazuwa aya aazi kubvunza munhu nge zviya zvaainga aona.
37 Pa zuwa rakazoteera paakacita mu dunhu, anhu akawanda akaenda koosongana naye. 38 Hino mwanarume wainga ari pakati pe anhu wakakhuwa, eciti: “Mufundisi, ndinomukumbiraiwo kuti muone mwana wangu, ngokuti ndiye ega wandinaye. 39 Anoti kana abathwa no mwiya, anotanga kukhuwa, ecipfudza ecibuda mafuro mukanwa, uye mwiyewo unosobuda mumasure me kumutambudza no kumukuwadza. 40 Ndadeketerera afundi enyu kuti adzingire mwiya uu, asi awona azvikonerhwa.” 41 Djesu akadaira kuti: “Imwi mubarirhwana usina kutenda uye wakashata, ndicagara na imwimwi dakara rini uye ndicashingirira maitiro enyu dakara rini? Unzisa mwana wako kuno.” 42 Uye murumbwanewo paainga ecikhwedera kaari, dhimoni riya rakamumbwedzera pasi uye rakaita kuti iyena apfudze maningi. Asi Djesu akatuka mwiya usikazi kucena uye akaporesa murumbwanewo uye akamupasa kuna baba ake. 43 Uye ese akashamiswa maningi no simba guru ra Mwari.
Anhu paainga ecishamiswa no zviro zvese zvaainga eciita, Djesu akati ku afundi ake: 44 “Nyasai kupurutana uye edzurirai masoko aya, Mwana we munhu acatengeswa mu nyara dze anhu.” 45 Asi awona ainga asikazwisisi zvaainga ecireketa. Zvezvirokwazvo, izvi zvakafiswa kaari kuti asazvibate, asi awona aithya kumubvunzisa nge zvazvo.
46 Hino awona akatanga kureketedzana nge zvekuti ndiani mukuru pakati pawo. 47 Djesu, eciziya ngezve marangariro e mwoyo yawo, akatora mwana mudoko, omuimisa pa dii rake, 48 uye akaabvunza kuti: “Munhu anotambira mwana mudoko wakaita hingana uu mu zina rangu anonditambirawo; uye uya anonditambira anotambirawo Uya akandituma. Ngokuti uya anodziita mudoko pakati penyu ndiye mukuru.”
49 Ngokudaro, Juau wakamubvunza kuti: “Mufundisi, takaona munhu umweni waidzingira madhimoni mu zina renyu, uye takaedza kumurambidza, ngokuti iyena aaripi kumuteerai pamwepo na isusu.” 50 Asi Djesu akati kaari: “Musaedze kumurambidza, ngokuti wese asikapesani na imwimwi ari ku dii renyu.”
51 Payaikhwedera* nguwa yekuti Djesu aende kudenga, iyena akashinga kuenda ku Djerusarema. 52 Ngokudaro, iyena akatuma anhu mberi kake. Awona akaenda ku mutanha we Samariya kuti aite gadziriro kuti amutambire. 53 Asi Asamariya aazi kumutambira, ngokuti iyena aienda ku Djerusarema. 54 Afundi Tiyago na Juau paakaona izvi, akati: “Tenzi, munoda here kuti tikumbire muriro we kudenga kuti uatsakatise?” 55 Asi iyena akatendeuka oasumurura. 56 Ngokudaro, awona akaenda ku mutanha umweni.
57 Hino, paainga ecihamba mu gwanza, munhu umweni wakamubvunza kuti: “Ndicamuteerai kwese kamunoenda.” 58 Djesu akati kaari: “Imbwa dze mushango dzino mapako adzinogara, shiri dzo kudenga dzino masaki, asi Mwana we munhu aana pokuwata.” 59 Hino iyena akabvunza umweni kuti: “Gara muteeri wangu.” Mwanarumewo wakati: “Tenzi, ndisiyei ndimbotange kuenda kookotsa baba angu.” 60 Asi Djesu akamubvunza kuti: “Siya kuti akafa akotsane oga, asi iwewe enda uye ziisa Umambo wa Mwari.” 61 Uye umweni wakabhuya kuti: “Tenzi, inini ndicamuteerai, asi ndisiyei kuti ndimbotange kuenda kooeneka anyaukama angu.” 62 Djesu akamubvunza kuti: “Munhu wese anobata sharuwa oringira sure aazi kusisira Umambo wa Mwari.”